Šiman: Łužica trjeba nowe impulsy
Budyšin (SN/MkWj). Zapósłanc CDU w Sakskim krajnym sejmje Marko Šiman wobydlerjow z naležnym apelom prosy, wšitko činić, zo by so dalšemu rozšěrjenju koronawirusa zadźěwało. Hladajo na połoženje w Hornjej Łužicy a w Budyskim wokrjesu je bytostne, zo wostanje strowotniski system dale dźěłakmany, rjekny Šiman na telefoniskej nowinarskej rozmołwje w Budyšinje. „Wostanjemy-li wšitcy disciplinowani, móžemy chorosć přewinyć.“ Wosebje wažne su zapósłancej tež zawody, kotrež dyrbja schorjenych abo w karantenje přebywacych přistajenych narunać. Dźěło poradźowarnjow, častodosć jenički zwisk wosamoćenych ludźi, měło dale pjenježnje podpěrane być.
Warnuja před konfliktami
„Kotre móžnosće hišće mamy?“
Zwjazkowe kraje chcyli wobmjezowanja koronawirusa dla přiwótřić
Berlin (dpa/SN). Politikarjo Zwjazka a krajow žadaja sej razniše wobmjezowanja za kónčiny z wosebje wulkimi ličbami koronainfekcijow. Bayerski kabinet bě hižo wčera nowe naprawy wobzamknył. Mjeztym wo tym debatuja, hač njedyrbjeli so ministerscy prezidenća hišće do hód znowa zetkać. Dotal maja woni dalšu konferencu hakle 4. januara planowanu. Bayerski ministerski prezident Markus Söder (CSU) bě konferencu ministerskich prezidentow nastorčił. Tajka budźe „prawdźepodobnje“ trěbna, dokelž měli so wšitcy hišće raz wo tym rozmołwjeć, što so hody a silwester stanje. Konferencu zwołać žada sej tež strowotniski fachowc SPD Karl Lauterbach. Wón měni, zo měli wšitke wobchody po hodźoch „znajmjeńša dwaj tydźenjej“ zawrjene wostać.
To a tamne (07.12.20)
Ze suwadłom měškow w swójbnym drive-inje je swj. Mikławš w Allgäuju dary rozdźělał. 38 swójbow bě so za wčerawšu akciju při gratowni wohnjoweje wobory w Rettenbergu w Hornim Allgäuju přizjewiło a zamołwitym dary do toho přiwjezło. Wšitko wotmě so bjez kontakta: Kóžde awto měješe 15 mjeńšin chwile, sej po měšk darow při suwadle dojěć. Loni bě Mikławš na nawjes přijěł. Tónkróć dyrbjachu so korony dla z nuzowej wariantu spokojić abo akciju wupadnyć dać.
Pječwa dla biłoj staj so mužej w kupnicy žiwidłow w badensko-württembergskim Rheinfeldenje. 56lětny bě 22lětneho napominał, zo njesmě pječwo z rukomaj z regala brać. Tón jeho na to křiwdźeše. Połoženje so tak přiwótři, zo so wobaj na kóncu plistowaštaj a do so biještaj. Policija přepytuje nětko přećiwo woběmaj ranjenja ćěła dla.
Merkel: Rólu WHO sylnić
New York (dpa/SN). Generalny sekretar UNO António Guterres je sej wěsty, zo njeby koronapandemija tajke rozměry měła, bychu-li kraje swój čas poručenja Swětoweje strowotniskeje organizacije (WHO) dodźerželi. WHO bě wot wšeho spočatka „fakty a wědomostnu orientaciju“ podała, rjekny Guterres wčera k zahajenju dwudnjowskeje wurjadneje zhromadźizny UNO. Zwjazkowa kanclerka Angela Merkel (CDU) namołwješe, rólu WHO w pandemiji dale sylnić.
Wjetšina za kruty silwester
Berlin (dpa/SN). Snadna wjetšina ludźi w Němskej wita, zo měli wobmjezowanja koronawirusa dla hody trochu zběhnyć. To je wuslědk reprezentatiwneho naprašowanja w nadawku sćelaka ARD. Tak ma 53 procentow prašanych planowane wolóženja za prawe, 44 proc. porno tomu za wopačne. Na wšě 68 proc. móžne zběhnjenje wobmjezowanjow chětro kritisce wobhladuje, jeničce 30 proc. je wita.
Rozsudźa wo imuniće
Po dźesać lět trajacych twarskich dźěłach su dźensa w němskej ...
Měli struktury přepruwować
Magdeburg (dpa/SN). Předsyda saksko-anhaltskeje CDU Holger Stahlknecht je „ně“ swojeje frakcije k zwyšenju rozhłosoweho popłatka zakitował a w tym zwisku na wobraz wuchodneje Němskeje w zjawnoprawniskim rozhłosu pokazał. Sćelaki njejsu transformaciski proces na wuchodźe, kiž je žiwjenje mnohich ludźi zasadnje změnił, dosahajcy wotbłyšćowali, rjekny 56lětny Magdeburgskim nowinarjam. Zjawnoprawni njerozprawjeja sčasami na samsnej runinje ludźi, ale skerje „z pozběhnjenym porstom“.
CDU nochcyła swobodu medijow wobmjezować. Přiwšěm dyrbjało móžno być struktury tych přepruwować, kotřiž su wot přinoškow ludźi žiwi.
Tuchwilu wočakuja, zo Saksko-Anhaltska ze swojim wetom cyłoněmske zwyšenje rozhłosoweho popłatka wo 86 centow na potom 18,36 eurow wob měsac k 1. januarej blokuje. CDU chce so zwyšenju dale spjećować, tež AfD. SPD a Zeleni su za wyši popłatk. Njedyrbjeli-li so dojednać, hrozy wot lěta 2016 knježaca koalicija CDU, SPD a Zelenych rozpadnyć.
Cigaretu kurił
To a tamne (04.12.20)
Z awtom nana a ze 120 km/h staj 13lětnaj hólcaj w Garbsenje pola Hannovera před policiju ćěkałoj. Hólcaj běštaj wobsadce policajskeho awta napadnyłoj, dokelž skutkowaštaj „jara młodaj“. Jako chcychu zastojnicy jeju kontrolować, stupi „šofer“ na płun. Ze 120 km/h smaleše awto tež po dróhach, hdźež bě jeno 30 km/h dowolenych. Z pomocu dalšeho policajskeho jězdźidła móžachu ćěkaceju skónčnje zadźeržeć a zajeć. Wukopa so, zo słuša awto nanej młodeho šofera.
Listy do přichoda pósłać móža wobydlerjo Freiburga. Wyši měšćanosta Martin Horn jich namołwja swoje dožiwjenja w časach koronapandemije napisać, zo bychu ludźo za sto lět wo tym zhonili. Wočinić maja so listy hakle w lěće 2120, hdyž swjeći Freiburg tysactu róčnicu wobstaća. Listy z adresu wotpósłarja přijimuja w radnicy hač do 15. julija 2021.
Zakaz wobkrućeny
Bremen (dpa/SN). Za sobotu planowana wulkodemonstracija tak mjenowanych prěkimyslerjow přećiwo koronapolitice w Bremenje wostanje zakazana. Tamniše zarjadniske sudnistwo je wčera wječor zakaz měšćanskeho zarjadnistwa wobkrućiło, dokelž ma strach infekcijow za přewulki. Organizatorojo akcije mjeztym na wyšim zarjadniskim sudnistwje přećiwo zakazej skorža. Iniciatiwa prěkimyslerjow bě 20 000 wobdźělnikow přizjewiła.
Hrozy masiwna chudoba
New York (dpa/SN). Dołhodobne wuskutki koronapandemije móhli po informacijach UNO ličbu jara chudych ludźi na swěće na wjace hač miliardu powjetšić. Tajkemu wuwiću hodźi so wokomiknje hišće zadźěwać, rěka w dźensa wozjewjenym přepytowanju swětoweje organizacije. Fachowcy běchu tři wšelake scenarije naćisnyli. Hač woprawdźe k najhóršemu dóńdźe, wotwisuje wot rozsudow politikarjow. Inwestować měli woni do socialnych programow, digitalizacije a do boja přećiwo změnje klimy.
Nowe wumjetowanja Trumpa
