Katyrny so zetkaja

wutora, 16. junija 2015 spisane wot:

Torgau (B/SN). Sakske město Torgau pyta po cyłej Němskej za žónskimi z před­mjenom Katyrna. Wone maja so po přeću měšćanskeho zarjadnistwa zetkać na 6. dnju Katyrny w tutym měsće re­nesansy. 4. julija dopomina so ze swje­dźenjom na skutkowanje Katyrny z Bora (1499–1552), mandźelskeje reformatora Martina Luthera. Katyrny dóstanu tón dźeń wodźenje po měsće a swobodny zastup do wustajency „Luther a wjerchojo“.

Storča na hranicy

Berlin (B/SN). Přiběraceje ličby ćěkancow dla wołaja tafle w Němskej alarm. Trje­ba­ja wjace žiwidłow a pjenježnych darow, „hewak tafle a čestnohamtscy sobudźěłaćerjo na swoje hranicy storča“, rjekny předsyda Zwjazka Němske tafle Jochen Brühl. Tuchwilu pyta wjace hač 100 000 ćěkancow pomoc při tafli.

Modlić so za islamski swět

Wobydlerski zwjazk počesćeny

wutora, 16. junija 2015 spisane wot:

Podstupim/Budyšin (dpa/SN). Woby­dlerski zwjazk za podpěru ćěkancow „Budy­šin wostanje pisany“ počesćichu w Podstupimje z mytom „Stawaj“ za tolerancu a ciwilnu kuražu Flickoweje załožby. Předsyda jeje rady Friedrich Christian Flick skedźbni wčera w deklaraciji na přiběracu ličbu ćěkancow a na z tym zwisowacy rozrost prawicarskoekstremnych a antisemitiskich njeskutkow. Wo myto je so tónkróć 56 objektow z wuchodneje Němskeje a Berlina požadało. Z 10 000 eurami dotěrowane wuznamjenjenje bu lěta 2012 prěni króć spožčene.

Za jeju zasadźenje počesćichu tež dweju­­ bratrow-předewzaćelow Rainera a Haralda Opolku. Hižo wjele lět so wobaj ze wšej konsekwencu prawicarsko­ekstremnym akcijam do puća stajataj. Tak staj funkcionarej strony NPD znjemóžniłoj so na swójbnym swjedźenju wobdźělić, kotryž běštaj organizowałoj. Zamołwići připowědźeja, zo chcedźa projekty přećiwo rasizmej přichodnje skutkownišo podpěrać a za nje dalše pjenježne srědki přewostajić.

W Srjedźnym morju zatepjenu Syričanku su dźensa na muslimskim dźělu kěrchowa w Berlinje-Gatowje pochowali. Bě to zdobom akcija Centruma za politisku rjanosć, kotryž přećiwo politice Europskeje unije napřećo ćěkancam prote­stuje. W Němskej bydlacy přiwuzni młodeje žony běchu pochowanju přihłosowali. Wona bě w měrcu zhromadnje ze swojim dźěsćom do Italskeje po puću, jako so čołm podnuri. Tež dźěćo so tehdy zatepi, njebu pak z maćerju hromadźe pochowane. Foto: dpa/Gregor Fischer

Wo rozdźělenju ćěkancow

wutora, 16. junija 2015 spisane wot:
Luxemburg (dpa/SN/K). W Luxemburgu wuradźuja nutřkowni ministrojo Europskeje unije dźensa prěni raz wo rozdźělowanju ćěkancow. Komisija EU chce 40 000 ćěkancow z Italskeje a Grjekskeje na druhe kraje zhromadźenstwa rozdźělić. Pólska, Wulka Britaniska a dalše kraje so kwotěrowanju spjećuja. Němski nutřkowny minister Thomas de Maizière (CDU) hišće žadyn kompromis njewočakuje. Po jeho słowach dyrbjało so najprjedy wo tym dorozumjenje docpěć, kajkim ćěkancam z kotrych krajow scyła prawo přebytka přisteji. Wo rozprawach, zo Italska ćěkancam ewentualnje časowje njewobmjezowanu dowolnosć přebytka w EU wudźěli, minister rjekny, zo by to prawniske połoženje jasnje raniło.

Z nuzowym planom

wutora, 16. junija 2015 spisane wot:

Minister Varoufakis warnuje před rozpušćenjom Europy

Brüssel/Berlin/Athen (dpa/SN/K). Dyrbjeli-li wšitke jednanske prócowanja wo přewinjenje grjekskeje financneje krizy a tak wo wuchowanje kraja před statnym bankrotom zwrěšćić, chcedźa eurokraje na to z nuzowym planom reagować, kotryž su wone mjeztym zdźěłali. Tole rozprawja Süddeutsche Zeitung. Po spomnjenym planje je předwidźane, kónc tydźenja přihotować kontrolowanje grjeksko-europskich financnych transakcijow, zo by so přezměrnemu nawalej na banki zadźěwało. Wo pjenježnych wuskosćach Grjekskeje je dźensa tež rěč na zetkanju luxemburgskeho ministerskeho prezidenta Xaviera Bettela z němskej kanclerku Angelu Merkel (CDU) w Berlinje.

EZB rjap skrućili

wutora, 16. junija 2015 spisane wot:
Luxemburg (dpa/SN). Europska centralna banka (EZB) smě za wuchowanje eura zasadnje statne požčonki kupować. Tole je Europske sudnistwo (EuGH) dźensa w Luxemburgu rozsudźiło. Wotpowědny program EZB z lěta 2012 zakonje njerani, kaž sudnistwo zdźěli. Konkretnje dźe wo wobzamknjenje EZB, pod wěstymi wuměnjenjemi bjez wobmjezowanja statne požčonki statow kupować, kotrež su w pjenježnej nuzy. Program njebu dotal hišće nałožowany, ale hižo jeho při­powědźenje bě mjezynarodnu financnu krizu změrowało. Přećiwo njemu skoržili běchu wjacori němscy politikarjo kaž tež frakcija Lěwicy w zwjazkowym sejmje a 12 000 podpěraćelow.

Třo nowi ministrojo

wutora, 16. junija 2015 spisane wot:
Waršawa (dpa/SN). Po wjacorych wotstupach ministrow w zwisku z aferu wotposkanja dla je pólski prezident Bronisław Komorowski dźensa třoch nowych ministrow powołał. Nowy financny minister je Andrzej Czerwinski, dotal šef parlamentneho wuběrka za energiju. Chirurg Marian Zembala je nowy strowotniski minister, bywši olympionik Adam Korol nawjeduje sportowe ministerstwo.

Za reformu BND

wutora, 16. junija 2015 spisane wot:
Berlin (dpa/SN). SPD žada sej wot kanclerskeho zarjada hišće do přichodnych wólbow zwjazkoweho sejma 2017 zasadnu reformu němskeje tajneje słužby BND. Tole njesměło so dlěje wotstorkować, rěka w dokumenće SPD, kotryž powěsćerni dpa předleži. 16stronski koncept předwidźi jasne prawidła za dźěło BND, mjez druhim při wobčušlenju wukrajnych staćanow w Němskej.

Bičk dyrbi do jastwa

wutora, 16. junija 2015 spisane wot:
Darmstadt (dpa/SN). Namócneje smjerće studentki Tugce dla dyrbi 18lětny Sanel M. tři lěta do jastwa. Darmstadtske krajne sudnistwo jeho dźensa po młodźinskim chłostanskim prawje ranjenja ćěła ze smjertnym wukóncom dla zasudźi. 18lětny je před sudnistwom přiznał, zo bě 22lětnu loni w nowembru na parkowanišću do mjezwoča bił. Holca padny na to do komy, z kotrejež hižo njewotući.

Ludźi wuchowali

wutora, 16. junija 2015 spisane wot:
Berlin (dpa/SN). Němska fregata „Schleswig-Holstein“ je wčera w Srjedźnym morju 544 ćěkancow wuchowała. Ludźo, mjez nimi 61 dźěći, běchu z drjewjanymi čołmami z Libyskeje do Italskeje po puću. Dotal je marina 4 000 ludźi wuchowała.

słowo lěta 2020

nawěšk