Masterski plan předstajił
Berlin (dpa/SN). Zwjazkowy minister za nutřkowne naležnosće Horst Seehofer (CSU) je dźensa swój dołho připowědźeny masterski plan k migraciji předstajił. W 63dypkowym planje wón namjetuje, migrantow, kotřiž su hižo w druhim kraju EU wo azyl prosyli, na němsko-awstriskej mjezy wotpokazać. Nimo toho planuje Seehofer sankcije přećiwo ćěkancam, kotřiž nochcedźa sobu pomhać swoju identitu wujasnić.
Kolesowarjow a pěškow škitać
Berlin (dpa/SN). Kolesowarjow a pěškow lěpje před strašnymi njezbožemi z wotbočacymi nakładnymi awtami škitać bě hłowna tema dźensnišeho zetkanja w Berlinje, na kotrež bě zwjazkowy minister za wobchad Andreas Scheuer (CSU) přeprosył. Zhromadnje ze zastupnikami awtotwarcow, logistiskeje branše, fachowcami za wobchadnu wěstotu a kolesowarskimi klubami rěčachu wo móžnosćach, nakładne awta z tak mjenowanym „asistentom wotbočenja“ wuhotować. Stajnje zaso stawaja so njezboža, dokelž šoferojo Lkw-jow kolesowarjow a pěškow w mortwym kuće prosće njewidźa.
Noweho sudnika nominował
Nowy wonkowny minister
London (dpa/SN). Britiska premierministerka Theresa May je zastojnstwo wonkowneho ministra znowa wobsadźiła, po tym zo bě dotalny načolny diplomat kraja Boris Johnson wčera w zwadźe wo wustup kraja z EU wotstupił. Nowy wonkowny minister budźe dotalny minister za strowotnistwo Jeremy Hunt. Toho zastojnstwo přewozmje Matt Jancock, dotal minister za kulturu a medije.
May, kotraž chcyła Wulku Britanisku tež po brexiće wusko na Europsku uniju wjazać, wojuje wo swoje politiske přežiwjenje. Wobkedźbowarjo w Londonje wočakuja zběžk zasakłych přećiwnikow EU w jeje konserwatiwnej stronje. Tež nowowólby hižo njewuzamkuja.
Boris Johnson, jedyn z najwažnišich přiwisnikow brexita, bě wčera popołdnju wotstupił, jenož hodźiny po wotstupje ministra za brexit Davida Davisa. Johnson twjerdźi, zo stanje so Wulka Britaniska z „koloniju EU“, dyrbjała-li May swoje plany zwoprawdźić. Ta bě hakle minjeny pjatk ministrow na swój kurs přinjesła. Dojednanja pak dołho njedźeržachu.
Za kóždu kónčinu koncept
Konferenca wo strukturnej změnje po brunicy a wo konsekwencach
Berlin (SN/MkWj). W zwjazkowej stolicy Berlinje wotmě so minjeny pjatk konferenca „Z rewěrow – za rewěry“, kotraž zaběraše so z kóncom wudobywanja brunicy. A tam dźěše tež wo sćěwki w potrjechenych kónčinach.
Akcija zahajena
To a tamne (10.07.18)
Z wosom metrow dołhim čołmom z papjerca a papjery su šulerjo z westfalskeho Hövelhofa nowy rekord nastajili. Cyłkownje 20 pasažěrow je wčera předpisanu čaru 250 metrow wjesłowało, bjez toho zo by so papjercowa konstrukcija w formje romskeje galery podnuriła. Dotalny rekord na samsnej čarje běchu z 5,50 metrow dołhim a 1,80 metrow šěrokim čołmom nastajili. Nowy rekordny čołm je 8,30 m dołhi a 2,40 m šěroki.
Z wjacorymi policajskimi awtami poda so policija w nocy na póndźelu do schleswigsko-holsteinskeho Krusendorfa, zo by tam pozdatneho paducha zajała. Po tym zo běchu zastojnicy dom wobstupili, w kotrymž běchu swědcy něšto podhladneho widźeli, wuhladachu woprawdźitu přičinu zasadźenja: Z bliskeho burskeho statoka ćeknjene swinjo je na terasy čušliło. Wobsedźer je skónčnje popadny.
„Pětr a wjelk“ nětko za pišćele
Magdeburg (B/SN). Hłowne mysle bajki „Pětr a wjelk“ su nětko tež wobstatk noweje pišćeloweje twórby, kotraž zaklinča wčera tydźenja w Magdeburgskej hłownej cyrkwi. Na pišćelach hrał je tachantski kantor Barry Jordan, Sabina Lattorf wustupowaše jako rěčnica. Wobrazowe projekcije podšmórnychu začuća hudźby komponista Sergeja Prokofjewa.
Zwóńkow a domownikow přijał
Drježdźany (B/SN). Na tradicionalne přijeće k česći swjateho Bena witaše Drježdźansko-Mišnjanski biskop Heinrich Timmerevers njedawno 180 muži a žónskich – domownikow a zwóńkow biskopstwa. Woni dźě su ći prěni a posledni na najwšelakorišich zarjadowanjach, biskop Timmerevers podšmórny. Nawoda katolskeho běrowa w Sakskej Daniel Frank wuzběhny w postrownej narěči jich trěbne dźěło zaćichim.
Kritizuja eksport bróni
Činja dale kaž planowane
Budyšin (SN/JaW). Iniciatiwna skupina za serbske ludowe zastupnistwo – Serbski sejm pokročuje ze zapisowanjom wolerjow do lisćin a z wólbami kaž planowane. To zdźěli hornjoserbski rěčnik iniciatiwy dr. Měrćin Wałda na naprašowanje. „Njejsmy nastupili, zo bychmy so kłonili a swoje principije spušćili“, potwjerdźi wón wolu sejmikarjow, swój puć dale kročić. Kaž Njeswačan dale zdźěla, „dyrbi so w serbskej a łužiskej politice něšto změnić. Njezměni-li so na politiskich zakładach ničo zasadneho, změjemy drje hišće serbski muzej, za přichod Serbow pak budźe jara wusko.“ Zdobom dr. Wałda namołwja, zo dyrbja sej Serbja, „dołhož su hišće w někak stabilnej demokratiji žiwi, wjetše a stabilniše prawa a móžnosće wuwojować, kotrež nam cyle jasnje přisteja“.
CSU hłosy zhubja
Berlin/Mnichow (dpa/SN). Dobre tři měsacy do wólbow krajneho sejma je CSU w Bayerskej wot absolutneje wjetšiny daloko preč. To je wuslědk najnowšeho woprašowanja instituta Forsa w nadawku sćelaka RTL po wobćežnym azylowym kompromisu mjez CDU a CSU. To docpěwa knježerstwowa strona ministerskeho prezidenta Markusa Södera jenož hišće 38 procentow. AfD móže w Bayerskej ze 14 procentami ličić, Zeleni z 15 proc. SPD by z dwanaće proc. jenož hišće štwórta najsylniša móc była.
Wuchowanje so dliji
Mae Sai (dpa/SN). Drama w thailandskej prózdnjeńcy so dale dliji. Po spektakularnym wuchowanju štyrjoch hólcow chcychu nurjacy dźensa dalšich čłonow koparskeho mustwa z prózdnjeńcy wuswobodźić. Problemy pak znowa přiběraja, dokelž je so čas monsunowych zliwkow mjeztym započał. Wuchowani młodostni su mjeztym w chorowni. Jich strowotny staw je po informacijach lěkarjow spokojacy. Starši čakaja na dowolnosć, jich wopytać směć.
Zaso woheń na zwučowanišću
Minjenu nóc je Awstriska kaž připowědźene započała, z Italskeje ...
Minister za brexit wotstupił
London (dpa/SN). Britiski minister za wustup kraja z Europskeje unije David Davis je w zwadźe wo kursu kraja wotstupił. „Nowy trend“ politiki w zwisku z brexitom a wotpowědna taktika tomu njepolěkujetej, zo Wulka Britaniska europske wiki a cłownu uniju woprawdźe wopušći, wopodstatni Davis w lisće premierministerce Theresy May. Šefina knježerstwa so tomu spjećuje. Wona njemóže jeho charakterizowanju strategije brexita přihłosować, kaž da zdźělić.
May bě knježerstwo minjeny pjatk na dwanaće hodźin trajace marathonowe posedźenje na kuble Chequers sewjerozapadnje Londona skazała. Za čas klawsury dyrbjachu ministrojo samo swoje mobilne telefony wotedać. Wječor May zdźěli, zo je so knježerstwo na nowu strategiju za wustup z EU dojednało. Prawdźepodobnje bě wona wulki ćišć na ministrow wukonjała. Davis bě wospjet připowědźił, zo chcył wotstupić, dyrbjała-li May kraj přewusko na EU wjazać.
