Kamjenica/Neukieritzsch (dpa/SN). Personalije běchu tema sakskeho krajneho zjězda Lěwicy zańdźenu sobotu w Kamjenicy. Antje Feiks móžeše so přećiwo kontrahentej Andréjej Schollbachej za zastojnstwo předsydki sakskeje Lěwicy přesadźić. Wón bě hakle krótko do zjězda swoju kandidaturu wozjewił. Nowa wicepředsydka je Jana Pinka, nowy krajny jednaćel Thomas Dudzak.

W swojej požadanskej narěči žadaše sej Antje Feiks wot zastupjerjow strony wjace sprawnosće. Na bazy bě rěč wo „personelnym dźiwadle. Naše wobsahi stupja do pozadka“, nowa předsydka po­twjerdźi. Lěwica móže so jeničce zesylnić, je-li baza sobu zapřijata.“

W poslednjej narěči jako šef sakskeje Lěwicy wabješe Rico Gebhardt za wjetšu přezjednosć. „Njeńdźe jenož wo dobyćerjow a podležanych, ale wo jednanja­kmanu wjetšinu“, 54lětny wuzběhny.

Komu jenož koleso słuša? Zastojnik bě sej je minjenu srjedu wot pasanta w Berlinje wupožčił, zo móhł wikowarja drogow přesćěhać. Krótko do toho bě z wukazom zajeća pytaneho skućićela na dróze spóznał. Kedźbliwy policist tuž składnosć wuži a móžeše wikowarja drogow z pomocu kolesa dosćahnyć a zajeć. Dotal­ pak zastojnik wobsedźerja kolesa podarmo pyta. W chwatku bě wón zabył sej mjeno pomocliweje wosoby napisać.

Pjeć kilogramow ćežka cukini je so w badensko-württembergskim Brettenje wo nachwilnu napjatosć postarała. 81lětny muž bě policiju zawołał a twjerdźił, zo leži na jeho zahrodźe bomba. Kaž pak so wukopa, jednaše so wo 40 centimetrow dołhu cukini. Po wšěm zdaću běchu ju njeznaći přez žiwy płót na zahrodu wuměnkarja ćisnyli.

Drježdźany (B/SN). Zo je 63lětna sakska kultusowa ministerka Brunhild Kurth (CDU) z „priwatnych přičin“ dwě lěće dočasnje zastojnstwo złožiła, nowy minister Frank Haubitz jara wobžaruje, přejo „swójbje wšo dobre a Bože žohnowanje.“ Kaž předsydstwo šulskeje załožby ewangelskolutherskeje cyrkwje Sakskeje zdźěli, měješe Brunhild Kurth dźěći a wučerjow kaž tež jich problemy stajnje we wóčku. Husto tematizowaše wona dźěry we wobłuku wučerskeho personala a dorosta, štož bu lěta dołho zanjechane. To budźe tež za přichod wulke wužadanje. Z nowymi šulskimi zakonjemi w zjawnym a swobodnym nošerstwje je Kurth nowy puć nastupiła. Tónle proces njeje hišće nimo a ma so wot jeje naslědnika dale wjesć. Tež ewangelske šule su dźěl sakskeho šulstwa a chcedźa tutej zamołwitosći wotpowědować.

Choralny swětowy rekord

Sutherland Springs (dpa/SN). Młody muž je wčera na Božej słužbje w texaskim Sutherland Springs 26 ludźi zatřělił, mjez nimi wjacore dźěći. Něhdźe 20 dalšich wosobow su do chorownjow do­wjezli, zdźěli guwerner Texasa Greg Abbott.­ Po informacijach sćelaka CNN bě skućićel 26 lět stary a je so po njeskutku sam zatřělił. W jeho awće nańdźe policija wjacore brónje. Motiw třělca dotal znaty njeje. Prezident USA Donald Trump, přebywacy tuchwilu w Aziskej, je swójbam woporow sobuželnosć wuprajił.

Žadaja sej wotstup Seehofera

Mnichow (dpa/SN). Šef strony CSU Horst Seehofer chce so po sonděrowanskich rozmołwach potencielneje jamaiskeje koalicije k swojemu politiskemu přichodej wuprajić. Kónc tydźenja bě sej bayerska Młoda unija jako prěnja wjetša stronska organizacija wotstup 68lětneho najpozdźišo klětu žadała. Tež wjacore wokrjesne předsydstwa CSU běchu sej na internych posedźenjach personelne změny přeli. Seehofer měł so za hubjeny wuslědk wólbow­ zwjazkoweho sejma zamołwić.

Paradise papers wozjewili