Rozhłosowy popłatk drje zwyša
Berlin (dpa/SN). Rozhłosowy popłatk měł so po słowach komisije fachowcow wot januara 2021 wo 86 centow na 18,36 eurow měsačnje podróšić. Swoju rozprawu z poručenjom je komisija k zwěsćenju pjenježneje potrjeby rozhłosowych sćelakow (KEF) wčera w Berlinje zastupnikam zwjazkowych krajow přewostajiła. Woni maja w tej naležnosći poslednje słowo a maja doskónčnje wo wobjimje popłatka za sćelaki ARD, ZDF a Deutschlandradio rozsudźić. Poručenje komisije je zdobom směrodajne. Dotal płaća ludźo 17,50 eurow na měsac.
Zjawnoprawniskemu rozhłosej je popłatk hłowne žórło dochodow. Tón běchu w aprylu 2015 wot 17,98 na 17,50 eurow znižili. Wot toho časa njejsu jón změnili. Wo wobjimje popłatka rozsudźeja prawidłownje po štyrjoch lětach. Přichodna perioda traje wot 2021 do 2024. W lěće 2018 běchu z rozhłosoweho popłatka něhdźe wosom miliardow eurow wuzbytkowali. Za loni liča z podobnej sumu.
To a tamne (21.02.20)
Za čas dowola nad Sewjernym morjom 2012 bě tehdy 13lětna Paula blešu z powěsću do wody ćisnyła. Nětko wosom lět pozdźišo je ju wobydlerka kupy Langeoog namakała. Dźakowano socialnym medijam bu foto z powěsću 40 000 króć dale date, doniž tež Paulu z Badensko-Württembergskeje njedocpě. Kaž so wukopa, bě Paula blešu swój čas na samsnej kupje morju přepodała, hdźež bu namakana.
Miłe februarske temperatury su na tym wina, zo dźiwina w Berlinje nětko hižo wotuća. „Wjewjerčki, insekty kaž tež šupy k měrej njepřińdu“, rěka z tamnišeho wobswětoweho zarjada. Tež ptački w měsće hižo dwaj tydźenjej prjedy fifola hač hewak. Někotre samo hižo swoje hněžka přihotuja. Jeli nětko hišće raz mjerznje, móže to za dorost jara zlě wuńć. Wěste družiny zwěriny dźě su hač do měrca w zymskim sparje.
Bloomberg nadběhowany
Las Vegas (dpa/SN). W telewizijnej debaće nastupajo prezidentskeho kandidata demokratow USA je sej nowy kandidat Michael Bloomberg wot tamnych požadarjow za zastojnstwo tójšto naposkać dyrbjał. Mjez druhim jemu wumjetowachu, zo je swój čas jako wyši měšćanosta New Yorka rasistiske policajske taktiki spěchował a žony diskriminował. Senatorka Elizabeth Warren rjekny hladajo na Bloomberga a prezidenta Donalda Trumpa: „Nima zmysła, arogantneho miliardara z runje tajkim narunać.“
Thunberg da pjenjezy załožbje
Stockholm (dpa/SN). Klimowa aktiwistka Greta Thunberg chce pjenjezy Alternatiwneho Nobeloweho myta za natwar swojeje załožby wužiwać. Milion šwedskich krónow (něhdźe 94 500 eurow) jej zmóžnja wutworić „Greta Thunberg & Beata Ernman Foundation“, kaž w Stockholmje zdźělichu. Srědki budu jako startowy kapital za załožbu wužiwane a pozdźišo wotpowědnje zaměram załožby dobroćelskim skutkam přepodate. 17lětna bě kónc januara připowědźiła, zo chce ze swojej sotru Beatu Ernman załožbu do žiwjenja zwołać.
Mjenje nowych infekcijow
Jědnaće mortwych
Krute jednanja
Röttgen chcył wurjadny zjězd CDU
Berlin (dpa/SN). W debaće wo nowe nawodnistwo CDU wočakuje požadar Norbert Röttgen spěšne rozrisanje. „Bychmy dyrbjeli wurjadny stronski zjězd hišće do lětnjeje přestawki zwołać, najpozdźišo w juniju, radšo w meji“, rjekny wonkowny politikar a bywši zwjazkowy minister za wobswět nowinarjam. Zdobom wospjetowaše wón swoje žadanje, zo měli so čłonojo CDU woprašeć. „Sym stajnje za woprašowanje čłonow był a sym to tež dźensa. To je móžno, bjeztoho zo so naležnosć do dołhosće ćehnje.“ Röttgen w tym zwisku potwjerdźi, zo měł předsyda CDU zdobom kanclerski kandidat strony być.
Woprašowanje čłonow nastupajo předsydstwo CDU móhło k napjatosćam w stronje wjesć. Wodźacy čłonojo chcyli rozrisanje prašenja „w mustwje“. Röttgen widźi to skeptisce, ćim bóle, dokelž njeje jasne, kak měło tajke teamowe rozrisanje wupadać. Jenož Norbert Röttgen je swoju kandidaturu oficialnje připowědźił. Friedrich Merz, Armin Laschet a Jens Spahn njejsu so dotal jasnje wuprajili.
Projekt za sylnjenje regionow
Braniborske knježerstwo chce koordinatorow zasadźić
Podstupim (dpa/SN). Braniborske knježerstwo chce z pjeć koordinatorami a dalšimi sobudźěłaćerjemi na městnje regiony w kraju sylnić. Wažne projekty w městach a gmejnach chcedźa sej woni wuzwolić a partnerow mjez sobu zwjazać, praji nawodnica statneje kenclije Kathrin Schneider w Podstupimje. Schneider je krajnemu knježerstwu wotpowědny koncept předstajiła. Mjez druhim dźe wo projekty we wobłukach mobility, bydlenja, socialneje infrastruktury a škita klimy. Tež strukturnu změnu we Łužicy w zwisku ze skónčenjom zmilinjenja brunicy chcedźa aktiwnje podpěrać a pohonjeć.
Za to pjeć tak mjenowanych planowanskich zjednoćenstwow Habolski kraj-Fläming, Łužica-Błóta, Kraj nad Wódru-Sprjewja, Prignitz-Hornja Habola a Uckermark-Barnim zarjaduja. „Wone sahaja kaž kuski torty wot krajneje mjezy k Berlinej po wšěm kraju hač k wonkownym mjezam Braniborskeje“, Kathrin Schneider rozłožuje. Tak maja wšu Braniborsku na wobzoru za „strukturnu politiku z jedneje ruki“.
To a tamne (20.02.20)
Listowu wobalku pjenjez stej Šwicarce namakałoj, po tym zo běštej zawkaj za zahrodowe stólcy kupiłoj. Kuwert z 19 000 eurami tčeše mjez zawkomaj, do folije zapakowanymaj. Žonje zdźělištej namakanku policiji, a ta zwěsći, zo pochadźeja pjenjezy ze zawostajenstwa zemrěteje. Jeje potomnicy běchu zawkaj po wurumowanju chěže socialnej słužbje přewostajili. Dźowka zemrěteje přewostaji žonomaj nimale 3 000 eurow.
Na wšě dźesać bilionow eurow je dźěłowy zarjad šuli w Frechenje pola Kölna přepokazać chcył, zwjazkowy dźěłowy zarjad pak přepokazanku zadźerža. Poprawom měješe šula sto eurow dóstać, kotrež běchu jako pomoc na dobro šulerja za rjadownisku jězbu myslene. W tym zwisku bě drje k misnjenju dóšło. Kak je ze 100 na kóncu 10 000 000 000 000 nastać móhło, to nětko pruwuja.
Zakładnu rentu schwalili
Berlin (dpa/SN). Po měsacy trajacej zwadźe zmóžnja zwjazkowe knježerstwo nětko planowanu zakładnu rentu za mało zasłužacych. Zwjazkowy kabinet je dźensa wotpowědny naćisk ministra za dźěło Hubertusa Heila (SPD) schwalił. Něhdźe 1,3 miliony ludźi ze snadnej rentu maja wot klětušeho připłatk k renće dóstać, hdyž su znajmjeńša 33 lět přinoški płaćili. Do toho chcedźa pruwować, hač su ludźo woprawdźe potrěbni.
Wukrajna misija podlěšena
Berlin (dpa/SN). Zasadźenje němskich wojakow w Afghanistanje podlěša wo dalše lěto, ličba wojakow pak wostanje na najwjace 1 300 wobmjezowana. Zwjazkowe knježerstwo je dźensa wotpowědny naćisk schwaliło a podlěšenju misije hač do 31. měrca 2021 přihłosowało. Zwjazkowa wobora wobdźěla so w Afghanistanje na wukubłanskej misiji NATO „Resolute Support“. Zwjazkowy sejm ma dokumentej hišće přihłosować.
Rusku Chinjanam zawrěli
