Washington (dpa/SN). Wot USA jednostronsce wukazane cła na wocl a alu­minij z Europy wot dźensnišeho płaća. Na importy žadaja sej USA nětko 25 procentow pola wocla a dźesać procentow na aluminij. To samsne płaći za importy z Kanady a Mexika. Zwjazkowe knježerstwo ma cła za njezakonske, kaž jeho rěčnik­ Steffen Seibert zdźěli.

Hospodarski minister Peter Altmaier (CDU) je mjeztym raznu reakciju EU připowědźił. Zwjazk němskeje industrije kritizuje, zo Trump wuwiće transatlantiskeho partnerstwa wo lět­dźe­satki wróćo ćisnje. „Bjezkompromisne postupowanje Trumpa je krótkowidne a jemu samomu na škodu“, rjekny prezident zwjazka Dieter Kempf. Francoski prezident Emmanuel Macron ma cła za „ilegalne“.

Brüssel (dpa/SN). Němska budźe zepěranišćo noweho komanda NATO. Po informacijach powěsćernje dpa su so čłonske staty aliancy doskónčnje na to dojednali, we wobłuku noweho brónjenja přećiwo Ruskej planowany hłowny kwartěr komanda za spěšne přepołoženje wojakow a materiala w badensko-württembergskim Ulmje zasydlić. Tamniša kaserna je hižo dźensa sydło multinarodneho nawoda krizowych zasadźenjow po wšěm swěće. Oficialnje chcedźa rozsud kónc přichodneho tydźenja na zetkanju zakitowanskich ministrow NATO w Brüsselu wozjewić. Ze zesylnjenjom swojich strukturow reaguje NATO na postupowanje Ruskeje, kotrež ma zapadny wojerski zwjazk za agresiwne. Předewšěm wuchodoeuropscy čłonojo čuja so wohroženi.

Straßbourg (dpa/SN). Europske sudnistwo za čłowjeske prawa je Rumunsku a Litawsku zasudźiło, dokelž buchu na statnym teritoriju wobeju krajow w tajnych jastwach ameriskeje tajneje słužby CIA čłowjeske prawa wospjet ranjene. Zamoł­wići we woběmaj krajomaj su wo wo­nych jastwach wědźeli a najebać to z wonkownej tajnej słužbu USA hro­madźe dźěłali, sudnicy w Straßbourgu zdźělichu. Z tym su hrožace ranjenja čłowjeskich prawow ćerpjeli.

Skóržbu zapodałoj běštaj bjezstatny Palestinjan a muž ze Sawdi-Arabskeje. Wobaj twjerdźeštaj, zo buštaj w tajnych jastwach čwělowanaj. Mjeztym sedźitaj w dwělomnym jastwje USA Guantánamo na Kubje. Palestinjanej wumjetuja, zo je nadpady na World Trade Center w New Yorku 11. septembra 2001 sobu přiho­tował. Muž ze Sawdi-Arabskeje je pječa atentaty na łódźe přewjedł.

Sellin (dpa/SN). Z 1 900 kilometrow dołhej jězbu wot Rujanow hač k Bodam­skemu jězorej chcedźa přirodoškitarjo a kolesowarjo na trěbny škit němskich alejow skedźbnić. Po informacijach přirodoškitneho zwjazka BUND, kotryž dźensa so zahajacu jězbu sobu organizuje, je wulki dźěl starych alejow w při­běrajcy špatnym stawje. Někotre su drje rjane a derje hladane, druhe porno tomu su „sadźane a zabyte“, rjekny zamołwita sobudźěłaćerka Katharina Dujesiefken.

Jězba, kotruž zahajichu dźensa rano w Sellinje, powjedźe wobdźělnikow hač do 15. junija mjez druhim wot Mecklenburgsko-Předpomorskeje přez Braniborsku hač do Bayerskeje a Badensko-Württembergskeje. Při tym chcedźa so kole­sowarjo nadrobnje wo stawje němskich alejow wobhonić.