Třo kandidaća za biskopa
Ewangelska krajna cyrkej Sakskeje woli kónc měsaca noweho nawodu
Drježdźany (dpa/SN). Ewangelska krajna cyrkej Sakskeje hotuje so na wólby noweho biskopa. Minjeny tydźeń su so třo kandidaća na zjawnym forumje w Drježdźanach zjawnosći předstajili. Při tym su so superintendent Andreas Beuchel (56) z Mišnja, Ulrike Weyer (46) z Plauena kaž tež wyši krajny cyrkwinski rada Tobias Bilz (55) za to wuprajili, debatu wokoło dotalneho biskopa Carstena Rentzinga sprawnje a na wotewrjene wašnje předźěłać. Wotstup Rentzinga bě w nutřkocyrkwinskich kruhach a w zjawnosći kontrowersne diskusije zbudźił.
To a tamne (10.02.20)
Psa wotškódnić ma danske lětanske předewzaće Danish Air Transport (DAT). Pozadk njewšědneho padu je směrnica EU, po kotrejž dyrbja pasažěrow wotškódnić, hdyž je lět wupadnył. Dokelž je tomu tak było, je předewzaće mužomaj wotškódnjenje wupłaćiło. Wonaj měještaj psa sobu a žadataj sej tež za njeho wotškódnjenje. Směrnicy EU rěča jeno wo „pasažěrach“ a nic wo tym, hač jedna so wo čłowjeka abo zwěrjo.
Po puću k słóncu je wot dźensnišeho nowa swětnišćowa sonda. „Solar Orbiter“ je rano w Cape Canaveralu w staće USA Florida wotlećał. Je to projekt europskeje swětnišćoweje agentury ESA. Solar Orbiter je nimale 1,5 miliardow eurow płaćił. Z nim lubja sej nowe dopóznaća wo 150 milionow kilometrow zdalenym słóncu. Sonda wobsteji z wosebitych maćiznow, kotrež wulku horcotu znjesu.
Namjety w parlamenće předstajić
Nowa komisija EU dźěła. Tak bě čas zrały, zo bychu zastupjerjo europskeje wobydlerskeje iniciatiwy Minority SafePack swoje žadanja nastupajo podpěru rěčneje a kulturneje mnohotnosće a za škit awtochtonych mjeńšin w Brüsselu rozłožili a 1 128 385 wobkrućenych podpismow předpołožili.
Flensburg/Brüssel (SN/at). „Nadźijamy so, zo přichodne šěsć měsacow trěbnu podpěru a přeswědčenje přinjesu a zo Europska komisija na kóncu wobzamknje, na zakładźe našich namjetow legislatiwne naprawy zawjesć“, rjekny Loránt Vincze, prezident Federalistiskeje unije europskich narodnych mjeńšin (FUEN) a čłon Europskeho parlamenta, předwčerawšim na nowinarskej konferency w Brüsselu. Ta wotmě so po zetkanju zastupjerjow iniciatiwy Minority SafePack (MSPI) z Věru Jourovej, wiceprezidentku komisije EU a jako komisarka za hódnoty a transparencu zamołwitej za system europskeje wobydlerskeje iniciatiwy, a z komisarku EU za inowaciju, slědźenje, kulturu, kubłanje a młodźinu Mariyju Gabriel (SN informowachu).
Dojednanje renty dla
Berlin (dpa/SN). Po dołhej ćahańcy chce zwjazkowe knježerstwo zakładnu rentu za mało zasłužacych w přichodnych tydźenjach zwoprawdźić. Minister za dźěło Hubertus Heil (SPD) a strowotniski minister Jens Spahn (CDU) staj „poslednje wotewrjene prašenja“ w naćisku zakonja zrjadowałoj, kaž z Berlina rěka. Kabinet so přichodnu srjedu z tym zaběra. Ministraj staj so na to dojednałoj, připłatk podźělnje hižo po 33 dźěłowych lětach wupłaćić, po 35 lětach w połnym wobjimje.
Buttigieg před Sandersom
Washington (dpa/SN). Po dny trajacym dlijenju su demokraća w zwjazkowym staće USA Iowa wšitke wólbne wobwody wuličili. Po tym leži bywši měšćanosta Pete Buttigieg snadnje před senatorom Berniejom Sandersom, zdźěla demokratiska strona. Třeće městno zaběra senatorka Elizabeth Warren. Techniska pana bě při wólbach kandidata demokratow za prezidentske wólby wulki chaos a dlijenje zawiniła.
Nawoda teroristow morjeny
Namócnosće mjez Palestinjanami a israelskimi wojakami w Kraju ...
CDU chce nowozapočatk w Durinskej
Erfurt (dpa/SN). Po skandalu při wólbach durinskeho ministerskeho prezidenta chce CDU w Durinskej móžnosće parlamentariskeho nowozapočatka pruwować. Dyrbjało-li to zwrěšćić, su nowowólby njewobeńdźomne, kaž je předsydka CDU Annegret Kramp-Karrenbauer minjenu nóc po wjacehodźinskich wuradźowanjach w Erfurće zdźěliła. To rěka, zo chcyła wona durinskemu krajnemu předsydźe Mikej Mohringej zmóžnić, bjez nowowólbow a z nimi zwjazanych wočakowanych stratow za křesćanskich demokratow wuslědk wólbow ministerskeho prezidenta korigować. CDU bě srjedu zhromadnje z AfD politikarja FDP Thomasa Kemmericha do zastojnstwa ministerskeho prezidenta woliła, štož je wótre kritiki zbudźiło. Prezidij CDU bě sej hišće samsny dźeń nowowólby žadał. Kemmerich je wčera, dźeń po wuzwolenju, swój wotstup připowědźił. Do toho bě zwjazkowy předsyda FDP Christian Lindner do Erfurta přijěł a z nim rěčał.
Ludźo so noweho wirusa njeboja
Köln (dpa/SN). Najwjetši dźěl wobydlerjow Němskeje so corona-wirusa njeboji. Dźewjeć z dźesać woprašanych (89 procentow) so njestarosći, zo so sami abo jich swójbni z wirusom natyknu. To je wuslědk naprašowanja instituta infratest dimap w nadawku telewizijneho sćelaka ARD. Jenož kóždy dźesaty ma strach noweho wirusa dla za wulki (sydom procentow) abo jara wulki (tři procenty). Za naprašowanje su so minjenu póndźelu a wutoru cyłkownje 1 003 wólbokmanych w Němskej telefonisce prašeli.
Zwěsćili tež su, zo ludźo zamołwitym zarjadam a strowotniskim institucijam w Němskej hladajo na wirus dowěrjeja. Na wšě 82 procentow woprašanych je sej wěstych, zo maja zamołwići połoženje pod kontrolu. Jeno 14 procentow to hinak widźi a měni, zo tomu tak njeje.
Po cyłym Zwjazku zwěsćichu dotal 13 dopokazanych padow corona-wirusa, jědnaće z nich w zwisku z bayerskej firmu Webasto. Natyknjena žona z Chiny bě zawod wopytała a tak wirus němskim kolegam dale dała.
To a tamne (07.02.20)
Drogi w hódnoće cyłeho miliona eurow wučušlili su wosebje kubłane psy cłownikow na Frankfurtskim lětanišću. Wopojny jěd bě w jědźi za ćěšenki schowany. Prěni kurěr z Južneje Ameriki měješe dwanaće kilogramow w kófrje, tamny samo pjatnaće. Kokain bě we wjacorych tyzach schowany. Zastojnicy dźiwachu so hoberskeho mnóstwa dla. Telko drogow namakaja hewak jenož we wulkich „posyłkach“. Wobeju kurěrow su zajeli.
Z chorobnej sotru stać chcyła je so first lady Němskeje Elke Büdenbender jako młodostna. To je wona nowinarjam přeradźiła. Za přikład brała bě sej dźensniša mandźelska zwjazkoweho prezidenta Franka-Waltera Steinmeiera swój čas kmótru, kotraž w tym powołanju dźěłaše. Hižo zahe bě wona přeswědčena, zo tež holcy dobre wukubłanje trjebaja. Stała pak je so Büdenbender ze sudnicu.
Nowy Serbski superintendent
Drježdźany/Budyšin (SN). Hodźijski farar Christoph Rummel naslěduje Jana Malinka w zastojnstwje Serbskeho superintendenta. Ewangelsko-lutherska krajna cyrkej Sakskeje w Drježdźanach dowěri Christophej Rummelej nadawk, přewzać zastojnstwo wot 1. awgusta 2020. Takle je nowinski rěčnik cyrkwje Matthias Oelke wčera wotpowědne naprašowanje našeho wječornika wobkrućił.
Wosadni Jana Malinka we wobłuku dwurěčnych kemšow 19. julija w Budyskej Michałskej cyrkwi ze zastojnstwa rozžohnuja. Termin zapokazanja naslědnika hišće znaty njeje.
„Strach za demokratiju“
Washington (dpa/SN). Prezident USA Donald Trump je po słowach předsydki Domu reprezentantow, demokratki Nancy Pelosi, nadal „strach za demokratiju Ameriki“. Z wuwinowanjom Trumpa w jednanju wo jeho wotsadźenju su republikanscy senatorojo „bjezzakonskosć“ a podrywanje wustawoweho porjada normalizowali, Pelosi wčera wječor rozłoži. Hrozy dale strach, zo móhł Trump wólby manipulować. Jeho wuwinowanje žanu hódnotu nima, dokelž njeje senat za fairny proces trěbnych dalšich swědkow a dopokazy přizwolił, rjekny Pelosi.
Ličba schorjenjow jara přiběra
Peking/Yokohama (dpa/SN). Ličba dopokazanych infekcijow a mortwych noweho corona-wirusa dla w Chinje razantnje přiběra. Hač do srjedy postupi ličba pacientow z nowej chorosćow płucow w běhu jednoho dnja wo 3 887 na 24 324, kaž strowotniska komisija w Pekingu rozprawja. 490 ludźi je dotal zemrěło. Chinske wulkopósłanstwo w Berlinje zwěsća rozšěrjaceho so wirusa dla přiběrace njepřećelske zadźerženje přećiwo chinskim staćanam w Němskej.
UNO ma połoženje rozjimać
