To a tamne (02.06.17)
Twarožk z wanilku abo lód z kuskami mjasa dadźa sej najlubši přećeljo čłowjeka – psy – nětko pola Giuseppy Cimina słodźeć. W jeho Rastattskej lodarni móža sej wobsedźerjo psow nětko za sebje kaž tež za swojeho štyrinohača słódny lód kupić. Tón dóstanje zmjerzlinu we wotpowědnym nopašku, kotryž móže hač do dna porjadnje wulizać.
Žorta dla dyrbješe indiska swójba bjez nana z jězbu do madźarskeho Budapesta pokročować. Na Mnichowskim lětanišću při wěstotnej kontroli wón mjenujcy rjekny, zo ma jeho mandźelska rozbuchlinu při sebi, štož wězo wěrno njebě. Byrnjež swoje hłupe přispomnjenje na to wospjet wobžarował, su jeho nablaku zaso wróćo do Mumbaja pósłali.
Forum z 12 000 wobdźělnikami
Pětrohród (dpa/K/SN). W duchu wožiwjaceje so konjunktury zahajichu dźensa w ruskim Pětrohrodźe Mjezynarodny hospodarski forum. Na třidnjowskej konferency wobdźěla so nic mjenje hač 12 000 ludźi, mjez nimi rjad ministrow a předewzaćelow z wukraja. Hosćićel foruma je Indiska. Z Němskeje je bayerski ministerski prezident a šef CSU Horst Seehofer pódla. Jutře porěči na najwažnišim hospodarskim zarjadowanju kraja prezident Wladimir Putin.
Němska a China zhromadnje
Berlin (dpa/SN). Němska a China chcetej w globalnych prašenjach swobodneho wikowanja, škita klimy a wěstoty wušo hromadźe dźěłać. Na to staj so zwjazkowa kanclerka Angela Merkel (CDU) a chinski ministerski prezident Li Keqiang dojednałoj. Dalše wuše zwiski mataj wobaj politikarjej za trěbny zakład, zo by wjerškowe zetkanje G 20 najwažnišich industrijnych a prohowych statow spočatk julija w Hamburgu wuspěšne było.
Swójskich wojakow morili
Tezowu papjeru su demonstranća před Durinskim krajnym sejmom w ...
Wotsuwanja jednotliwje pruwować
Wo pjenjezach mjez Zwjazkom a krajemi
Dobre styki bytostne
Zakaz alkohola ma pomhać
Město Choćebuz reaguje na přiběrace problemy w scenowych kónčinach
Choćebuz (dpa/SN). Město Choćebuz njewě sej hinak pomhać: Wino, piwo, palenc a dalše alkoholiske napoje su wotnětka w dźělach nutřkowneho města w zjawnosći zakazane. Wotpowědny zakaz je wot dźensnišeho płaćiwy, najprjedy raz hač do oktobra, a to cyły dźeń.
Hłowna přičina su pohórški wobydlerjow, dokelž dyrbja sej wot wšelakich skupin lózyskosće a samo wohroženja lubić dać. Při tym hraje alkohol wulku rólu. Stajnje zaso dyrbješe policija přijěć, dokelž bě samo k ranjenjam ćěła a wobškodźenjam dóšło.
Miljej pičkow, drogowa scena, młodostni, prawicarscy ekstremisća a migranća – wšitcy so tam zetkawachu, hdźež nětko zakaz města płaći. Wospjet běchu tam namócne rozestajenja, kotrež měrjachu so tež přećiwo wukrajnikam. We wječornych hodźinach bě policija masiwnje prezentna, wosebje w problemowych kónčinach, hdźež je alkohol nětko tabu: Su to měšćanska hala a naměsto před njej, měšćanska promenada podłu měšćanskeje murje, Puškinowy park z promenadu kaž tež areal wokoło statneho dźiwadła.
To a tamne (01.06.17)
Šěsć młodych dypornakow, kotrež běchu prawdźepodobnje staršeju zhubili, su pěšcy w Mönchengladbachu z pomocu wohnjoweje wobory wuchowali. Pasanća běchu w lěsu na kromje města strachoćiwe ćikotanje ze spowróćeneho štoma słyšeli a hnězdo z młodźatami našli. Štyri móžachu sami wućahnyć, dwě wuchowachu wobornicy. Njezranjene dowjezechu wšitke šěsć dypornakow do zwěrjatownje.
Pomocliwaj policistaj staj 18lětnemu w Delnjej Frankskej maturu wuchowałoj. Młody muž bě po puću k pruwowanju z awtom stejo wostał, dokelž bě tank prózdny. Připadnje nimo jěducaj policistaj so na njeho dohladaštaj. Dospołnje blědy jim młody muž rozłoži, zo ma za dźesać mjeńšin pruwowanje. Bjez wahanja jeho zastojnikaj do šule dowjezeštaj a dypkownje wotsadźištaj. Kak je pruwowanje wušło, njeje znate.
„Kongres měł wunošny być“
Rezoluciju za dodźerženje čłowjeskich prawow Sintow a Romow spisali
Najsylniša mjeńšina Europy, Sintojo a Romojo, ćerpi hišće dźensa pod systematiskim a zdźěla namócnym wuhnaćom z městow a sydlišćow.
Z wulkej starosću wobkedźbuje Federalistiska unija europskich narodnych mjeńšin (FUEN) wšelake pady wosebje na juhu a wuchodźe Europy. Tež w Rumunskej, hdźež wotmě FUEN wot 17. do 21. meje swój kongres, su wo tym diskutowali. W Cluju-Napoce bu 17. decembra 2010, tydźeń do hód, 300 Sintow a Romow bjez přizjewjenja a legalneho jednanja z centruma města do sydlišća Pata-Rat na kromje města přesydlenych. Dwaceći lět běchu woni cyle normalnje w měsće bydlili. Sydom lět po tym žiworja přeco hišće w barakach bjezposrědnje při měšćanskej wotpadkowej deponiji. Najebać to, zo je Rumunska rada za přewinjenje diskriminacije měšćanske zarjadnistwo postupowanja dla k pokuće 2 000 eurow zasudźiła, njeje so na połoženju ničo změniło.
