To a tamne (27.01.20)
Z wosebitej kanonu su wčera hodowne štomy přez Kaselske Friedrichowe naměsto třěleli. Bě to dźěl wuměłskeje instalacije Leona de Bruijne. Nižozemski wuměłc wěnuje so we wustajeńcach stajnje zaso na žortne wašnje „zaničowanskemu potencialej“ swojich kinetiskich mašinow. „Kanona hodownych štomow“ so tuž wulkotnje do toho wobłuka hodźi, wón přeradźi. Kanona móže jědle a šmrěki hač do 60 metrow daloko třěleć.
Přemučny a přepjany bě šofer wosoboweho awta před hosćencom za spěšnojědźe w Geseke pola Paderborna: Jako chcyše sobudźěłaćer hosćenca skazanku při woknje přijimować, muž za wodźidłom awta spaše. Jako bě jědź krótko po tym spřihotowana, bě sej tón znowa wusnył. Přiwołana policija wšak zwěsći na to porjadnu alkoholowu „chorhojčku“ a je šoferej nablaku jězbnu dowolnosć sćazała.
Zarjadnistwo zlemjene
Podstupim (dpa/SN). Po cyberowym nadpadźe hackerow njeje měšćanske zarjadnistwo stolicy Braniborskeje Podstupima internetnje docpějomne. Dalše komuny nimaja tohorunja internetny kaž tež telefoniski zwisk do zjawnosće. Njeznaći běchu spytali so do syće zarjadnistwa zadobyć a interne daty wotwołać. Wobydlerjam wunjese ataka přidatne wobćežnosće: Zarjad za přizjewjenje jězdźidłow njeje dźěłakmany runje tak kaž wobydlerski běrow. Wěrowanja pak su dale móžne.
Miliony ludźi izolowane
Peking (dpa/SN). Bojo so dalšeho rozšěrjenja noweje chorosće płucow w Chinje su tam mjeztym wjace hač 43 milionow wobydlerjow izolowali. Tež w metropolomaj Yichang ze štyrjomi milionami a Tianmen z 1,7 mio. wobydlerjow stej železniski a bliskowobchad přetorhnjenej, zamołwići zdźěleja. Mjeztym je ličba wobkrućenych infekcijow na 900 rozrostła, 26 ludźi je dotal zemrěło. Wirus je so tež hižo w druhich krajach jewił.
Trump ma měrowy plan
Sakski ministerski prezident Michael Kretschmer (CDU, naprawo) je ...
Merkel pola Erdoğana
Znamjo přećiwo antisemitizmej
Jerusalem (dpa/SN). Ze sylnym znamjenjom solidarity su statni hosćo z něhdźe 50 krajow w Jerusalemje wuswobodźenje zaničowanskeho lěhwa Auschwitz před 75 lětami wopominali. Zhromadnje woni wčera namołwjachu, po wšěm swěće přećiwo antisemitizmej wojować. Němska měła při tym swojej historiskej zamołwitosći wotpowědować, rjekny zwjazkowy prezident Frank-Walter Steinmeier, kiž bě jako prěni němski prezident we wopomnišću Yad Vashem rěčał.
„Wojujemy přećiwo antisemitizmej. Spjećujemy so jědej nacionalizma. Škitamy židowske žiwjenje“, Steinmeier rjekny. „Stejimy poboku Israela. Tute přilubjenje wospjetuju tule w Yad Vashemje, před wočemi swěta.“ Zwjazkowy prezident potwjerdźi, zo němska zamołwitosć nihdy njezańdźe, zo njeje při tym kónčneho dypka. Israelske medije zastopnjowachu jeho narěč jako jara hnujacu. Israelski prezident Reuven Rivlin je Steinmeiera po narěči wobjimał.
Prometheus 2.0?
To a tamne (24.01.20)
Wosebje swědomity hólčec je swoju mać w Rostocku porjadnje nastróžił. Kaž policija zdźěli, bě mać zastojnikow w 2.30 hodź. informowała, zo je 13lětny syn ze šulskej tobołu preč. Pachoł bě papjerku z informaciju zawostajił, zo je hižo po puću do šule. W Rostocku běchu wčera wot ranja w třoch warnowanske stawki připowědźene. Hólc so tuž boješe, zo dypkownje do něšto kilometrow zdaleneje šule njepřińdźe. Wokoło sedmich sekretarka wottam zdźěli, zo je hólc doběžał.
Dospołnje bjez muži wostanje lětuša jury wubědźowanja rjanolinkow „Miss Germany“ we wólnočasnym parku Rust, kaž organizatorojo zdźěleja. Woni wotpowěduja tak swojemu nowemu narokej: Hódnoćić nochcedźa jenož wonkowny wobraz kandidatkow, ale tež jich wosobinu, charakter a žiwjensku stawiznu. Dobyćerku wuzwola 15. februara.
Dźěsći smjertnje znjezbožiłoj
Eisenach (dpa/SN). Při ćežkim njezbožu šulskeho busa njedaloko Eisenacha stej dźensa rano dwě dźěsći smjertnje znjezbožiłoj. Krajnoradny zarjad Wartburgskeho wokrjesa dale zdźěla, zo su so dalši dwacećo šulerjo kaž tež šofer zranili. Po informacijach policije bě wjace hač dwaceći dźěći w busu. Wokoło 7.30 hodź. poča so bus na zalodźenej dróze suwać a zajědźe do přirowa. Bus bě po puću z Eisenacha do zakładneje šule w Berka.
Prawicarsku skupinu zakazał
Berlin (dpa/SN). Zwjazkowy nutřkowny minister Horst Seehofer (CSU) je prawicarskoekstremnu skupinu „Combat 18“ zakazał, kaž rěčnik ministerstwa informuje. W rańšich hodźinach je policija we wjacorych zwjazkowych krajach, mjez druhim w Braniborskej, objekty přepytała a nawodu skupiny zajała. K namocy zwólniwu prawicarsku skupinu maja za wobrónjenu wotnožku w Němskej zakazaneje syće neonacijow „Blood and honour“ (Krej a česć).
Zakoń wo brexiće schwalili
Pasažěrojo z chinskeho města Wuhan, centruma noweje chorosće ...
Statnicy wopominaja holocaust
Jerusalem (dpa/SN). Statni a knježerstwowi šefojo z nimale połsta krajow wopominaja dźensa w Israelu wuswobodźenje zaničowanskeho lěhwa Auschwitz před 75 lětami. Po informacijach israelskeho wonkowneho ministerstwa jedna so při tym wo najwjetši statny podawk po załoženju Israela 1948. Jako prěni zwjazkowy prezident Němskeje chcyše Frank-Walter Steinmeier we wopomnišću holocausta Yad Vashem porěčeć. Póndźelu budźe tomu 75 lět, zo su sowjetske jednotki zaničowanske lěhwo Auschwitz w Pólskej wuswobodźili, kotraž bě wot Němskeje wobsadźena. Nacionalsocialisća běchu tam wjace hač milion ludźi morili, zwjetša Židow ze wšeje Europy.
Mjez hosćimi su mjez druhim prezidentaj Francoskeje a Ruskeje, Emmanuel Macron a Wladimir Putin, kaž tež wiceprezident USA Mike Pence a britiski naslědnik tróna princ Charles.
Pólski statny prezident Andrzej Duda je wobdźělenje wotprajił, dokelž njeběchu jemu dowolili w Yad Vashemje jako zastupjer potrjecheneho ludu rěčeć.
