Ćeknjena wopica je na mjezynarodnym lětanišću w měsće San Antonio w staće USA Texasu wotběhi chětro přemjetała. Pawian bě při wukładowanju ze swojeje transportneje kisty ćeknył. Wulkemu mustwu pomocnikow coowa w San Antoniju a sobudźěłaćerjam lětanišća so skónčnje poradźi wopicu do kuta ćěrić, hdźež ju z třělbu pohłušichu. Wona bě po puću do texaskeho zwěrjenca.
Z klučowym trikom su policisća ćěkaceho muža na policajsku stražu wabili a jeho tam zajeli. Do toho bě jim 41lětny přez třěšne wokno twochnył, jako chcychu jeho zastojnicy z třomi wukazami zajeća w ruce wotwjesć. Dachu tuž zamk duri jeho bydlenja wuměnić a připrawichu pokiw, zo móže sej nowy kluč na policajskej straži wotewzać. A woprawdźe: Muž so tam přizjewi a dósta kluč, ale tež nóclěh w celi policajskeho rewěra.
Washington (dpa/SN). Senat USA je powołanju dwělomneje kandidatki Giny Haspel jako noweje nawodnicy CIA přihłosował. Wona budźe tak prěnja žona na čole na wukraj měrjaceje so tajneje słužby. 61lětna CIA hižo komisarisce nawjeduje, po tym zo bě so Mike Pompeo z wonkownym ministrom stał. Nominacija Giny Haspel zbudźi debaty, dokelž bě wona po terorowych nadpadach 2001 brutalne metody přesłyšowanja terora podhladnych w jastwach dowoliła.
Altmaier skeptiski zakonja dla
Berlin (dpa/SN). Hospodarski minister Peter Altmaier zhladuje zdźeržliwje na plany EU, zakoń wo wotwobaranju sankcijow USA wožiwić. EU dyrbjała „jara dokładnje pruwować“, hač po tajkim puću swoje zaměry docpěje, rjekny Altmaier w telewiziji. Prezident komisije EU Jean-Claude Juncker bě wčera na wjerškowym zetkanju EU rjekł, zo chcył ze zakonjom małe a srěnje předewzaća škitać. Zakoń ma europske předewzaća pohnuć, sankcije USA přećiwo Iranej ignorować. Tak nastate kóšty móhli jim zarunać.
Wurjadne posedźenje UNO
Rezolutna wodźerka taksija je starušku w mecklenburgsko-předpomorskim Grimmenje před tym zachowała, 20 000 eurow přisadźić. 90lětna bě sej taksi skazała, zo by na banku po pjenjezy jěła. W awće wona rozłoži, zo trjeba pjenjezy za wnučku, kotraž bě ju zazwoniła a wo pjenjezy prosyła, dokelž je we wuskosćach. Šoferce taksija bě to spodźiwne. Wona njedowjeze rentnarku na banku, ale na policiju. Ta zapoda skóržbu přećiwo njeznatej wobšudnicy.
Špatne swědomje skućićela je nawrót pokradnjeneje policajskeje čapki zmóžniło, byrnjež po 37 lětach było. Britiski wojak bě čapku 1981 w chaosu policajskeho zasadźenja w delnjosakskim Nienburgu spakosćił. Doma wužiwaše ju rady na karnewalu. Nětko pak jeho swědomje hrjebaše a wón prošeše w Němskej bydlaceho znateho, čapku policiji přepodać.
Berlin (dpa/SN). Po wčerawšej raznej debaće z AfD wo etaće Němskeje w zwjazkowym sejmje je sej generalna sekretarka CDU Annegret Kramp-Karrenbauer wěsta, zo je strona politiska domizna radikalnych prawicarjow. „AfD njeje žana alternatiwa. Wona je strona z jasnymi prawicarskimi elementami a ma prawicarjow w swojich rjadach“, rjekny politikarka nowinarjam. „Hdyž strona čłowjekow pawšalnje po barbje kože, po wěrje abo pochadźe sudźi, nima to ničo z křesćanskimi hódnotami činić.“
Dwělomnu praksu wobchowa
Mnichow (dpa/SN). Najebać kritiku chce Němski póst dwělomnu praksu wobmjezowanych dźěłowych zrěčenjow wobchować. „Chcemy so dale po swojich zasadach měć, dokelž su so jako prawe wopokazali a dźěłoprawniske zakonje njeranja“, rjekny za personal zamołwity čłon předsydstwa Thomas Ogilvie nowinarjam. Bonnski koncern z přistajenymi jenož potom njewobmjezowane dźěłowe zrěčenje wotzamknje, hdyž njeběchu w běhu dweju lět dlěje hač 20 dnjow chori a hdyž njejsu wjace hač dwě wobchadnej njezboži zawinili.
Harms: Awtotwarcow nuzować