Berlin (dpa/SN). Italska nochce přichodnje žanych migrantow wjace přiwzać, kotřiž we wobłuku wuchowanskeje misije EU „Sophia“ do kraja přińdu. To je italski wonkowny minister Enzo Moavero Milanesi społnomócnjenej EU za wonkowne naležnosće Federice Mogherini zdźělił. Dotal bě Italska předewšěm łódźe nje­knježerstwowych pomocnych organizacijow wotpokazała. Zamołwići ministrojo potrjechenych krajow pytaja nětko za móž­nymi rozrisanjemi. Italski ministerski prezident Giuseppe Conte žadaše sej minjenu njedźelu w lisće prezidentej komisije EU Jeanej-Claudej Junckerej a prezidentej Rady EU Donaldej Tuskej skónčenje misije „Sophia“, na kotrejž so tež Němska wobdźěla. „Njemóže być, zo wšitke łódźe z migrantami awtoma­tisce do Italskeje přijědu“, Conte pisaše.

Washington (dpa/SN). Najebać dale trajacu­ kritiku wjerškoweho zetkanja z ruskim prezidentom Wladimirom Putinom w finskej stolicy Helsinkach dla chce prezident USA Donald Trump šefa Krjemla nazymu we Washingtonje zetkać. Rěčnica Běłeho domu we Washingtonje Sarah Sanders zdźěli, zo je Trump narodneho wěstotneho poradźowarja Johna­ Boltona prosył, Putina do stolicy USA přeprosyć. Trump bě wčera kritiku na wjeršku hišće raz wotpokazał. Na Twitteru wón pisaše: „Wjeselu so na naju druhe zetkanje, zo móhłoj započeć někotre z wjele diskutowanych temow zwoprawdźić.“ Wustupowanja w Helsinkach dla Trumpa samo w rjadach republikanow raznje kritizuja.

Pod łožom před policiju so schował a tam tčacy wostał je muž w durinskim Steinachu. 28lětny dyrbješe zastojnikow prosyć, zo jeho wuswobodźa. Woni tuž łožo nabok sunychu, pytaneho hnydom sputachu a do policajskeho awta pře­wodźachu. Běchu dźě k bydlenju muža přijěli, zo bychu jeho zajeli. Nětko dyrbi 28lětny sydom měsacow wohroženja dla w jastwje wotsedźeć.

Muzej pod wodu maja nětko dwaj kilometraj před pobrjohom Floridy w Mexiskim zaliwje. Zajimcy móža z wotpowědnym nurjenskim wuhotowanjom sydom skulpturow 18 metrow hłuboko wobdźiwać. Je to prěni podwódny muzej USA. Zastup do njeho je darmotny. Wustajene eksponaty ameriskich wuměłcow – tak na přikład propeler, oktopus abo pod­nurjak francoskeho mórskeho slědźerja Jacquesa Cousteawa, ale tež nop – chcedźa kóžde lěto z hinašimi wuměnić.

Ankara (dpa/SN). Před lětomaj w Turkowskej wukazany wuwzaćny staw je nimo. Wón njebu kaž dotal podlěšeny a je so tuž dźensa w 0 hodź. skónčił. Statny prezident Recep Tayyip Erdoğan bě nuzowy staw po pospytanym wojerskim puču w juliju 2016 wukazał a sydom razow­ wo stajnje tři měsacy podlěšił. Za čas mjezynarodnje raznje kritizowaneho wuwzaćneho stawa běchu zakładne prawa kaž prawo zhromadźowanja a nowinarska swoboda, wobmjezowane. Erdo­ğan knježeše z pomocu dekretow.

EU cła wukazała

Brüssel (dpa/SN). Europska unija je dźensa přidatne cła na woclane wudźěłki wuka­zała, zo by europskich producentow před ćežkimi skomolenjemi wikow škitała. Přidatne cła 25 procentow žadaja sej na wšitke importy, kotrež w USA płaćiwych cłow dla přidatnje do EU přińdu. Mjeztym je prezident USA Donald Trump Europskej uniji z hoberskimi chłosta­njemi hrozył, njedyrbjeli-li so jednanja po jeho woli wuwić. Tuchwilu pruwuja, europskim awtam cła napołožić.

Hońtwjer zatřěleny