Najnowše naprašowanje mjez ludźimi w Němskej je wunjesło, zo ma 20 procentow z nich „latentne“ antisemitiske nastajenje a zo tež wo mjeńšiny njerodźi. My Serbja wšak to zas a zaso dožiwjamy. Hakle minjeny kónc tydźenja rozprawjachu medije wo skóncowanym swjatym křižu mjez Kamjenej a Wulkej Dubrawu, štož měješe Jan Nuk za nadpad na serbske katolske žiwjenje. Dopominam so w tym zwisku na njerjany podawk před lětami, jako samsny Jan Nuk w dźeniku Sächsische Zeitung skoržeše, zo njejsu tafličku při ponowjenym Mosće Swjateho ducha nad Sprjewju w Budyšinje dwurěčnje popisali. Naraz jewjachu so w interneće najhórše antiserbske šćuwanja, a čłowjek so prašeše: Zwotkel naraz tajka hida? Sym tež stajnje trochu kedźbliwy, hdyž němscy politikarjo měrniwe zhromadne žiwjenje Serbow a Němcow we Łužicy jako přikładne wuzběhuja. Hida přećiwo mjeńšinam dale eksistuje, byrnjež wšědnje widźomna njebyła. Marko Wjeńka

Drježdźany (SN). W zwadźe wo móžne přesydlenje Krajneho přepytowanskeho wustawa za strowotnistwo a weterinarstwo z Drježdźan do Biskopic je předsyda frakcije Lěwicy w Sakskim krajnym sejmje Rico Gebhardt ministerskeho prezidenta Michaela Kretschmera (CDU) namołwił, ze wšěmi potrjechenymi za kompromisom pytać. „Dotal njeje ministerski prezident přeswědčiwje rozkładł, čehodla a w čejim zajimje so za tutón přećah zasadźa. To je njefairne napřećo 260 přistajenym, kotřiž dyrbja potom wšědnje do Biskopic na dźěło jězdźić. Knježerstwo chce wočiwidnje nad hło­wami sobudźěłaćerjow rozsudźić“, Gebhardt w nowinskej zdźělence piše.

Na njedawnej njezjawnej zawodnej zhromadźiznje běchu so přistajeni krajneho zarjada masiwnje přećiwo planowanemu přesydlenju wuprajili. Na wšě 80 procentow z nich přećah wotpokazuje. Jenož jara snadny dźěl by zwólniwy był w Biskopicach dźěłać. Zamołwići so nimo toho boja, zo by sej wulki dźěl fachowcow nowe dźěło w Drježdźanach pytał. Mjeztym so wo naležnosći tež w knježerstwje wadźa.

Jónkrótnje 1 600 eurow za lěnjopasenje – na tutón poskitk Hamburgskeje Wysokeje šule za tworjace wuměłstwo su so ludźo ze wšeho swěta přizjewili, a to wjace hač 1 700. Doba přizjewjenja je so wčera skónčiła. Ze „stipendijom za ničočinjenje“ chcedźa ludźi pohnuć, zo w cyle nowych žiwjenskich kategorijach mysla. Ze wšěch próstwystajerjow ma jury nětko třoch za stipendij wuzwolić.

Pjany a jeno spódnju drastu woblečeny je šofer w Nürnbergu ćeknył, po tym zo bě wjacore wobchadne njezboža za sobu zawinował. 38lětny bě spočatnje čerwjenu amplu ignorował, při wotbočenju do druheho awta zrazył a skónčnje do wobchadneho znamjenja prasnył. Swědcy informowachu policiju, tež dokelž bě so muž po tym drastu slekł a pěši ćeknył. Test alkohola wunjese dwaj promilej.

Budyšin (SK/SN). Zwjazkowe zjednoćenstwo Lěwicy „Etniske mjeńšiny“ ma koaliciske zrěčenje CDU, SPD a Zelenych nastupajo serbske prašenja za dotal najlěpše w Sakskej. To zwěsćichu jeho čłonojo sobotu na wuradźowanju w Budyšinje. Zaběrali su so tež z prašenjom, što bu wuchadźejo z koaliciskeju zrěčenjow w Braniborskej a w Sakskej hladajo na serbski lud dotal docpěte a kak chce Lěwica k dalšemu zwoprawdźenju mjeńšinoweho prawa přinošować. Serbska Lěwica wita, zo tež serbske zjednoćenstwa w SPD a Zelenych wuslědki politiki Serbam napřećo hódnoća. Zdobom poskića woběmaj cyłkomaj zhromadne dźěło.

Wótrje kritizowali su sobotni wobdźělnicy saksku Lěwicu, zo njeje – njedźiwajo na dojednanje z lěta 2015 – žane naprawy dojednała, „mjeńšinowe prawo w trěbnej měrje“ w stronje zwoprawdźić. Jednohłósnje schwalichu protestny list zwjazkowej změrcowskej komisiji. Přitomni zhonichu tež wo strukturnych změnach katolskeje a ewangelskeje cyrkwje w serbskich kónčinach. Žanažkuli změna njesměła na kóšty serbskich wosadow hić, zwuraznichu woni w swojim stejišću.