Dołhi puć k normaliće
Předewzaćam pomoc wupłaćili
Podstupim (dpa/SN). Zo móhli sćěhi zawrjenjow koronapandemije dla lěpje zmištrować, je Inwesticiska krajna banka Braniborskeje (ILB) wjace hač 6 000 předewzaćelam w kraju podpěru wupłaćiła. Mjez nimi je 1 500 tak mjenowanych solo-samostatnych, kotřiž dóstachu hač do 5 000 eurow. Podźěl nowemberskeje pomocy dósta nimo toho 4 300 předewzaćelow, kotřiž běchu próstwu wo podpěru přez portal Zwjazka wotedali.
Cyłkownje je ILB 33 milionow eurow na dobro samostatnych a předewzaćelow přepokazała, najwjace 10 000 eurow. Mjeztym su sumu na 50 000 eurow zwyšili a chcedźa ju woprawnjenym firmam dopłaćić, z čimž chcedźa hišće lětsa započeć. Spočatk januara budźe wobdźěłanje tež internetnje móžne. Šef předsydstwa banki Tillmann Stenger prosy předewzaća wo sćerpnosć. Ručež Zwjazk techniske wuměnjenja wutwori, chcedźa nakopjene próstwy spěšnje wotdźěłać.
Tak mjenowanu nowembersku pomoc wupłaća předewšěm gastronomiskim zawodam, kotrež dyrbjachu zawrěć. Jim zarunaja 75 procentow wobrota, kotryž mějachu w nowembru 2019.
To a tamne (28.12.20)
Pilneho „hodowneho palčika“ su policisća w braniborskim Werderu nad Habolu patoržicu wječor wustróžili. Wobydlerka bě zastojnikow alarmowała, dokelž bě w parkowacym transporteru elektriski šrubowak słyšała. Tukajo na padustwo chwatachu zastojnicy k městnu a nańdźechu w awće 27lětneho, kiž w poslednim wokomiku dary za swójbu pasleše. Zasadźenje skónči so z posměwkom.
Dźesaćlětny hólc je prěni dźeń hód z awtom přiwuzneho po Rotterdamje jězdźił, doniž jeho policist njezadźerža. Zastojnikej bě mały šofer napadnył, kotrehož hłowa lědma nad wodźidło sahaše. Wobsedźer awta na pódlanskim sedle rozłoži, zo je hólc přez hody z Rumunskeje přijěł. Dokelž hižo derje z awtom jědźe, bě wón dźěsću jězbu po měsće popřał. Policija piše, zo so „ničemu wjace njedźiwa“ a zo płaći akcija wobsedźerja 280 eurow.
Trump dojednanje blokuje
Washington (dpa/SN). Amtěrowacy prezident USA Donald Trump je sej polěpšenje na z wulkej wjetšinu w kongresu wobzamknjenym konjunkturnym pakeće koronapandemije dla žadał. Schwalene naprawy mjenowaše wón „hańbu“ a hrožeše, zo zrěčenje we wobjimje 900 miliardow dolarow njepodpisa. Jónkrótne wupłaćenje 600 dolarow na wosobu měło so na 2 000 dolarow zwyšić, sej Trump žadaše. Republikanojo a demokraća běchu so po wobćežnych jednanjach na konjunkturny paket dojednali.
Šoferojo přiběracy hněwni
Dover (dpa/SN). W jendźelskim přistawnym měsće Doveru je k rozestajenjam mjez čakacymi šoferami nakładnych awtow a policiju dóšło. Hněwni šoferojo běchu zastojnikow wuhwizdali a do nich storkali, medije rozprawjeja. Do toho bě Francoska Wulkej Britaniskej zdźěliła, zo smědźa nakładne awta zaso do Francoskej přijěć, maja-li šoferojo negatiwny test na koronu při sebi. Francoska bě njedźelu noweje formy koronawirusa w Jendźelskej dla mjezy zawrěła.
Žane přechwatane šćěpjenje
Něhdźe 50 000 protestowacych je sej wčera w armenskej stolicy ...
Přidatne pjenjezy za kulturu
Berlin (SN). K zesylnjenju kulturneho spěchowanja wot skónčenja zmilinjenja brunicy potrjechenych kónčin chce zwjazkowe knježerstwo 20 wot Zwjazka spěchowanym institucijam a projektam klětu wjace hač 21 milionow eurow přidatnje přewostajić. Hač do lěta 2038 su cyłkownje wjace hač 200 milionow eurow za spěchowanje cyłostatnje wuznamnych předewzaćow we wobłuku zakonja k sylnjenju strukturow we wuhlowych kónčinach zaplanowali.
K tomu rjekny kulturna statna sekretarka Monika Grütters (CDU): „Při kóždej wuspěšnej strukturnej změnje hraje wobchadźenje z kulturu rozsudnu rólu. Wona je wažny faktor za region, přinošuje k žiwjenskej kwaliće a polěkuje regionalnej identiće w časach přewróta.“ Ministerce je wažne, zo wot wšeho spočatka sylnje do kulturnych poskitkow inwestuja. „Tohodla je kulturne spěchowanje wažny wobstatk zakonja k sylnjenju strukturow we wuhlowych kónčinach.“
Cyrkwje kemšow dla pod ćišćom
Berlin (dpa/SN). Předsydka zwjazka lěkarjow w zjawnej strowotniskej słužbje Ute Teichert sej žada, wšitke přitomnostne hodowne Bože słužby po wšej Němskej wotprajić. „Dokelž wěmy, kak spěšnje móže so wirus runje na Božich słužbach rozšěrjeć, njesměmy hladajo na wysoke ličby infekcijow hody žadyn přidatny riziko na so wzać“, lěkarka nowinarjam rjekny. Wona kritizuje, so njejsu mnozy chutnosć połoženja přeco hišće spóznali. Podobnje bě to wčera zastupowacy ministerski prezident Sewjerorynsko-Westfalskeje Joachim Stamp (FDP) zwuraznił. Tež wón ma za trěbne, hladajo na wuwiće ličby natyknjenjow a połoženje na intensiwnych stacijach kemše wotprajić.
Předsyda Rady ewangelskeje cyrkwje Heinrich Bedford-Strohm pokazuje porno tomu na „ekstremnje krute hygieniske koncepty“ na Božich słužbach. „Ličba wopytowarjow je jara wobmjezowana. Njezmějemy žane přepjelnjene Bože słužby“, rjekny wón powěsćerni dpa.
To a tamne (23.12.20)
Spěwace a rejwace rjadniske sotry w Francoskej zbudźeja w interneće wjele kedźbnosće. Pod hesłom „Zhromadnje hač do kónca“ su mały musical zhotowili, z kotrymž zběraja pjenjezy za sobusotru, kotraž chce klóšter w Semur-en-Brionnaisu ze starobnych přičin wopušćić. Z pjenjezami chcedźa klóšter na juhu kraja wotpowědnje přetwarić, zo móhła sotra dale w nim bydlić.
Rujacy jeleń je w Bayerskej zasadźenje policije zawinował. Žona w allgäuskim Günzachu bě policiju informowała, dokelž bě w lěsu někoho wo pomoc wołać słyšała. Na to pósłachu wjetšu ličbu policistow a helikopter ze specialnej kameru, zo bychu lěs přeslědźili. Dwě hodźinje pozdźišo akciju skónčichu. Helikopter bě jenož slědy jelenja wuhladał. Po dorěči z hajnikami su sej nětko wěsći, zo bě rujacy jeleń „z wulkej wěstosću“ na akciji wina.
Kretschmer so starosći
Drježdźany (dpa/SN). Sakski ministerski prezident Michael Kretschmer (CDU) starosći so přiběraceje polarizacije towaršnosće koronapandemije dla. W běhu prěnjeje žołmy infekcijow bě respekt před njeznatej chorosću ludnosć hišće zwjazował, Kretschmer praji. Na to přiběraše lochkomyslnosć. Wěste kruhi wědomje wopačnosće šěrja, zo bychu towaršnosć pačili a destabilizowali. „Zo demonstranća eksistencu wirusa prěja, hladajo na połne chorownje lědma wutraješ.“
Lětsa žadyn rozrost wjace
Mnichow (dpa/SN). Tři hospodarske slědźenske instituty su swoju zhromadnu konjunkturnu prognozu za europasmo znižili. Institut Ifo w Mnichowje, KOF w Zürichu a Istat w Romje njeliča w nachilacym so štwórtym kwartalu wjace z rozrostom, ale z dale woteběracej produkciju wo 2,7 procentow. To by za cyłe lěto 2020 minus 7,3 proc. wučinjało, instituty dźensa zdźělichu. Za prěni kwartal 2021 liča z rozrostom 0,7 proc.
Znowa parlament wolić
