To a tamne (16.10.24)
Wobručowa pana je pola třoch muži w Neumarktće w Hornjej Pfalcy swojoraznu ideju zbudźiła: Woni pokradnychu koleso parkowaceho awta a je při swojim awće přišrubowachu. Swědkojo tole wobkedźbujo informowachu policiju. Ta paduchow na bliskej awtodróze A3 lepi. Mužojo w starobje mjez 36 a 43 lětami mějachu samo hišće šruby kolesa při sebi. Wšěch třoch nachwilnje zajachu.
Na wšěch 24 000 šrubow je britiski wuměłc Darren Timby w sewjerowuchodnym Sunderlandźe trjebał, zo by legendarnych Beatlesow zwobraznił. Wuměłc dźěłaše něhdźe 120 hodźinow na swojoraznej twórbje. Ta je zdobom wuznaće k industrijnemu městu, kotrež je wusko z łódźnistwom, hórnistwom a woclowej industriju zwjazane. Železny wobraz štyrjoch hudźbnikow je 1,80 metrow šěroki a 90 centimetrow wysoki.
Israel chce so wobmjezować
Washington (dpa/SN). Israel chce so při swojej planowanej wojerskej wjećbje přećiwo Iranej na ryzy wojerske objekty wobmjezować a njebudźe so atomowych a wolijowych objektow dótkać. Tole je israelski ministerski prezident Benjamin Netanjahu prezidentej USA Joewej Bidenej telefonisce přilubił, medije USA rozprawjeja. Před tydźenjomaj bě Iran Israel z něhdźe 200 raketami nadpadnył. Wot toho časa planuje Israel wjećbu.
Harris staja so prašenjam
Washington (dpa/SN). Demokratiska prezidentska kandidatka USA Kamala Harris dawa konserwatiwnemu sćelakej Fox News prěni interview. Rozmołwu chcedźa jutře wječor wusyłać. Je to prěnja dlěša rozmołwa Harris z konserwatiwnym sćelakom, po tym zo je jako kandidatka nastupiła. Medije jej wumjetuja, zo so kritiskim prašenjam wuwinje. Při wólbach 5. nowembra wočakuja snadny rozdźěl mjez njej a kandidatom republikanow Donaldom Trumpom.
SPD chce dawk na zamóženje
Roznjemdrjeny pro-israelski demonstrant wurěčuje so z policistami w ...
Bywši oficěr stasi zasudźeny
Pólska: Prawo na azyl zběhnyć
Waršawa (dpa/SN). Pólske knježerstwo je dźensa wo tym wuradźowało, prawo na azyl nachwilnje zběhnyć. Po tutym puću chcedźa so ilegalnej migraciji wobarać, ministerski prezident Donald Tusk připowědźi. Pólska ruskemu prezidentej Wladimirej Putinej a běłoruskemu prezidentej Alexanderej Lukašenkej wumjetuje, zo sćeletaj migrantow zaměrnje w organizowanej formje k wuchodnej mjezy Pólskeje, kotraž je zdobom wonkowna mjeza Europskeje unije.
Rěčnica komisije EU w Brüsselu na to skedźbni, zo su wšitke kraje EU na zakładźe zhromadnych směrnicow winowate, za škit pytacym přistup k azylowym jednanjam we wobłuku EU zmóžnić. To płaći tež za nowe pólske knježerstwo.
UNO kritizuje nadpad na wojakow
New York (dpa/SN). Po wospjetnym wobtřělenju zepěranišćow měrowych jednotkow UNO w Libanonje (Unifil) je Bjezstrašnostna rada UNO swoje starosće nastupajo wěstotu tam słužbu wukonjacych wojakow wuprajiła. „Namołwjamy wšitke wobdźělene strony, wěstotu personala a objektow Unifil respektować“, zdźěli wulkopósłanča Šwicarskeje Pascale Baeriswyl jako amtěrowaca prezidentka bjezstrašnostneje rady w mjenje wšěch 15 čłonow. Wojacy UNO njesměli so z cilom nadpadow stać, wona rjekny.
Mjeztym je israelski ministerski prezident Benjamin Netanjahu wumjetowanja wotpokazał, zo israelske wójsko zepěranišća Unifil wotpohladnje nadběhuje. Netanjahu UNO znowa namołwješe, wojakow měroweje misije wotćahnyć. W pomjeznej kónčinje mjez Israelom a Libanonom słuži wjace hač 10 000 wojakow z 50 krajow. Mjez nimi su tež wojacy zwjazkoweje wobory. Wojacy su tam wot lěta 1978 zasadźeni.
Minjeny čas běchu so při třěleńcach štyrjo wojacy UNO zranili.
Antisemitizm Lěwicy je tema
Zamołwići strony hotuja so na rozestajenje na zjězdźe w Halle
Berlin (dpa/SN). Zapósłanča Lěwicy a bywša krajna předsydka Katina Schubert je so znowa za jasne wotmjezowanje wot kóždehožkuli antisemitizma wuprajiła. „Tójšto migrantow runje dožiwja, zo steja pod generalnym podhladom, zo su antisemića a zo Israel hidźa. To wězo njetrjechi“, rjekny Schubert w rozmołwje z časopisom Spiegel. „Widźimy pak tež solidarizowanje z Palestinjanami a złahodnjenje namocy. A mamy tohorunja dźěl muslimskeje zhromadnosće, kotraž je jasnje antisemitiska.“
Najskerje je tutón podźěl jara snadny. „Znaju pak někotrych, kotřiž nochcedźa tole słyšeć, tež mjez nami. Štož Hisbollah a Hamas činitej, je islamski terorizm“, rjekny Schubert, kotraž je tež zastupowaca zwjazkowa předsydka a komisariska zwjazkowa jednaćelka. „Z toho nikoho njewuswobodźimy.“
Namjety a žadanja
Tesla robotaksi předstajił
Los Angeles (dpa/SN). Šef koncerna Tesla Elon Musk je dołho připowědźeny robotaksi twarca elektroawtow předstajił. Jězdźidło z mjenom „Cybercab“ ma dwoje horje so wočinjace křidłojte durje a wupada kaž coupé na zakładźe wuspěšneho awta Tesle Model 3.
Tesla chce prawdźepodobnje 2026 započeć, tute awta twarić, Musk připowědźi. „Cybercab“ ma tež na předań być a mjenje hač 30 000 dolarow płaćić. Najprjedy pak chcedźa software za awtonomne jězdźenje, při kotrymž njetrjeba čłowjek wjace zapřimnyć, w aktualnych jězdźidłach modelow 3 a Y w Texasu a w Kaliforniskej na dróhach zasadźić.
Musk prezentowaše na ležownosći Hollywoodskeho studija Warner Bros. tež mały bus z mjenom „Robovan“ za 20 wosobow. Minjeny čas bě Musk stajnje zaso připowědźił, zo je Tesla na najlěpšim puću, same jěduce awta we wulkej měrje zasadźić. Dotal pak eksistuja jenož asistencne systemy, při kotrychž dyrbi šofer za wodźidłom zamołwitosć přewzać.
Druhe koncerny kaž Waymo dawno wuspěšnje awtonomne jězdźidła zasadźuja, mjez druhim w San Francisco.
