Z nuznikowej papjeru z hnoja pandow wuličeja sej w Chinje wulki wobrot. Firma Sichuan Qianwei Fengsheng je z centrumom za plahowanje pandow na juhozapadźe kraja zrěčenje wotzamknyła. Firma chce wšědnje wulke mnóstwa fekalijow a wupluwane zbytki žratwy wužiwać, zo by je na nuznikowu papjeru a druhe hygieniske wudźěłki předźěłała. Pica mjedwjedźow z čorno-běłym kožuchom – narodneho symbola Chiny – ma wulki podźěl bambusa a tuž wjele włoknin.
115 milionow lět stary wotćišć nohi dinosawriera su njeznaći w parku blisko awstralskeho města Melbourna nětko wobškodźili. Kaž sćelak ABC rozprawja, běchu skućićeljo kromy nimale 30 centimetrow wulkeho wotćišća z hamorom wotbili. Parkowi dohladowarjo mjenuja to „hruby wandalizm“ a chcedźa historisku wosebitosć zaso sporjadkować.
Drježdźany (SN/bn). Sakske krajne knježerstwo je so wčera prěni raz po přetworjenju kabineta schadźowało. Hłownej temje běštej rozdźělenje financnych srědkow Zwjazka za wutwar šulow a 5. rozprawa wo połoženju serbskeho ludu.
Ministerka za wědomosć a wuměłstwo dr. Eva-Maria Stange (SPD) předstaji wčera tak mjenowanu serbsku rozprawu. „Škit a připóznaće narodneje mjeńšiny njejstej nam jeno zakonska winowatosć – smy hordźi, zo Serbja naš region wobohaćeja“, zjima dr. Stange wuchadźišćo za 85stronski dokument. Rozprawa wěnuje so połoženju Serbow w minjenych pjeć lětach. Wažne dypki w njej su staw kubłanja, financowanje, strukturna a energijowa změna kaž tež njepřećelskosć napřećo Serbam. „Powšitkownje mam połoženje narodneje mjeńšiny za pozitiwne“, bě facit ministerki.
Washington (dpa/SN). Ze snadnuškej wjetšinu je senat USA dwělomnu dawkowu reformu republikanow schwalił. 51 ze 100 senatorow hłosowaše dźensa rano za naćisk, wšitkich 48 demokratiskich přećiwo njemu. Prezident USA Donald Trump steji tak bjezposrědnje před najwjetšim wudobyćom swojeje hamtskeje doby. Jeli dom reprezentantow znowa přihłosuje, štož je trěbne, maja porno přilubjenjam Trumpa bohačcy z reformy wjace lěpšin hač chudši a srjedźna woršta.
Wušo hromadźe dźěłać
Praha (dpa/SN). Dźesać lět po wotstronjenju stacionarnych namjeznych kontrolow mjez Němskej a Čěskej pomina sej Praski najwyši slědźer za drogami wuše a spěšniše zhromadne dźěło justicy. „Dźěłamy z proceduru, kotraž wěčnje traje“, rjekny Jakub Frydrych powěsćerni dpa. Zdobom agěruja kriminelne cwólby dźensa bóle mjezynarodnje a wužiwaja wjele wjace pućow. Plany za europske statne rěčnistwo pokazuja do praweho směra.
Wulka podpěra kandidatomaj
Před wjetšej škodu zachował je tankownik 99lětneho z braniborskeho Perleberga, kiž bě so z awtom do Mecklenburgsko-Předpomorskeje zabłudźił. Tróšku zamyleny starc póndźelu wječor w Plauwje zasta a so tam za pućom prašeše. Starosćiwy tankownik informowaše na to policiju, kotraž zawoła nuzoweho lěkarja. Tón wšak zwěsći, zo bě muž bjez orientacije. Po zastaranju na rewěrje su přiwuzni ze 60 kilometrow zdaleneho města 99lětneho pozdźišo wotewzali.
Róžkaty winowy sud je Pfalcowčan wuwił, zo by kóšty znižił a přetrjebu drjewa pomjeńšił. Blidarski mišter a powołanskošulski wučer Thomas Lutz je tuž nimale 2 000lětnu tradiciju kulojteho suda přetorhnył. Wón stwori konstrukt z duboweho drjewa a drohowocla, kotryž wupada kaž kamorčk. Za njón dósta samo Designowe myto Porynsko-Pfalcy.
Berlin (dpa/SN). Zwjazkowy prezident Frank-Walter Steinmeier widźi nastupajo wobchadźenje z woporami teroroweho nadpada před lětom na Breitscheidowym naměsće w Berlinje zanjechanja pola stata a towaršnosće. Někotražkuli podpěra za přiwuznych woporow a zranjenych je pozdźe přišła a wosta njespokojaca, rjekny Steinmeier dźensa na njezjawnym wopominanju woporow teroroweho nadpada 19. decembra 2016 na Berlinskich adwentnych wikach.
Procedura zdźěla wustawu rani
Karlsruhe (dpa/SN). Procedura za přizwolenje studijnych městnow w předmjeće humanmedicina Zakładnemu zakonjej zdźěla njewotpowěduje. To je Zwjazkowe wustawowe sudnistwo dźensa w Karlsruhe rozsudźiło (Az. 1 BvL 3/14 und 4/14). Rjadowanje dyrbja hač do 31.12.2019 změnić. Prěni senat je to wobšěrnje ertnje wopodstatnił. Zarjadniske sudnistwo Gelsenkirchen bě padaj požadarjow předpołožiło, kotrajž njeběštaj w předmjeće humanmedicina studijne městno dóstałoj.
Wjace wojakow za Afghanistan