Předsyda Domowiny a čłon Mjeńšinoweje rady Dawid Statnik ...
Policija přepytuje přećiwo Greenpeacej
Albanska přećiwo lěhwam ćěkancow
Wšitko móžno
Dźeń a wjace hidy w komentarach
Berlin (dpa/SN). Medije w Němskej su po najnowšim přepytowanju na swojich internetnych stronach přiběrajcy z hidypołnymi komentarami konfrontowane. Hanjenja, rěčne hrubosće, wumjetowanja kaž „statne medije“ abo „zełžane nowiny“ namakaja so dźeń a časćišo w komentarnych špaltach k žurnalistiskim přinoškam w interneće, rěka w přepytowanju Krajneho wustawa za medije Sewjerorynsko-Westfalskeje, kotrež su wčera w Berlinje předstajili. W studiji su komentary k 16 žurnalistiskim přinoškam internetnych redakcijow Deutschlandfunk Kultur, Rheinische Post Online, RTL a „Tagesschau“ analyzowali.
„Mała harowaca mjeńšina“ digitalny diskurs wobknježi, wjetšina wužiwarjow pak mjelči, rěka w přepytowanju „Hidypołne komentary w syći“. Wědomostnicy redakcijam radźa, so moderaciji w syći zmužiće stajeć a „rěčny teror“ wotstronić. Złowólnych wužiwarjow měli redakcije direktnje narěčeć. „Pěkny a mjechki žurnalizm hrubosć njezadźerži.“
Kickl: Jasny signal do swěta
Awstriska na mjezy k Słowjenskej ćěkancow wotwobarać zwučowała
Spielfeld (dpa/SN). Awstriska je wčera ze stami policistow a wojakow na słowjenskej mjezy ćěkancow wotwobarać zwučowała. Z akciju chcychu jasny signal do swěta wusyłać, rjekny nutřkowny minister Awstriskeje Herbert Kickl wot prawicarskeje FPÖ w gmejnje Spielfeld. „Sym kruće rozsudźeny to přesadźić, zo so podawki lěta 2015 ženje wjace njewospjetuja.“ Kraj, kiž njemóže swoju mjezu hižo efektiwnje škitać, zhubi swoju wěrjomnosć, Kickl rozłoži. Zwučowanje měješe k tomu přinošować, dowěru Awstričanow do skutkownosće wotwobaranskich naprawow zaručić.
Wulce zapołožene zwučowanje z 500 policistami a wjace hač 200 wojakami wotmě so runje na tym namjeznym přechodźe, po kotrymž běchu nazymu 2015 tysacy ćěkancow do kraja přišli, bjez toho zo by jich něchtó registrował. 200 policajskich šulerjow přewza rólu migrantow, kotřiž žadachu sej z wołanjom wotewrjenje hranicy. Policija pak jich zadźerža. Wojacy swojich kolegow w pozadku ze zdźěla ćežkej techniku škitachu.
To a tamne (27.06.18)
Do mobilneje toalety ze swojim awtom zrazył je šofer w Bochumje. 37lětny muž runje mobilnu budku z karu transportowaše, jako šofer na parkowanišću wróćo storkaše. Při tym wón transport přewidźa a zjědźe do budki. Ta so zwróći a padny na 37lětneho. Wodźer awta muža wuswobodźi, kiž so snadnje zrani. Awto bě lochko wobškodźene, toaleta wosta cyła.
Njeprošeny zwěrjeći hósć je koparsku hru w Awstralskej mylił. Wosrjedź partije žónskeje regionalneje ligi w stolicy Canberra skoči kenguru na hrajnišćo. Wón inspicěrowaše trawnik, wobčucha bul a wosta při wrotach sedźo, kaž internetny widejo pokazuje. Hakle po tym zo bě trenar jednoho z mustwow zwěrjo z kopanišća wuhnał, móžachu z hru pokročować. Awstralska ma wjace hač 45 milionow kenguruwow, nimale dwójce telko kaž wobydlerjow.
Kritizuje Harley Davidson
Milwaukee (dpa/SN). Prezident USA Donald Trump je hněwny, zo planuje twarc motorskich Harley Davidson, dźěl swojeje produkcije nowych chłostanskich cłow Europskeje unije dla z Ameriki wurjadować. „Sym překwapjeny, zo Harley Davidson jako prěnje předewzaće běłu chorhoj wupowěsnje“, Trump twitterowaše. Předewzaće argumentuje, zo so mašiny po zwyšenju cłow w Europje wo něhdźe 2 200 dolarow podróša.
Tež Španiska ćěkancow nochce
Madrid (dpa/SN). Němska pomocna łódź „Lifeline“ z něhdźe 230 ćěkancami čaka dale na dowolnosć, do jednoho z přistawow dojěć směć. Tež Španiska je Drježdźanskej organizaciji Mission Lifeline zakazała, přistawy kraja wužiwać. Mjeztym so połoženje na łódźi přiwótřa, dokelž so wjedro spochi pohubjeńša. Lifeline, kotraž bě minjeny štwórtk ludźi na morju wuchowała, přeco hišće před kupu Malta čaka. Pječa je so francoski prezident Emmanuel Macron za to wuprajił, zo měła Malta ćěkancow přiwzać.
Přećelstwo potwjerdźił
Gabriel: Su woni wobłudnili?
Berlin (dpa/SN). Bywši předsyda SPD Sigmar Gabriel warnuje před zahubnymi sćěhami za Němsku a Europu, dyrbjała-li knježerstwowa koalicija rozpadnyć. „Prašam so, hač su woni wobłudnili“, rjekny Gabriel w rozmołwje z powěsćernju dpa. „Runje jako socialdemokrat praju: Nadźijam so, zo Angela Merkel kanclerka wostanje. Wona dźě je waha Němskeje w Europje a nawopak waha Europy w Němskej. To prawdźepodobnje wjetšinje tamnych pobrachuje.“ Wodźacy zastupnicy CDU, CSU a SPD chcedźa so dźensa wječor wosrjedź raznych rozestajenjow azyloweje politiki dla w koaliciskim wuběrku schadźować.
„Bavaria first, rěka hesło CSU“ měni Gabriel hladajo na wólby Bayerskeho krajneho sejma lětsa nazymu a na pospyt, rozmach AfD wobmjezować. „To je jara riskantne. Wolerjo njebudu CSU mytować, hdyž zwjazkowu republiku zni- či a Němsku a Europu do chaosa storči.“ W rjadach CSU je so po wudyrjenju krizy ćěkancow dla 2015 „tójšto nakopiło a drje nětko bjez kontrole wubuchnje“.
To a tamne (26.06.18)
Blidotenisowy rekord nastajiło je wjace hač tysac šulerjow w Düsseldorfje. Dokładnje 1 252 dźěći a młodostnych z 25 šulow a institucijow je so w Düsseldorfskim koparskim stadionje zešło, zo bychu blidotenis hrali. Dotalny rekord 508 wobdźělnikow z lěta 2017 su tak wjac hač podwojili. Pomocnicy běchu 102 tenisowej blidźe nastajili, zo móhli wobdźělnicy „kołoběh“ hrać. Při tym wjacori blidotenisća za samsnym blidom hraja, běhajo wot jedneje strony na druhu.
Mortweho delfina wosrjedź lěsa namakała je ruska turistka njedaloko čornomórskeho Sočija. Žona hnydom zamołwitych informowaše, po tym zo bě so njedaloko awtodróhi wuchodźowała. Dotal njemóža sej rozkłasć, kak je dwaj metraj dołhe zwěrjo do lěsa přišło. Móžno, zo běchu delfina ilegalnje w zwěrjencu dźerželi, zo je na transporće zahinył a zo su jeho na to w lěsu wotbyli.
