Moskwa (dpa/SN). Ruski prezident Wladimir Putin je dźensa přisahu za dalšu hamtsku dobu złožił. Na ceremoniju w Moskowskim Krjemlu bě 5 000 hosći prošenych. 65lětny Putin je mjeztym 18 lět na čole najwjetšeho kraja swěta. Je to­ jeho štwórta hamtska doba jako prezident, kotraž traje hač do lěta 2024. Potom dyrbi wón po wustawje zastojnstwo wopušćić. Při prezidentskich wólbach w měrcu bě Putin po informacijach wólbneje komisije rekordny wuslědk 77 procentow hłosow docpěł.

Přewodźane bě zapokazanje do zastojnstwa wot wčerawšich namócnosćow we wjacorych městach, jako poli­cija demonstracije přećiwnikow Putina rozpušći. Při tym zaja wjace hač 1 600 přiwisnikow opozicionelneho Alexeja Nawalneho. Tež wón bu zajaty, je pak mjeztym zaso swobodny a přichodny pjatk na sudnistwo skazany.

Ze spřisahanjom Putina je ruske knježerstwo awtomatisce rozpušćene. Powšit­kownje pak wočakuja, zo budźe Dmitrij Mjedwjedew zaso ministerski prezident.

Praha (ČŽ/K). Hibanje njespokojnych woby­dlerjow ANO premiera w demisiji Andreja Babiša by wólby do sejma do­było, bychu-li so wone jutře wotměli. To wu­chadźa z woprašowanja wolerjow přez agenturu Kantar TNS. Byrnjež mjeńšinowe knježerstwo dotal dowěru par­lamenta njeměło a Babiš sam podhlada překřiwjenja zjawnych pjenjez dla justicnje přesćěhany był, je ANO porno měrcej wo dypk přibyło a 30,5 procentow doc­pěło. Socialdemokraća, z kotrymiž chce ANO knježerstwo wutworić, buchu poskubani. ČSSD zhubi dwaj dypkaj a by na je­nož hišće 6,5 procentow přišła. Komunistam po wšěm zdaću nješkodźi, zo wot­mysla kabinet ANO/ČSSD tolerować, přetož přibychu k nalětnikej połdra dypka a postupichu na wosom procentow. Najsylniši zastupjerjo opozicije bychu ze stajnje 14,5 procentami byli ODS a Piraća, při čimž so wobydlerscy demokraća wo poł dypka a Piraća wo cyły dypk polěpša. Prawicarska SPD Tomija Okamury by do sejma z 8 procentami (+ 0,5) zaćahnyła, STAN z 5,5 procentami (- 0,5) a KDL/ČSL tohorunja z 5,5 procentami (+ 0,5). Něhdy wuznamna TOP 09 by z runje štyrjomi procentami (- 0,5) znowa zwonka parlamenta wostała.

Dokelž bě jimaj pěsk na twarnišću wušoł, staj so twarskaj dźěłaćerjej cyle jednorje na hrajkanišću w delnjofrankskim Kitzingenje posłužowałoj. Mužej sobotu rano z łopaču pěsk do swojeju karow sypa­štaj a wotwjezeštaj jón. Susodźa to wobkedźbowachu a wołachu policiju. Ta namaka pěsk kaž tež dźěłaćerjow na bliskim twarnišću. Pječa bě jimaj šef kazał pěsk z hrajkanišća wzać. Přiwšěm mataj wonaj ličić ze skóržbu padustwa dla.

Za „wuprózdnjenje swojeho žołdka do wašeho awta“ je so maturant pola Stuttgartskeje policije zamołwił. Zastojnicy běchu młodeho muža spočatk meje na nalětnim swjedźenju chětro wopiteho před swjedźenskim stanom ležaceho našli a sobu na stražu wzali. Po puću pak wón w policajskim awće bluwaše. „Móžu sej derje předstajić, kak njepřijomne wam to bě“, šuler w lisće pisaše.

Praha (dpa/SN). W Čěskej su z čuwowym jědom „nowičok“ eksperimentowali. Tole je prezident Miloš Zeman wčera wječor w telewizijnym sćelaku Barrandov zdźělił. Eksperiment běchu loni w nowembru we wojerskim instituće w Brnje přewjedli a při tym snadne mnóstwo jěda syntetisce zhotowili, 73lětny rjekny. Atentatnicy běchu z tutym jědom loni w jendźelskim Salisbury bywšeho ruskeho agenta zajědojćili. Pječa bě Ruska za to zamołwita. Argument Moskwy, zo by tež Čěska tajku maćiznu zhotowić móh­ła, běchu w Praze stajnje wotpokazali.

Allianz do wuhla njeinwestuje

Mnichow (dpa/SN). Najwjetši zawěsćenski koncern Europy Allianz so wot wuhla wotwobroća. Wotnětka nochcedźa hižo wuhlowe milinarnje a jamy zawěsćeć, rjekny šef předsydstwa Oliver Bäte po­wěsćerni dpa w Mnichowje. Tež kapital nochcedźa hižo do předewzaćow inwestować, kotrež z wužiwanjom wuhla zamě­ry Pariskeho klimoweho zrěčenja wohro­žuja, woćoplenje zemje na mjenje hač dwaj stopjenjej wobmjezować.

Wójsko znowa wusměrić