Berlin/Washington (dpa/SN). Němski wonkowny minister Heiko Maas (SPD) chce na swojim prěnim wopyće w USA wo atomowym zrěčenju z Iranom rěčeć. To připowědźi wón wčera na wjeršku G20 w Buenos Airesu. Najebać najnowše hroženja USA pak chcył Maas dotalnu liniju­ Europskeje unije wobchować. „Za nas­ njeje so w tej naležnosći ničo změniło.“ Zrěčenje wotpowěduje po jeho słowach wěstotnym zajimam Němskeje a wšeje Europy.

Nowy wonkowny minister USA Mike Pompeo bě wčera razne sankcije přećiwo Iranej připowědźił. „Kałač sankcijow budźe jara bolostny“, wón rjekny. Pompeo žadaše sej cofnjenje iranskich jednotkow ze Syriskeje, kónc podpěry ra­dikalnych skupin na Bliskim wuchodźe a kónc produkcije urana. Iran je mjeztym připowědźił, zo njeda sej wot USA předpisać, što ma činić a što nic.

Berlin (dpa/SN). Hladajo na dźeń a wyše wudawki hladanskeho zawěsćenja je po słowach zwjazkoweho ministra za strowotnistwo Jensa Spahna (CDU) njewobeńdźomne přinoški zwyšić. Je wšak trjeba, zo towaršnosć hladanja potrěbnych a jich přiwuznych hišće lěpje podpěruje, rjekny Spahn minjeny pjatk w zwjazkowym sejmje. Tohodla ma so wón po zasadźe: „Přidatne wukony tež přidatnje płaća.“ Tak dóstanu na demencu schorjeni lěpšu pomoc. Hladajo na to měło so sprawnje rjec, zo drje dyrbja popłatki za hla­danske zawěsćenje zwyšić, najpozdźišo klětu. Spahn rěčeše wo přidatnymaj „znajmjeńša 0,2 procentomaj“.

Pozadk je, zo hladanske zawěsćenje dźeń a wjace pjenjez wudawa, tež reformy hladanja w minjenej wólbnej dobje dla. Hladanske kasy wočakuja tuž při­datne wudawki dweju miliardow eurow a deficit dohromady třoch miliardow.

Njejasnosće knježa w koaliciji dale wokoło­ planow Spahna, nalutowanki zakon­skich chorobnych kasow we wob­jimje wjacorych miliardow eurow wot­twarić. Pjenjezy móhli za zarunanje wyšich wudawkow wužiwać, Spahn měni.

Ćeknjena wopica je na mjezynarodnym lětanišću w měsće San Antonio w staće USA Texasu wotběhi chětro přemjetała. Pawian bě při wukładowanju ze swojeje transportneje kisty ćeknył. Wulkemu mustwu pomocnikow coowa w San An­to­niju a sobudźěłaćerjam lětanišća so skónčnje poradźi wopicu do kuta ćěrić, hdźež ju z třělbu pohłušichu. Wona bě po puću do texaskeho zwěrjenca.

Z klučowym trikom su policisća ćěka­ceho muža na policajsku stražu wabili a jeho tam zajeli. Do toho bě jim 41lětny přez třěšne wokno twochnył, jako chcychu jeho zastojnicy z třomi wukazami zajeća w ruce wotwjesć. Dachu tuž zamk duri jeho bydlenja wuměnić a připrawichu pokiw, zo móže sej nowy kluč na policajskej straži wotewzać. A woprawdźe: Muž so tam přizjewi a dósta kluč, ale tež nóclěh w celi policajskeho rewěra.