Berlin (dpa/SN). Prezencnu wučbu w šulach dyrbjeli po měnjenju zwjazka wu­čerjow realnych šulow koronakrizy dla po cyłej Němskej přetorhnyć. „Dyrbjeli spěšnje a jasnje rozsudźić. Pod tajkimi wuměnjenjemi měli šulerjo zaso doma wuknyć“, rjekny předsyda zwjazka Jürgen Böhm wčera nowinarjam. „Nětko so wjeći, zo su kraje a kultusowe zarjady jasne ličby infekcijow a incidencow ignorowali a prezencnu wučbu na kóždy pad pře­tłóčić chcyli“, wón doda. Štóž wědomostne dopóznaća a poručenja chutnje njebjerje, je sobu wina na rozpřestrěću pandemije a tak na podlěšenju a pohłubšenju krizy, Jürgen Böhm wuzběhny.

Kultusowi ministrojo krajow běchu po lětnich prózdninach hladajo na nazhonjenje wokoło zawrjenych šulow stajnje zaso potwjerdźeli, zo chcyli prezencnu wučbu dalokož móžno zwoprawdźić.

Koronakriza nas mjeztym dźewjeć mě­sacow zaběra a najebać to zwěsćamy, zo smy poprawom runje tak mudri kaž do toho. Hłowne prašenje, hdźe su najhórše žórła infekcijow, njemóža nam knježacy hač do dźensnišeho rjec. Po zdaću njejsu to dotal přepytowali. Bě kwota natyk­njenjow w šulach woprawdźe tak wysoka, zo dyrbja je zaso zawrěć? Abo su so ludźo we wobchodach natyknyli, kotrež nětko začinja, abo snano na dróze, hdźež dyr­bimy wot najnowšeho tež nahubnik wu­žiwać. Abo snano w nocy, hdyž smy mjez 22 a 6 hodź. po měsće dundali. Pječa je powšitkownje znate, zo su najhórše žórła infekcijow swójbne swjedźenje, čehoždla lětsa hody a silwester tak derje kaž wupadnu. Hdyž pak tomu tak je, čehodla zawě­raja muzeje, galerije, kina, dźiwadła a hosćency? Na obligatoriske prašenje „Što ha by ty přećiwo koronje činił?“ tež wotmołwić njemóžu. Wočakuju pak wot zamołwitych, zo to přepytuja, zo by so čas bjezradnosće skónčił. Marko Wjeńka

Měnjo, zo ma dźiwje swinjo před sobu, je hajnik mylnje na małeho islandskeho konja třělił a jeho ćežko zranił. 34lětny bě w lěsu njedaloko badensko-württembergskeho Ravensburga črjódu dźiwich swini widźał. Ze specialnej kameru wuhlada wón něšto pozdźišo swinje na kromje lěsa a z něhdźe 80 metrow na nje třěleše. Jako so zranjenemu zwěrjeću bližeše, dyrbješe spóznać, zo bě na konje třělał. Ponyja su w zwěrjećej klinice operowali, přećiwo hajnikej nětko přepytuja.

Po namakanju wjacorych mysterioznych monolitow su tele dny tež njeda­loko hrodu Neuschwanstein w bayerskim Allgäuju spodźiwnu stelu našli. Štó je ně­hdźe dwaj metraj wysoki metalowy stołp na polo stajił, dotal njewědźa. Žona bě jón na wuchodźowanju wuhladała. Zamołwići za turizm so boja, zo so wćipni nětko we wulkej ličbje nawala.

Berlin (dpa/SN). Bayerski ministerski prezident Markus Söder (CSU) wupraja so za „dospołny lockdown“ za čas mjez hodami a 10. januarom. W tym času móhli „wšitko zawrěć“ a w zawodach dowol zarjadować, rjekny wón wčera w tele­wiziji ZDF. Tak bychu wšitcy nimale tři tydźenje měli, zo móhli kontakty redukować. Lěpši čas hač tón mjez hodami a 10. januarom za lockdown „cyłe lěto wjace njezmějemy“, Söder podšmórny.

Racija přećiwo clanam

Berlin (dpa/SN). Z wulkej raciju je policija w Berlinje a Hamburgu přećiwo orga­nizowanej kriminaliće w arabskich wul­ko­swójbach postupowała. Cyłkownje přepytachu dźensa rano 27 bydlenjow a zajachu třoch podhladnych, kaž statne rěčnistwo zdźěli. Při tym dźe tež wo styki clanow k syćam rockerow. Něhdźe 500 policistow bě zasadźenych, mjez nimi specialne komando SEK. Mjez druhim dźe wo płokanje pjenjez w zwisku z kupowanjom a předawanjom domow.

Daty za serum kradnyli