To a tamne (24.10.24)
Dramatisku wuchowansku akciju je młoda žona w awstralskim Hunter Valleyju přetrała. 23lětna chcyše swoje šmóratko wuchować, kotrež je so do škałby mjez hoberskimi kamjenjemi sunyło. Wona wisaše w škałby, noze hladachu z dźěry won. Sama njemóžeše so wuswobodźić a dyrbješe sydom hodźinow njepřijomnu situaciju zmištrować. Hakle potom so wuchowanskim pomocnikam poradźi, žonu ze škałby wućahnyć.
Po wopyće w Karlsruheskim zwěrjencu, hdźež běše sej Elina Öfele ze swojim synkom prózdnjeńcu njetopyrjow wobhladała, je doma překwapjenku dožiwiła. Tak je so njetopyr do jeje drastow zapopadnył. W prěnim wokomiku měješe to za žort, kotryž bě sej jeje mandźelski Halloweena dla dowolił. Tola zwěrjo so na raz hibaše.
Žarujemy wo Róžu-Mariju Kurfürstec-Pinkawinu
Hakle njedawno sym so čile rozmołwjała z Róžu Pinkawinej, a to na lětušej nazymskej wuprawje seniorow, čłonow Serbskeho šulskeho towarstwa z.t. do Bolesławieca. Chcyše dokładnje wšo nowe zhonić, štož so pola wuchodnych a južnych Serbow stawa, wosebje pak w župje „Jan Arnošt Smoler“ Budyšin, wšako běše wjacore lětdźesatki ze swěrnej čłonku župneho předsydstwa. Hakle před lětom je tutu wažnu funkciju swojemu wnučkej Floriane přepodała. Mjeno Róže Pinkawineje je zwjazane ze serbskim kulturnym a zjawnym dźěłom w cyłej Hornjej Łužicy, wosebje pak we Worcynskej a Wósporkskej kónčinje. Jeje wnučk Florian je nam zdźělił, zo je Róža Pinkawina dnja 22. septembra sćicha a pokojnje zemrěła.
Přepytuja prawicarjow
Wandlitz/Berlin (dpa/SN). Policija přepytowaše dźensa rano wjacore hodźiny twarjenja prawicarskeje sceny w Berlinje a Braniborskej. Dźewjeć muži w starobje mjez 16 a 23 lětami su wobwinowani, zdźěli rěčnik Berlinskeho statneho rěčnistwa. Jim wumjetuja rubježne wudrěwanje, strašne zranjenje ćěła, padustwo z brónjemi a přeńdźenja přećiwo zakonjej brónjow. Wobwinowani maja zdźěla zwiski k prawicarskoekstremnym organizacijam.
Naslědnika tohorunja morili
Tel Aviv/Beirut (dpa/SN). Israelske wójsko je morjenje pozdatneho naslědnika šefa Hisbollah Hassana Nasrallaha wobkrućiło a z nadběham na pro-iransku milicu w Libanonje pokročowało. Haschim Safi al-Din bu před něhdźe třomi tydźenjemi při nadběhu na hłowny kwartěr tajneje słužby Hisbollah morjeny, wójsko wčera wječor zdźěli. Šiitska milica njeje jeho smjerć dotal wobkrućiła.
Chce fonds zaso zawjesć
Ćmowe nocy na Kubje su prawdźepodobnje nimo. Po štyrjoch dnjach ma ...
Žane zhromadne dźěło z BSW
Drježdźany (dpa/SN). Něhdyši funkcionarojo sakskeje CDU so dale přećiwo móžnej koaliciji swojeje strony ze zwjazkarstwom Sahra Wagenknecht (BSW) wuprajeja. Skupina wokoło něhdyšeho zapósłanca zwjazkoweho sejma Arnolda Vaatza w lisće krajne předsydstwo CDU před zhromadnym dźěłom z BSW warnowaše. Centrala CDU spis mjeztym wobkrući. Kaž ze zjawneho lista wuchadźa, maja bywši funkcionarojo CDU Sahru Wagenknecht za „Neobolschewistku“, kotraž jako galionowa figura wustupuje. Město zwjazka z BSW žadaja sej woni mjeńšinowe knježerstwo.
Podpisali su list mjez druhim bywši prezident krajneho sejma Matthias Rößler a bywši Drježdźanski wyši měšćanosta Herbert Wagner. Wonaj zdobom kritizuja, zo politikarjo CDU krajneho sejma murju přećiwo AfD rigoroznje zakituja.
Před něšto dnjemi běchu hižo něhdyši čłonojo CDU z Lipšćanskeho ruma, mjez nimi bywšej sakskaj ministraj Manfred Kolbe a Frank Kupfer, za dialog z AfD wabili.
Znowa aktiwistow lepili a zajeli
Grünheide (dpa/SN). Policija je blisko fabriki Tesle w Grünheide zakročiła a štyrjoch aktiwistow přechodnje zajała. Tući su sej na bagry zalězli. Kaž zastojnicy po kontroli personalijow zwěsćichu, su wšitcy štyrjo mužojo pod 30 lětami. Nimo toho přepytowaše policija, hač su dźěłowe nastroje wobškodźene, a pruwowaše chłostajomnych njeskutkow dla.
Přećiwnicy twornje, hdźež produkuja elektroawta Tesle, běchu wčera rano na bagry zalězli, zo bychu přećiwo rozšěrjenju twornje protestowali. Bagry běchu blisko twornje w lěsu, hdźež so tuchwilu rozšěrjenje fabriki přihotuje.
Po słowach braniborskeho wobchadneho ministerstwa tam pasmo realizuja, hdźež ma twarski puć Němskeje železnicy mjez krajnej dróhu a awtodróhu nastać. Předewšěm je naprawa za twar dwórnišća trěbna.
Hižo před někotrymi tydźenjemi běchu aktiwisća protesta přećiwo Tesli dla bager a štom wobsadźili. Tež wobydlerska iniciatiwa je so wutworiła, kotraž chce rozšěrjenju twornje zadźěwać.
Zniči Lafontaine CDU?
Jednanje zahajene
To a tamne (23.10.24)
Hižo dwě lěće přenocuje sorna na zapadźe Schleswigsko-Holsteinskeje w bydlenskej stwě swójby. Wodnjo pak so zwěrjo z mjenom Timmi z tamnymi sornami po přirodźe honi. Jako młodźato je swójba njezboža dla młodu sornu přiwzała a je z mlokom zastarała. Poprawom chcychu młodźato zaso do přirody pušćić, čemuž pak so Timmi wobaraše. Mjeztym ma zwěrjo transponder. Tak swójba stajnje wě, hdźe Timmi je. Tež hajnicy jeho na nastroju spóznawaja.
Kwas a wšitke wažne etapy swójskeho žiwjenja a stawiznow je dźensa 67lětny Italčan Luciano d’Adamo prosće zabył. Na 39 lět swojeho žiwjenja wón žanych dopomnjenkow nima. Njezboža w lěće 2019 dla ma amneziju. Na šmóratko abo měnu euro dyrbješe so najprjedy zaso zwučić.
Dźěłowy čas so změnja
Wiesbaden (dpa/SN). Podźěl dźělnje přistajenych je dale a wjetši a dźěłowy čas połnje přistajenych woteběra, zdźěli dźensa zwjazkowy statistiski zarjad ze sydłom we Wiesbadenje. Po dopóznaćach z najnowšeho mikrocensusa dźěłachu połnje přistajeni loni 39,8 hodźinow wob tydźeń. To je nimale hodźina mjenje hač w lěće 2011, jako přerěznje hišće 40,7 hodźinow dźěłachu. Dźěłowy čas dźělnje přistajenych pak je wot 18,2 na 21,2 hodźin wob tydźeń přiběrał.
Pjenjezy a złoto pod chorownju
Tel Aviv/Beirut (dpa/SN). Proiranska milica Hisbollah je po informacijach israelskeho wójska w bunkeru pod chorownju libanonskeje stolicy Beiruta pjenjezy a złoto w hódnoće wjacorych stow milionow dolarow schowała. Rěčnik wójska Daniel Hagari libanonske knježerstwo a mjezynarodne organizacije na to skedźbni, zo wužiwa Hisbollah tute zamóženje za teror a nadpady přećiwo Israelej. Israel ležownosć al-Sahel-kliniki na juhu Beiruta dokładnje wobkedźbuje.
Na Brics-zetkanje přeprosył
