Żagań (dpa/SN). Němska podpěruje plany USA k zaměstnjenju ćežkich bróni we wuchodnych čłonskich krajach NATO. „To je přiměrjena defensiwna naprawa“, rjekny zwjazkowa zakitowanska ministerka Ursula von der Leyen (CDU) wčera na prěnim zwučowanju noweje spěšneje zasadźenskeje jednotki NATO w Pólskej. Generalny sekretar NATO Jens Stoltenberg runočasnje připowědźi, zo chcył móžne brónjenje wuchodnych čłonskich statow přichodny tydźeń na zetkanju zakitowanskich ministrow aliancy tematizować. USA planuja wojerske nastroje, mjez druhim bojowe tanki, za něhdźe 5 000 wojakow do Pólskeje, Rumunskeje a do baltiskich krajow přepołožić. Tak měła so prezenca NATO w susodnych krajach Ruskeje zesylnić. Von der Leyen w tym zwisku na to skedźbni, zo wšak je tež zapadna Němska za čas zymneje wójny wot wojerskeje sylnosće USA profitowała. Nětko je wažne, zo so NATO wo wojerski škit wuchodoeuropskich krajow stara, dokelž čuja so wot Ruskeje po aneksiji połkupy Krim wojersce wohrožene.
Pětrohród (dpa/SN). Ruski prezident Wladimir Putin je dźensa k wobdźělnikam mjezynarodneho hospodarskeho foruma w Pětrohrodźe rěčał. Při tym rysowaše aktualne połoženje swojeho kraja, kotryž ćerpi hospodarsce niskeje płaćizny zemskeho wolija a mjezynarodnych sankcijow dla. Putin potwjerdźi, zo prócuje so dale wo dobre hospodarske zwiski k druhim krajam. Zdobom pak je zwólniwy za alternatiwami pytać, na přikład přez wuske hospodarske styki k Chinje a k raznje wuwiwacym so krajam w Južnej Americe. Na kromje foruma chce so Putin tež z grjekskim ministerskim prezidentom Alexisom Tsiprasom zetkać.
Třidnjowska konferenca w Pětrohrodźe je najwažniši hospodarski termin kraja. Wčera bě ruski energijowy zastaraćel Gazprom njewočakowano připowědźił, zo chcył wobstejacy wolijowód Nord Stream w Baltiskim morju rozšěrić, zo móhli jeho kapacitu powjetšić. To by na njedobro Ukrainy było, dokelž jeje wuznam jako transitny kraj tak woteběra.
Dlěje hač tydźeń je swójba z Hornjeje Frankskeje na popjelnicu zemrěteho nana čakać dyrbjała, dokelž Němski póst stawkuje. Paket z popjelnicu bě w centralnej rozdźělerni w bayerskim Neunkirchenje am Brand ležo wostał, dokelž jenož jedyn z cyłkownje 14 póstownikow dźěłaše. Dźensa dopołdnja su popjelnicu přepodali. Wotpósłali běchu ju srjedu tydźenja njedaloko Lipska.
Kupać so kaž w 19. lětstotku móža so ludźo wot dźensnišeho na biedermeierskim přibrjohu Schladitzskeho jězora njedaloko Lipska. Tamniše pobrjóžne towarstwo chce wječor lětnje zawjeselenje zahajić. Nimo kupanja poskića na přibrjohu tež koncerty a reje. Dźensa wočakuja tam wosebiteho hosća: Tež sakski premier Stanisław Tilich (CDU) chce sej kupanje w biedermeierskej modźe wobhladać.
MGO pyta noweho jednaćela
Kamjenc (SN/ch). 66 procentow wolerjow w Biskopicach je sej z Holgerom Großu noweho wyšeho měšćanostu wuzwoliło. 1. awgusta ma wot Zwjazka 90/Zelenych, CDU a FDP podpěrany kandidat zastojnstwo nastupić. Předchadnik Großy Andreas Erler chce jemu zastojnstwo hižo do toho zjawnje přepodać. Po intensiwnych rozmołwach ze sobudźěłaćerjemi radnicy chce so Große hnydom do dźěła dać. Jednaćelstwo Marketingoweje towaršnosće Hornja Łužica-Delnja Šleska (MGO) wón tuž wot awgusta hižo wukonjeć njemóže. Krajny rada Michael Harig, zdobom předsyda dohladowanskeje rady MGO, je jeje towaršnikow informował, zo Große zastojnstwo jednaćela złoži. Na zhromadźiznje towaršnikow – je to skupina wobeju lutowarnjow a krajneju radow wokrjesow Zhorjelc a Budyšin – ma so pozicija jednaćela MGO rozjimać a znowa wupisać.
Teledźěło wuspěšne
Europske mjeńšinowe prawo płaći, ale Grjekska abo Francoska so po nim nimatej. Tež Europski parlament naležnosći wočakowanu kedźbnosć njepřicpěwa. Połoženje je tuž ćežke.
Maja narodne mjeńšiny w Europje dosć skutkownu lobby? Na lětušim kongresu Federalistiskeje unije europskich narodnych mjeńšin (FUEN) w meji w zapadothrakiskim Komotiniju (Grjekska) wěnowaše so jedne z rozmołwnych kołow schadźowanja tutej tematice.
Loránt Vincze, wiceprezident FUEN a mjezynarodny sekretar Demokratiskeje aliancy Madźarow w Rumunskej (RMDSZ), je přeswědčeny: Mjeńšina přinjese towaršnosći nadhódnotu. Wobě stronje matej so wo zhromadne dźěło a mjezsobnosć prócować. 25lětne skutkowanje RMDSZ ma Vincze za poradźeny přikład. Prezident RMDSZ Hunor Kelemen wudospołni, zo „njeměještej dwaj milionaj etniskich Madźarow před 25 lětami žane zwjazki a žanu móžnosć publikowanja“. Přenjesene na europske měritko měli tuž mjeńšiny Europskej uniji kaž tež wšemu kontinentej nadhódnota być.
Brüssel/Berlin (dpa/SN/K). Čim bóle so z kóncom měsaca ultimatum nastupajo grjeksku krizu zadołženja dla bliži, ćim naležniše su prócowanja wo jeje rozrisanje. Dźensa schadźuja so w Luxemburgu financni ministrojo eurokrajow, zo bychu wo palacej naležnosći wuradźowali. Do toho běchu financni ministrojo Němskeje, Belgiskeje, Litawskeje a Słowjenskeje na Athen apelowali, spjelnić namjety za reformy, wujednane z jednotliwymi pjenjezydawarjemi. To je wuměnjenje, zo móhła Grjekska pomocne pjenjezy 7,2 miliardow eurow dóstać. Te wona nuznje trjeba, zo by 30. junija móhła měnowemu fondsej 1,6 miliardow eurow wróćić a tak statny bankrot wobeńć.