Racija pola požadarjow azyla

štwórtk, 03. meje 2018 spisane wot:

Ellwangen (dpa/SN). Policija je dźensa při wulkoraciji w přebywarni ćěkancow w badensko-württembergskim Ellwangenje 23lětneho požadarja azyla ze zapadoafriskeho Toga namakała a identifiko­wała. Jeho chcedźa nětko zhromadnje ze 17 dalšimi požadarjemi azyla, kiž běchu w zašłosći stajnje zaso jako naška­rarjo njeměrow napadnyli, do druhich domow přepołožić. 23lětneho chcychu w nocy na póndźelu poprawom do Italskeje wotsunyć. Druzy požadarjo pak tomu z namocu zadźěwachu.

Němka w Somaliji zawlečena

Mogadischu (dpa/SN). Němsku sobu­dźěłaćerku Mjezynarodneho komiteja Čerwjeneho křiža su w somaliskej stolicy Mogadishu zawlekli. To je pomocna organizacija minjenu nóc zdźěliła. „Starosćimy so wo wěstotu našeje koleginy“, rjekny rěčnik misije w Somaliji. Wobrónjeni běchu kompleks Čerwjeneho křiža wčera wječor nadpadnyli a žonu zawlekli. Mjeztym so na wjacorych runinach wo jeje wuswobodźenje prócuja.

Žadaja sej wyši niwow renty

Plan wobjednali

štwórtk, 03. meje 2018 spisane wot:
Budyšin (SN/MkWj). K dźěłowemu posedźenju je so Rada za serbske naležnosće Sakskeje wčera w Budyskim Serbskim domje zešła. Kaž předsydka Marja Michałkowa na naprašowanje SN zdźěli, su w prěnim dźělu wo nowym planje naprawow za zachowanje serbskeje rěče a kultury wuradźowali, kotrež Sakske ministerstwo za wědomosć a wuměłstwo tuchwilu wudźěłuje a za čož su před dnjemi samo dźěłarničku přewjedli. Druhi dźěl wěnowachu přihotam přichodneho posedźenja 6. junija w Drježdźanach. Na nim chcedźa ze sakskim kultusowym ministrom Christianom Piwarzom (CDU) wo šulskich naležnosćach a tež wo wu­runanju přidatnych kóštow, kotrež přez dwurěčne naležnosće nastawaja, rěčeć.

Platzeck: Merkel měła pomhać

štwórtk, 03. meje 2018 spisane wot:
Berlin (dpa/SN). W konflikće mjez Ruskej a zapadom je předsyda němsko-ruskeho foruma Matthias Platzeck zwjazkowu kanclerku Angelu Merkel (CDU) jako posrěd­kowarku namjetował. „Začuwamy dale a bóle, zo Angelu Merkel w Moskwje přeco hišće respektuja. Tohodla dyrbjała wona do Ruskeje jěć a spytać, tam po­srědkować“, rjekny něhdyši předsyda SPD nowinarjam. Tole je jara wažne, Platzeck doda. „Dyrbimy spiralu eskalacije přełamać. Hač zawěsćenje měra, bój přećiwo terorej, změna klimy, kriza ćěkancow dla abo wójna w Syriskej – žadyn z tutych problemow njeje bjez Ruskeje rozrisajomny.“ Poćah mjez zapadom a Ruskej je napjaty. Zapad wumjetuje Ruskej, zo je sej kupu Krim přiswojiła, zo podpěruje zběžkarjow na zapadźe Ukrainy a zo je bywšeho ruskeho agenta Skripala zajědojćiła.

Maas: Holocaust njerelatiwizować

štwórtk, 03. meje 2018 spisane wot:

Berlin (dpa/SN). Zwjazkowe knježerstwo so wuprajenjam palestinskeho prezi­den­ta Mahmuda Abbasa wo holocausće spjećuje. „Smy přećiwo kóždemužkuli re­la­tiwizowanju holocausta“, piše wonkowny minister Heiko Maas (SPD) w internet­nej słužbje Twitter. Němska je zamołwi­ta za naj­surowiše złóstnistwo w čłowjeskich stawiznach. „Dopominanje na to je nam namołwa a nadawk, po wšěm swěće konsekwentnje přećiwo kóždejžkuli formje antisemitizma wustupować.“

W swojej zdźěla antisemitiskej narěči bě Abbas Židam sobuwinu na holocausće, na mo­rjenju šěsć milionow Židow přez němskich nacionalsocialistow, dawał. Po jeho słowach njebě antisemitizm holocaust zawinował, ale socialne zadźerženje Židow. Tući běchu ludźom pjenjezy z danju požčowali, štož wjedźeše k antižidowskej hidźe, Abbas twjerdźeše.

Israelski ministerski prezident Benjamim Netanjahu reagowaše chětro raznje na narěč Abbasa. Ta je „wjeršk njewědy a lózyskosće“, a měła so mjezynarodnje zasudźić, sej Netanjahu žadaše.

To a tamne (03.05.18)

štwórtk, 03. meje 2018 spisane wot:

Ze swojoraznej kampanju chce Neuseelandska tomu zadźěwać, zo kraj stajnje zaso na swětowych kartach „zabudu“. Tole­ je ministerska prezidentka kraja­ Jacin­da Ardern připowědźiła. Woprawdźe so stajnje zaso stawa, zo so Neuseelandska na kartach scyła njejewi, byrnjež­ kraj ze 4,8 milionami ludźi wjetši był hač Wulka Britaniska. Stało je so tole hižo UNO, BBC abo nahladnemu muzejowemu zwjazkej USA Smithsonian.

Na wopačnej pisće přizemiło je pasažěrske lětadło we Vietnamje. Airbus A-321 předewzaća Vietnam Airlines wužiwaše w dowolowym centrumje Nha Trang pi­stu­, kotruž hišće twarjachu, narodny lětadła dohladowanski zarjad CAA zdźěla. Přizemjenje bě tuž chětro kopolate. Nichtó pak so njezrani. Crew w cockpiće nablaku suspendowachu. Pilot bě wočiwidnje hotowu a njehotowu pistu zaměnił.

Wo začuću swójskeje hódnoty

srjeda, 02. meje 2018 spisane wot:

Přećiwo wójnje a njetolerancy, rasizmej a prawicarskemu populizmej měrjachu so mejske swjedźenje Němskeho dźěłarniskeho zwjazka na wčerawšim dnju dźěła runje tak kaž přećiwo niskim mzdam, njerunemu zapłaćenju žonow.

Kamjenica/Budyšin (SN/at). Němski dźěłarniski zwjazk Sakskeje (DGB) je spokojom. Na mejskej manifestaciji dźěłarnistwow a z dalšimi akcijemi demon­strowachu tysacy w Kamjenicy přećiwo pochodowanju neonacijow. Te bě prawicarsko-ekstremna małostrona III. puć přizjewiła. Sakski ministerski prezident Michael Kretschmer (CDU) je na spočatku zarjadowanja DGB wobydlerjow do toho namołwjał, so přećiwo prawicarskemu ekstremizmej zasadźować. „Prawicarski ekstremizm njeničiš z lěwicarskim ekstremizmom. To dyrbi ze srjedźizny towaršnosće přińć“, politikar CDU rjekny.

Wólbna namołwa wozjewjena

srjeda, 02. meje 2018 spisane wot:

Čorny Chołmc (SN/at). Namołwu k wólbam demokratisce legitimowaneho ludoweho zastupnistwa Serbski sejm je wólbny nawoda dr. Hagen Domaška we wobłuku Krabatoweho swjedźenja wčera w Čornym Chołmcu wozjewił. Doba listowych wólbow skónči so 3. nowembra w 10 hodź. Kaž z wólbneho wozjewjenja wuchadźa, su wólbokmani wšitcy Serbja, kotřiž so wo zapisanje do wolerskeho zapi­sa požadaja a so tak jako tajcy wu­znawaja. Woni dyrbja na poslednim dnju listowych wólbow staćan abo staćanka Zwjazkoweje republiki Němskeje być a 16. žiwjenske lěto zakónčene měć.

Wo zapis do wolerskeho zapisa móžeš so z formularom z wólbneho flajera postalisce (Wólbny wuběrk do Serbskeho sejma, Hłowna 9, 01920 Njebjelčicy), e-mail­nje (wolbny-wuberk.serbski-sejm@ mailbox.org) z online-formularom (www.serbski-sejm.de) abo ze zapisanjom do wotpowědnych lisćin požadać.

Je wotpohladane, zo zestaja so přichodny Serbski sejm z dwanaće delnjoserbskich a z runje telko hornjoserbskich zapósłancow. Za kóždu z wobeju skupin ma woler maksimalnje tři hłosy.

Protesty stolicu zlemili

srjeda, 02. meje 2018 spisane wot:

Jerewan (dpa/SN). W něhdyšej sowjetskej republice Armeniskej su masowe protesty opozicije dźensa stolicu Jerewan zlemili. Demonstranća blokowachu hłowne dróhi, podzemska železnica njejězdźeše. Nawoda opozicije Nikol Pashinyan bě k masowej ciwilnej njeposłušnosći namołwjał, po tym zo bě parlament wčera z wjetšinu zapósłancow wotpokazał, jeho za ministerskeho prezidenta wuzwolić. Demonstranća hižo tydźenje dołho přećiwo korupciji a wujowstwu w kraju protestuja.

Wobskorža knježerstwo USA

Sacramento (dpa/SN). Kaliforniska je zhromadnje ze 16 dalšimi zwjazkowymi statami USA knježerstwo prezidenta Donalda Trumpa wobskoržiła. Do toho bě wone připowědźiło, wot bywšeho pre­zidenta Baracka Obamy wukazane pra­widła za dodźerženje wobswětoškitnych směrnicow za awta zmjechčić. Kalifor­niski generalny statny rěčnik Xavier Becerra rjekny w Sacramento, zo njeńdźe wo zwadu z knježerstwom, ale wo strowotu dźěći. Wobswětowy zarjad EPA bě připowědźił, zo chcył směrnicy nastupajo přetrjebu bencina złahodnić.

Wjace pjenjez za brónje

SPD pod Nahles dale woteběra

srjeda, 02. meje 2018 spisane wot:

Berlin (dpa/SN). Po wuzwolenju Andreje Nahles za předsydku je nahladnosć SPD mjez wolerjemi na runje tak 17 procentow woteběrała. To je procent mjenje hač hišće minjeny tydźeń a 3,5 procentow mjenje hač při wólbach do zwjazkoweho sejma loni w septembru. Zwěsćił je to slědźenski institut Forsa při wopra­šowanju w nadawku sćelaka RTL. Porno tomu­ bě politbarometer sćelaka ZDF ty­dźenja hišće snadny rozrost nahladnosće strony wot 19 na 20 procentow zwěsćił.

Bywšu frakcisku šefinu běchu 22. apryla na zjězdźe strony we Wiesbadenje z jenož 66,3 procentami jako prěnju žonu na čole socialdemokratiskeje strony Němskeje wuzwolili. Wona bě wobšěrny proces ponowjenja připowědźiła.

Bychu-li ludźo w Němskej zwjazkoweho kanclera direktnje wolić móhli, njeby Nahles po zwěsćenju instituta Forsa žanu šansu přećiwo Angeli Merkel (CDU) měła. Jenož 13 procentow wolerjow by so za Nahles rozsudźiło, wjace hač trójce telko (49 procentow) za Merkel.

Berlin (dpa/SN). Etatowy komisar Europskeje unije Günther Oettinger žada sej wot čłonskich krajow EU při jednanjach wo nowym etaće zwólniwosć ke kompromisam. „Wočakuju wot wšitkich krajow fleksibilitu“, rjekny Oettinger w dźensnišim rańšim magacinje sćelaka ARD. EU ma składnosć, swoju zhromadnosć dopokazać, wón rjekny. W běhu dnja chcyše Oettinger swój naćisk etata za čas mjez 2021 a 2027 předstajić.

Němski komisar swój plan, wudawki zwyšić, zakitowaše, byrnjež EU z wustupom Wulkeje Britaniskeje cyłkownje mjenje pjenjez k dispoziciji měła. Bywši ministerski prezident Badensko-Württembergskeje ma hladajo na přiběracu inflaciju etat za wurunany.

Lutować chcył komisar mjez druhim w ratarskim wobłuku, hdźež EU dotal wjele subwencijow financuje. To móhło dołhodobnje k wyšim płaćiznam žiwi­dłow wjesć, wón přizna. Ratarjo móhli nuzo­wani być, płaćizny za ratarske wudźěłki zwyšić. „Runje tajke je žiwjenje“, wón rje­kny. „Štož sej wiki žadaja, dyrbiš płaćić.“

Serbska debata

nowostki LND