CDU zahaji digitalny wólbny zjězd
Berlin (dpa/SN). Najwuše nawodnistwo CDU je wčera z digitalnymi wuradźowanjemi jutřiše wólby noweho předsydy strony přihotowało.
Internetny stronski zjězd z 1 001 delegatom dźensa nawječor oficialnje zahaja. Potom chcedźa mjez druhim rozžohnowaca so předsydka Annegret Kramp-Karrenbauer, generalny sekretar Paul Ziemiak, předsyda CSU Markus Söder a prezidentka komisije EU Ursula von der Leyen k delegatam porěčeć.
Internetne wólby noweho předsydy CDU su jutře dopołdnja planowane. Nimo sewjerorynsko-westfalskeho ministerskeho prezidenta Armina Lascheta nastupitaj bywši šef frakcije CDU/CSU w zwjazkowym sejmje Friedrich Merz a wonkowny politikar Norbert Röttgen.
Prezidij strony je wčera hišće raz potwjerdźił, zo chce noweho předsydu njewotwisnje wot jeho wosobiny podpěrać. Budyski wokrjesny zwjazk zastupujetaj Roland Ermer a Matthias Grahl.
Wuhibki za CDU stajić
To a tamne (15.01.21)
Londonski Tower je jednoho ze swojich rapakow zhubił. Tak je Britiske kralestwo po legendźe swojemu kóncej wo kročel bliže. „Swojeho lubowaneho rapaka Merlinu njejsmy hižo wjacore tydźenje widźeli. Dyrbimy z tym ličić, zo je zahinył“, z Towera rěka. Nětko je tam hišće sydom rapakow. Po starym přiwěrku trjebaja znajmjeńša šěsć, hewak „króna a wša Wulka Britaniska zańdźetej“. Mjeztym maja samo swójsku plahowarnju rapakow, zo bychu tomu zadźěwali.
Dźěćace narodniny z wjace hač 30 ludźimi je policija w Hamelnje skónčiła. Hosćo spytachu so hišće schować – na nuzniku, w kamorach abo za durjemi. Zastojnicy pak wšěch namakachu a swjedźeń rozpušćichu. Kóždemu z dorosćenych hrozy pokuta hač do 150 eurow. Policiju na ilegalnu party skedźbnił bě susod, kiž pak chce anonymny wostać.
Dalši impeachment zahajeny
Washington (dpa/SN). Po wobsadźenju Kapitola přez swojich přiwisnikow ma amtěrowacy prezident Donald Trump nětko z druhim jednanjom k wotsadźenju ličić. Nimo wšěch demokratow je wčera wječor tež dźesać republikanow za to hłosowało, nowe jednanje „impeachment“ zahajić. Jasne pak je, zo drje hač k zapokazanju noweho prezidenta Joewa Bidena přichodnu srjedu žadyn wuslědk njezměja. Trump je mjeztym we widejowym poselstwje ludźi namołwjał so wujednać a měr wobchować.
Italske knježerstwo zwrěšćiło
Rom (dpa/SN). Wot koronapandemije ćežko potrjechena Italska trjeba nowe knježerstwo. Mała strona Italia Viva bywšeho ministerskeho prezidenta Matteja Renzija je swojeju ministrow z knježerstwa wzała. Tak nima ministerski prezident Giuseppe Conti hižo žanu wjetšinu w Romskim parlamenće. Knježerstwo njebě so na wužiwanje pomocnych srědkow EU k přewinjenju koronakrizy dojednać móhło a je tak zwrěšćiło.
Njewuzamkuje podlěšenje
Nowy sněh minjenych dnjow je wuměnjenja za zymski sport w mnohich ...
Tež lětsa ma abitura być
Industrijaso zhrabała
FDP Kretschmerej najlěpši partner
Drježdźany (dpa/SN). Sakski krajny šef CDU Michael Kretschmer (CDU) ma FDP za najlěpšeho knježerstwoweho partnera unije. Jemu je partner, wo kotrehož so jako byrgarska strona prócuješ, „stajnje FDP“, rjekny ministerski prezident powěsćerni dpa w Drježdźanach. „Po tym dołhi čas ničo njepřińdźe.“
Kretschmer reagowaše na wuprajenje Norberta Röttgena. Kandidat za předsydstwo CDU je hladajo na wólby zwjazkoweho sejma w septembru přećiwo wobdźělenju FDP w nowym knježerstwje. „FDP ma historiske zaprajenje zamołwić, z tym, zo je so po dwěmaj wulkimaj koalicijomaj nowemu započatkej a knježerstwowej zamołwitosći spjećowała“, rjekny Röttgen Augsburgskim nowinarjam.
Hladajo na nowe wužadanja a na zmištrowanje pjenježnych sćěhow koronakrizy trjeba Němska byrgarsku koaliciju, kotraž steji za swobodu a dynamiku, Kretschmer potwjerdźi. „To je z FDP wjele lěpje móžno hač ze Zelenymi abo SPD. Zo kandidat za předsydu CDU liberalnych wuzamkuje, njemóžu rozumić.“
Kritizuja dlijace so šćěpjenje
Wot přichodneje póndźele telefoniske knihowanje termina móžne
Drježdźany (dpa/SN). Šćěpjenje ludźi přećiwo koronawirusej je w Sakskej dosć pomału zaběžało. Dotal je w swobodnym staće hakle 0,7 procentow ludźi prěnju sykawu přećiwo wirusej dóstało. Zwjazkowy kraj drje njeje w přirunanju z tamnymi krajemi wjace posledni, leži pak přeco hišće daloko zady. To wuchadźa z ličbow Roberta Kochoweho instituta. Tak su w Sakskej dotal cyłkownje 29 421 wobydlerjow šćěpili. Najwjace z nich přisłuša lěkarskemu personalej.
Minjene dny dyrbještej so strowotniske ministerstwo kaž tež za natwar šćěpjenskich centrow zamołwity Němski čerwjeny křiž (DRK) za dlijace so zahajenje šćěpjenja a za problemy z internetnym knihowanskim portalom wusprawnić. Wobě instituciji zakitowaštej wospjet saksku strategiju šćěpjenja, wšědnje spochi šćěpić a njepřetrjebać wšitke dozy naraz. Tež telefoniska hotline k rozdawanju šćěpjenskich terminow startuje pozdźišo hač poprawom planowane.
Spušćomny ramik za změnu
Berlin (dpa/SN). Měšćanske zawody žadaja sej wot politiki wjetše napinanja nastupajo energijowu změnu. Po woprašowanju Nowiny komunalneho hospodarstwa maja zawody energijowu změnu a škit klimy za najwjetšej wužadani lěta 2021. Zastupnicy měšćanskich zawodow w časopisu namołwjeja, zo měło so tuž zwjazkowe knježerstwo wažnymaj temomaj wěnować. Tak praji Christian Becker, šef předsydstwa Aachenskich měšćanskich zawodow: „Smy zwólniwi do nowych idejow, do ludźi a nowych technologijow inwestować, trjebamy pak za to spušćomny ramik. Hižo nětko widźimy, zo so trěbne změny předołho dlija a zo so předpisy zdźěla samo spřećiwjeja.
Jednaćel Lipšćanskich měšćanskich zawodow Karsten Rogall přeje sej wot přichodneho zwjazkoweho knježerstwa „dołhodobne stabilne ramikowe wuměnjenja, kotrež nas při zwoprawdźenju energijoweje změny w komunach podpěruja, město toho zo so politika dale na jednotliwe wulkokoncerny spušća.“
Trěbne su płunowe milinarnje k zastaranju ludźi a wuwiwanje wodźikoweje technologije, wón rjekny.
