To a tamne (28.04.20)
Z wulkimi a nadměrnymi kłobukami na hłowje chcedźa wuknjacy zakładneje šule w chinskim měsće Hangzhou socialny wotstawk dodźeržeć pomhać. Pisane, meter wulke kłobuki běchu sej dźěći z pomocu staršich doma same zhotowili. We wuchodochinskim měsće z dźewjeć milionami wobydlerjow su po 99 dnjow trajacej přestawce koronawirusa dla šule zaso wotewrjene.
Hišće hač do lěća chcedźa Lipšćanske dźiwadłowe dźěłarnje škit za hubu a nós produkować. Hač do julija móhło jich tak 46 000 hromadu přińć, přiwšěm so šwalče nadźijeja, zo móža so potom zaso swojemu poprawnemu dźěłu wěnować a kostimy za přichodnu hrajnu dobu šić. Dźěłarnje běchu w měrcu po zawrjenju hrajnišćow koronapandemije dla započeli tajke škitne srědki zhotowjeć.
Etikowy kodeks wozjewili
Vatikan (B/SN). Bamž Franciskus žada sej etiske měritka za nowe medije. Tohodla je kónc februara etikowy kodeks ke kumštnej inteligency wozjewił. Zapisane su w nim zasady, kotrež maja zaručić wužiwanje digitalneje technologije na dobro čłowjestwa. Tak měli systemy transparentne, njestronske, spušćomne a wěste być. K prěnim podpisarjam słuša prezident předewzaća Microsoft Brad Smith.
Hospodarstwo wuchować
Dortmund (B/SN). Předsyda banki cyrkwje a diakonije (KD) Ekkehard Thiesler žada sej wuchowanski škit za socialne hospodarstwo. Mnohe wobłuki hospodarstwa koronakriza wohroža, dokelž njejsu aktualnje pod wuchowanskim škitom. Podpěruja so jeno socialne słužby. „Tuchwilu mnohe wukubłanske a kwalifikaciske naprawy, poskitki za socialne kupnicy abo zetkanišća a wažne ambulantne poskitki móžne njejsu. KD-banka je drustwowa banka ze 4 200 sobustawami, kotraž je za potrěbnych wosebite financowanje w času korony zarjadowała. Tak přewostaja po jednorym puću a krótkodobnje kredity hač do miliona eurow.
Pozbudźa k zmužitosći
Minister Piwarz spokojom
Drježdźany (dpa/SN). Do nowych wuradźowanjow wo dalšim wotewrjenju šulow w tuchwilnej koronakrizy je sakski kultusowy minister Christian Piwarz pozitiwny facit dźělneho znowazahajenja šulskeje wučby sćahnył. „Sym jara spokojom, kak je prěni tydźeń tu w Sakskej wotběžał, rjekny politikar CDU dźensa w rańšim magacinje telewizije ARD. Maturu nastupajo njeje so porno lětu 2018/2019 ničo změniło, wón rjekny. Njejedna so tuž wo „nuzowy abi“.
Hoberske wudawki za brónje
Stockholm (dpa/SN). Nawjedowane wot najsylnišeje wojerskeje mocy USA su kraje swěta loni nimale dwaj bilionaj dolarow do zakitowanskich systemow inwestowali, kaž šwedski institut za měrowe slědźenje Sipri zwěsća. Po jeho trochowanju su kraje po wšěm swěće na wšě 1,917 bilionow dolarow (1,77 bilionow eurow) za brónjenje wudali, štož je 3,6 procentow wjace hač w lěće 2018. To wotpowěduje 2,2 procentomaj wšoswětoweho nutřkokrajneho bruttoprodukta a 230 eurow na wobydlerja swěta.
Italska naprawy zběhnje
We wšěch třoch twornjach čěskeho awtotwarca Škoda – kaž tule ...
UNO: Žurnalisća koronakrizy dla nadběhowani
Zawrjena mjeza wulka běda
Halle/Podstupim (dpa/SN). Sakski ministerski prezident Michael Kretschmer (CDU) so zawrjeneje němskeje-pólskeje mjezy dla jara starosći. „Je to wulka běda, kotraž so tam stawa. Sym sej wěsty, zo pólske knježerstwo přehnawa. EU je docpěła, zo njejsu mjezy kónc hospodarskeho a žiwjenskeho ruma. Na to su so ludźo w regionje zwučili a jězdźa tam a sem, zo bychu tu dźěłali a bydlili. Rigorozne zawrjenje mjezow koronakrizy dla pak wulku nuzu zawinuje“, rjekny Kretschmer powěsćerni dpa.
Kretschmerowy braniborski kolega w zastojnstwje Dietmar Woidke (SPD) je Pólsku tohorunja prosył, „zběhnyć razne wobmjezowanja za powołanskich dojězdźowarjow, kotřiž w Němskej dźěłaja. To dyrbjało tež w zajimje Pólskeje być, přetož jeje staćenjo zawrjeneje mjezy dla najbóle ćerpja.“ Pólska bě srjedź měrca swoju mjezu zawrěła. Dojězdźowarjo dyrbja po nawróće do dwutydźenskeje karanteny. W Zhorjelcu su minjeny pjatk na woběmaj bokomaj mjezy přećiwo jeje zawrěću protestowali.
Regionalne rozdźěle korony
Šef kanclerskeho zarjada ćehnje mjezybilancu nastupajo pandemiju
Berlin (dpa/SN). Kanclerski zarjad je so wuraznje za to wuprajił, na koronakrizu po regionach rozdźělnje reagować. Při přepruwowanju naprawow w krajach „dyrbjeli wobkedźbować, zo so pandemija w Němskej runostajnje njerozšěrja, ale zo móže połoženje regionalnje jara rozdźělne być“, piše šef kanclerskeho zarjada Helge Braun (CDU) w mjezybilancy naprawow přećiwo koronawirusej zapósłancam wulkeje koalicije CDU/CSU a SPD. Dokument powěsćerni dpa předleži. „To móže rěkać, zo dyrbja wobmjezowanja wšědneho žiwjenja we wěstych kónčinach dale wobstać abo so po nachwilnym wolóženju samo hišće přiwótřić“, piše Braun, kiž je sam lěkar. Něšto dnjow do přichodneje telefoniskeje konferency zwjazkoweje kanclerki Angele Merkel (CDU) z ministerskimi prezidentami zwjazkowych krajow přichodny štwórtk Braun potwjerdźi, zo epidemimija dale traje. „Zo bychmy w zajimje wšeho wobydlerstwa přećeženju strowotniskeho systema dołhodobnje zadźěwali, je hišće přezahe kontaktne wobmjezowanja zaso zběhnyć.“
Nowy termin
To a tamne (27.04.20)
Stara a jednora šijawa je so w hornjobayerskim Morsbachu wo rjany podawk postarała. Wobsedźer nastroj wjace njetrjebaše a wotstaji jón na kromu puća jako dar. Zo bě mašinu něhdy jako schow pjenjez wužiwał, je 56lětny dawno zabył. 21lětny wza šijawu sobu domoj a namaka w njej tysac eurow. Dokelž wobsedźerja njeznaješe, prošeše policiju wo pomoc, a ta 56lětneho wuslědźi, kiž bě telko sprawnosće dla hnuty.
Pjany kolesowar je so w Zhorjelcu dowěrliwje na zastojnikow Zwjazkoweje policije wobroćił. Zastojnicy běchu w nocy na njedźelu wobkedźbowali, zo 20lětny chětro chabłajo po dróze jědźe. Prjedy hač móžachu jeho zadźeržeć, muž pola nich zasta a so přećelnje wopraša: „Móžeće mje domoj dowjezć?“ Woni pak wzachu jeho sobu na policajsku stražu, hdźež je test alkohola 1,8 promilow wunjesł.
Ličby dale přiběraja
Berlin (dpa/SN). Po najnowšich informacijach Roberta Kochoweho instituta je so po cyłej Němskej mjeztym wjace hač 150 000 ludźi z koronawirusom natyknyło. To je 2 340 wjace hač wčera. Ličba na wirus zemrětych je na 5 321 rozrostła. 107 000 ludźi je chorosć přetrało. Institut z toho wuchadźa, zo je woprawdźita ličba potrjechenych wo wjele wjetša. Wosebje wjele padow korony maja w Bayerskej, Sewjerorynsko-Westfalskej a Badensko-Württembergskej.
Poslednje lětadło přilećało
Kapstadt/Berlin (dpa/SN). Dobre pjeć tydźenjow po zahajenju akcije nawróta němskich turistow z wukraja, kotřiž njemóžachu so koronapandemije dla hižo sami nawróćić, je poslednje lětadło přilećało. Wot wonkowneho ministerstwa skazana mašina je wčera wječor w južnoafriskim Kapstadće z něhdźe 300 pasažěrami wotlećała. Bě to najwobšěrniša akcije toho razu w němskich stawiznach. Němske wulkopósłanstwa po wšěm swěće staraja so hišće wo někotre jednotliwe pady. Cyłkownje 240 000 ludźi su z lětadłami wróćo do domizny přiwjezli.
Konjunkturny paket schwaleny
