Wučomnikama dźěłaćerjam wjace skićeć
Budyšin (SN/BŠe). Najebać dźeń a wjace nadawkow we wobłuku twarstwa, je dźeń a mjenje wučomnikow. Twarske předewzaća Budyskeho wokrjesa pytaja nuznje za dorostom. Tuchwilu je 161 wukubłanskich městnow branše njewobsadźene, wuchadźa z ličbow Budyskeje dźěłoweje agentury. „Na tym so wjele změnić njebudźe. Předewzaćeljo wokrjesa maja so na to nastajić, zo budźe přichodnje dale a ćešo, wučomnikow nańć“, zdźěli předsyda wobwoda dźěłarnistwa IG BAU za wuchodnu Saksku Peter Schubert. Zdobom wón firmownikow wótrje kritizuje a žada sej polěpšenje dźěłowych wuměnjenjow, wosebje hladajo na mzdu.
Hakle njedawno su tarifowe jednanja twarskeje branše zwrěšćili. IG BAU je sej šěsć procentow wjace mzdy w běhu dwanaće měsacow a 13. mzdu za dźěłaćerjow žadała. „Tohorunja je wažne, zo dóstanu přistajeni jězbu k twarnišću zapłaćenu. Runje tak měli dźěłodawarjo wukubłanske kóšty přewzać, k čemuž na přikład tež jězby do powołanskeje šule liča. Wučomnikam měło so wjace skićeć“, Peter Schubert podšmórny. Zdobom chce dźěłarnistwo samsnu mzdu we wuchodźe kaž na zapadźe přesadźić.
Altmaier: USA poskitk předpołožić
Berlin (dpa/SN). Šef kanclerskeho zarjada Peter Altmaier (CDU) je so we wikowanskej zwadźe z USA za to wuprajił, Washingtonej poskitk jako zakład jednanjow předpołožić. Tež Europska unija dyrbjała zwólniwa być, poskitk na blido połožić, „wo kotrymž smy zwólniwi jednać“, rjekny wón wčera w sćelaku ARD. „Sym měnjenja, zo njesměli ani USA ani Europjenjo riziko wikowanskeje wójny na so wzać“, wón zwurazni. Tohodla dyrbjałoj so zwjazkowe knježerstwo kaž tež komisija EU najebać rozsud prezidenta USA Donalda Trumpa za to zasadźeć, tajkej wikowanskej wójnje zadźěwać.
USA a EU so w prašenju nowych cłow USA na wukrajny wocl a aluminij wadźitej. EU je wot tutych cłow dotal wuwzata. Přechodna doba pak so jutře skónči. Rozrisanje njeje wotwidźomne. Tež zwjazkowa kanclerka Angela Merkel (CDU) njeje na swojim wopyće pola Trumpa ničo docpěła. EU rozmysluje nětko wo cłach na wudźěłki z USA.
To a tamne (30.04.18)
Pytajo za do wody padnjenymi klučemi je wodosportowc w Ruppinskim jězoru staru granatu namakał. Z pomocu magneta bě muž sobotu njedaloko pobrjoha za klučemi pytał a při tym němsku granatu z Druheje swětoweje wójny z wody wućahnył. Fachowcy za znješkódnjenje municije granatu zrumowachu.
Powostanki stareho Romskeho sydlišća su w Bołharskej namakali. Při twarskich dźěłach za nowu awtodróhu na juhozapadźe storčichu dźěłaćerjo na zbytki twarjenjow, kupjele, cyrkwje a kanalizacije. Namakanki pochadźeja z 3. hač do 6. lětstotka. Hakle njedawano běchu derje zdźeržane rownišćo z časa Romjanjow wotkryli. Archeologiska drohoćinka drje twar awtodróhi do Grjekskeje nachwilnje přetorhnje. Iniciatiwa žada sej přepołoženje trasy a wobydlerski referendum wo awtodróze.
Pompeo pola NATO
Washington (dpa/SN). Bjezposrědnje po swojim přisahanju je so nowy wonkowny minister USA Mike Pompeo na posedźenje NATO do Brüssela podał. Tam zetka so dźensa rano mjez druhim z generalnym sekretarom zwjazka Jensom Stoltenbergom. Tež rozmołwa z němskim wonkownym ministrom Heikom Maasom (SPD) bě planowana. Jedna z hłownych temow wuradźowanja su wobćežne poćahi wojerskeje aliancy k Ruskej.
Schulze: Situacija dramatiska
Berlin (dpa/SN). Do dźensa planowaneho rozsuda EU wo móžnym zakazu pčołkam škódźacych insekticidow w ratarstwje je zwjazkowa wobswětowa ministerka Svenja Schulze (SPD) na zahubne sćěhi tutych jědow pokazała. „Mrětwa insketow je woprawdźe dramatiska“, rjekny wona dźensa w rańšim magacinje sćelaka ZDF. Njewotwisnje wot rozsuda EU chcyła Němska zasadźenje jědow w ratarstwje raznje wobmjezować, zo by přirodu a zwěrinu lěpje škitała.
Protestuja přećiwo namocy
Merkel na dźěłowym zetkanju pola Trumpa
Historiske zetkanje w Koreji
Lěpše ramikowe wuměnjenja su trěbne
Rozsud w ruce měć
To a tamne (27.04.18)
Dźewjeć kilogramow šokolody pod suknju měješe žona w Braunschweigu, jako ju w předawarni žiwidłow při kradnjenju lepichu. To pak njebě hišće wšitko. W awće kumpana, kiž njedaloko kupnicy na nju čakaše, ležeše dalšich 50 kilogramow šokolody: praliny, sta taflow šokolody a worješko-nugatowa krema. 35lětna padušnica bě słódkosće we wjacorych worštach suknje schowała, policija zdźěli. Hač chcyštaj wšu šokolodu sami jěsć abo dale předawać, njeje dotal znate.
Swoju mać njewotpohladnje na balkon wuzamknyła je dwulětna holčka w Magdeburgu. Po misnjenju njemóžeše dźěćo durje hižo wočinić, wohnjowa wobora zdźěli. Mać prošeše z balkona pěškow wo pomoc, kotřiž na to wohnjowu woboru wołachu. Wobornicy dyrbjachu durje bydlenja namócnje wotewrěć a móžachu mać skónčnje z balkona wuswobodźić.
Z nowym ministrom porěčałoj
Wo čěskich wučerjach za serbske šule staj čěskaj politikarjej wčera ze sakskim statnym ministrom za kultus Christianom Piwarzom (CDU) w krajnym sejmje w Drježdźanach rěčałoj. Rozmołwu je zapósłanc Sakskeho krajneho sejma Hajko Kozel (Lěwica) sposrědkował.
Drježdźany (SN/at). Předstawa, zo młodźi wučerjo ze susodneho kraja při tym pomhaja, dźěry w serbskich rjadowniskich stwach pobrachowacych pedagogow dla wotstronić, je dale wužadaca. Na wčerawšim zetkanju je tohorunja wo to šło, nowemu kultusowemu ministrej wid z Praskeje a Ústískeje perspektiwy na temu zbližić. Na rozmołwje, kotraž měješe po informacijach ze sakskeho kultusoweho ministerstwa interny charakter, staj so z čěskeje strony europski zapósłanc Jaromír Kohlíček (KSČM) a za šulstwo zamołwity wicehejtman wobwoda Ústí nad Labem Petr Šmíd (SPO) wobdźěliłoj.
