Rjane słónčne wjedro hač do jutrownički je k tomu wjedło, zo su ...
Rucemyće přećiwo wirusej hižo wjele pomha
Düsseldorf (dpa/SN). Fachowc za škit před infekcijemi Martin Exner z Bonna je wuznam hygieniskich naprawow přećiwo koronawirusej wuzběhnył. Wirus móže na płoninach dołhi čas přežiwić, rjekny wědomostnik kónc tydźenja w Düsseldorfje, hdźež je mjezywuslědki wulkopřepytowanja ke koronapandemiji rozłožił. Přewjedli běchu studiju we wosebje potrjechenym wokrjesu Heinsberg w Sewjerorynsko-Westfalskej. Zo móže infekcija wudyrić, dyrbi so wirus přez slinowki do čłowječeho ćěła dóstać – kaž přez hubu abo woči. Je tuž wažne, zo wobydlerjo nawuknu, z tajkimi strachami wotpowědnje wobchadźeć.
Dokładne rucemyće z mydłom wiry wotstronja a je tak „deaktiwuje“, rjekny direktor instituta za hygienu a strowotu ludźi. To drje banalnje klinči, je pak přiwšěm wažne, zo ludźo tajke hygieniske naprawy zwučuja.
Hłownje so wirus přez infekciju kapkow rozšěrja, na přikład při kašlowanju. Tohodla je absolutnje trěbne w chorownjach škit za nós a hubu nosyć.
Znowa wjac schorjenych
Drježdźany/Podstupim (dpa/SN). Ličba na koronawirusu schorjenych je w Sakskej přez jutry dale stupała. Wčera wozjewi sakske strowotniske ministerstwo 3 802 inficěrowaneju. Tak je ličba w běhu 24 hodźin wo 38 wosobow přiběrała. Mjeztym je 69 ludźi na chorosći Covid-19 zemrěło. Wjac hač 13 procentow schorjenych lěkuja tuchwilu w sakskich chorownjach. Něhdźe 1 880 pozitiwnje testowanych wosobow pak je hižo wustrowjenych. Mjeztym wujewi so wokrjes Šwikawa jako ćežišćo w Sakskej, hdźež pandemija chětro zachadźa. Jeničce tam maja cyłkownje 616 registrowanych padow, po tym sćěhujetej měsće Drježdźany (491) a Lipsk (483).
W Braniborskej wozjewichu wčera 2 075 ludźi, kotřiž su na koronawirus schorjeli. W běhu 24 hodźin je so ličba wo 102 padaj zwyšiła. Dotal je 59 wosobow zemrěło. Přiwšěm skedźbnja braniborske strowotniske ministerstwo na to, zo njejsu zarjady wokrjesow a městow wšědnje aktualne ličby wozjewili. Tuž móhło so tu a tam hišće něšto změnić.
Šule krok po kroku wotewrěć
Wědomostna akademija Leopoldina konkretne naprawy doporučiła
Berlin (dpa/SN). Do rozsudnych rozmołwow zwjazkoweje kanclerki Angele Merkel (CDU) z ministerskimi prezidentami krajow, kotrež su jutře předwidźane, sej dale a wjac politikarjow žada, tuchwilne wobmjezowanja pomjeńšić. Nawodnistwo Zelenych Annalena Baerbock a Robert Habeck wuprajitaj so za to, šule a pěstowarnje krok po kroku zaso wotewrěć. Přiwšěm měli so tam škitne naprawy dodźeržeć. Zwjazkowa ministerka za kubłanje Anja Karliczek (CDU) je mjeztym wuzběhnyła, zo měli w zjawnosći škit za hubu a nós wužiwać. Narodna wědomostna akademija Leopoldina je wčera realistiske časowe plany za přechod wróćo do normality wozjewiła. Tež wědomostnicy měnja, zo měli šule bórze zaso přistupne być. Prěnjotnje měli zakładne šule kaž tež delnje a srjedźne schodźenki wotewrěć. Nimo toho mjenowaše Leopoldina wuměnjenja, kak móhło zjawne žiwjenje relatiwnje normalnje wotběžeć. Ličba na koronawirusu schorjenych měła niska wostać. Chorownje měli dosć rezerwow wutworić, zo móhli pacientow lěkować.
To a tamne (14.04.20)
Koronawirus nuzuje tež fararjow k njewšědnym naprawam. Katolski farar w Michiganje je z małkej pistolu, pjelnjenej z wodu, jutrowne korbiki wosadnych žohnował. Wěriwi přijědźechu sobotu ze swojimi awtami k cyrkwi w Detroiće, hdźež jich duchowny ze škitom za hubu a nós a rukajcami přija. Z wěsteho wotstawka žohnowaše wón z pomocu pistole korbiki w awtach. Na Facebooku chwaleše sej žona akciju a měnješe, zo lubuje, kak tradicije časam přiměrjeja.
Dokelž njeje muž zawrjenych hotelow koronakrizy dla hižo žane přenocowanske móžnosće w Erfurće našoł, je so do kófroweho ruma swojeho awta lehnył. Mylnje pak je so zapadak kruće zawrěł. Štyri hodźiny bě 18lětny młodostny w kófrowym rumje popadnjeny, doniž jeho pasantka njewusłyša a policiju njezawoła.
Greenpeace za demonstracije
Berlin (dpa/SN). Wobswětoškitna organizacija Greenpeace šwika njepřiměrjene wobmjezowanje zhromadźowanja a demonstracijow w času koronakrizy. „Politiske wobdźělenje je tež w časach korony njeparujomne. Přez lětdźesatki zrosćene formy demonstracijow, kaž jutrowne pochody, kompletnje zakazać rani prawo zhromadźowanja“, rjekny fachowča Greenpeace, juristka Anna von Gall, w Berlinje. „Stat ma so wo to starać, zo su demonstracije móžne.“
Guterres zakituje WHO
New York (dpa/SN). Generalny sekretar UNO António Guterres je Swětowu strowotnisku organizaciju (WHO) napřećo kritice prezidenta USA Donalda Trumpa zakitował. „Sym přeswědčeny, zo dyrbimy WHO dale podpěrać, dokelž ju w boju přećiwo koronawirusej nuznje trjebamy“, wuzběhny Guterres wčera w New Yorku. „Kaž su tysacy sobudźěłaćerjow swój čas přećiwo eboli wojowali, zasadźeja so nětko přećiwo rozpřestrěću koronawirusa.“ Trump bě WHO zaprajenje wumjetował a hrozył, přinoški kraja za nju njepłaćić. Witaja žnjowych pomocnikow
Ludźo ze škitom za nós a hubu na tydźenskich zelenych wikach w ...
Fabritius: Škit mjeńšin w EU lěpje rjadować
Berlin (dpa/SN). Społnomócnjeny zwjazkoweho knježerstwa za prašenja přesydlencow a narodne mjeńšiny prof. dr. Bernd Fabritius wita iniciatiwu delnjosakskeho krajneho knježerstwa, zamołwitosće na dobro koordinowaneho škita mjeńšin na europskej runinje koncentrować. Zaměr namjeta je, efektiwitu europskeje mjeńšinoweje politiki z jasnje přirjadowanymi zamołwitosćemi we wobłuku komisije EU polěpšić.
W lisće Helenje Dalli, komisarce za runoprawosć w Europskej komisiji, Bernd Fabritius namjetuje, zamołwitosće za naležnosće mjeńšin w EU zesylnić. Tak hodźało so tež wažne dźěło lěpje hódnoćić, kotrež narodne mjeńšiny ke kulturnej a rěčnej mnohotnosći Europy přinošuja.
Zwjazkowy społnomócnjeny měni, zo je „kmańša mjeńšinowa politika na europskej runinje tež w zajimje čłonskich statow, kaž Němskeje“. Wón by tuž jara witał, by-li komisija EU „zamołwitosće za mjeńšinowe naležnosće wobsahowje a organizatorisce koncentrowała, najlěpje w rukach jeno za to přisłušneho komisara“.
Bjeru nowe kredity korony dla
Drježdźany (dpa/SN). Sakski krajny sejm je dźensa financny plan knježerstwa schwalił, zo hodźała so koronakriza zmištrować. Kraj chce za to prěni króć po lěće 2006 zaso nowe kredity brać. Zapósłancy dyrbjachu z wjetšinu dweju třećinow wosebite nuzowe połoženje zwěsćić, zo móhło knježerstwo we wustawje zakótwjeny zakaz nowych kreditow zběhnyć. Za to hłosowali su nimo koalicije tež zapósłancy opoziciskeju frakcijow AFD a Lěwicy.
Knježerstwo CDU, Zelenych a SPD bě so minjeny tydźeń na to dojednało, zo sej Sakska kredity šěsć miliardow eurow wobstara. Pjenjezy chcedźa zhromadnje z nalutowankami 725 milionow eurow jako wosebity fonds za sćěhi korony zapołožić a tak wot regularneho etata kraja dźělić. Zličbowanski zarjad ma to za kritiske, kaž do posedźenja rěkaše.
Posedźenje Drježdźanskeho krajneho sejma bě tež wonkownje njewšědne. Prěni króć njeje so parlament w swojim domicilu schadźował, ale w susodnym Kongresowym centeru, hdźež bě mjez 119 zapósłancami wjace městna. Žurnalisća dyrbjachu sej hubu a nós škitać.
Krok po kroku k normaliće
Ministerscy prezidenća chcyli wo tym po jutrownych prózdninach rěčeć
Berlin (dpa/SN). Hladajo na prěnje wuspěchi při wobmjezowanju koronawirusa w Němskej ma strowotniski minister Jens Spahn za móžne, statnje wukazane wobmjezowanja zjawneho žiwjenja po jutrownych prózdninach z „kedźbliwymi kročelemi“ zaso zběhnyć. Dyrbjało-li mjenje nowych infekcijow być, „budźemy z ministerskimi prezidentami wo poněčimnym nawróće k normaliće po jutrownych prózdninach rěčeć móc“, rjekny politikar CDU Berlinskim žurnalistam. W swobodnym prawniskim staće daloko sahace wobmjezowanja zjawneho žiwjenja jenož tak dołho funguja, dołhož to ludźo rozumja a akceptuja. Tohodla njeje jenož wažne, naprawy derje wopodstatnić, ale tež perspektiwy pokazać. Hladajo na ličby nowych natyknjenjow Jens Spahn zwurazni: „Widźimy pozitiwne wuwiće. Te pak dyrbi dale trać.“ Wažne při tym je, zo so ludnosć tež po jutrach na naprawy k wobmjezowanju wšědneho dnja dźerži.
