Knježerstwo spěšnje wutworić
Sypnjeny dźěl mosta dale rumuja
Šmóratka na šulach zakazali
To a tamne (11.10.24)
Kuriozny pad w zwisku z ilegalnej migraciju w Letiskej zjawnosć kraja a medije zaběra. Po hodźiny trajacej honjeńcy je policija skupinu 46 ludźi zajała. Tući běchu mjezu ilegalnje překročili a ćěkachu před policiju w napodobnjenym policajskim awće. „Kak móže so stać“, prašeja so nowiny, „zo wudawamy hoberske sumy za płoty, zadźěwki a betonowe bloki. Samsny čas jědu migranća z jězdźidłom w barbach policije prosće po kraju“?
W Němskej dale a wjace awtow pokradnu. Po informacijach zwjazkoweho kriminalneho zarjada su loni 15 924 wosobowych awtow pokradnyli, dźewjeć procentow wjace hač w lěće 2022. Policija wobkedźbuje tež nowe postupowanje paduchow. Přiběrajcy zadobywaja so do bydlenjow, zo bychu kluče awtow pokradnyli a z nimi wotjěli. Zasadźuja tež škričkowe nastroje k wotamknjenju awtow.
Dalši kredit Ukrainje
Brüssel (dpa/SN). Zastupnicy čłonskich krajow EU su puć na dobro dalšeje pjenježneje pomocy Ukrainje runali. W Brüselu schwalene dojednane přewidźi, wot Ruskeje nadpadnjenemu krajej kredit 35 miliardow eurow přizwolić. Wotpłaćić chcedźa jón z danjemi, kotrež wuzbytkuja z blokowanymi pjenjezami ruskeje centralneje banki. We wobłuku sankcijow přećiwo Ruskej su něhdźe 210 miliardow eurow ruskeje centralneje banki w Europje blokowali.
Žadaja sej rozsud čłonow FDP
Neu-Isenburg (dpa/SN). Čłonojo FDP znowa spytaja, nawodnistwo strony z pomocu čłonskeho wobzamknjenja k tomu nuzować, amplowu koaliciju wopušćić. Předsyda měšćanskeho zwjazka FDP w hessenskim Neu-Isenburgu, Ulf Kasimir, a wokrjesna předsydka Susann Gruber na internetnej stronje čłonow strony namołwjataj, wotpowědnu próstwu podpisać. Rozsud je płaćiwy, hdyž jón pjeć procentow čłonow strony podpěruje.
Mortwi při ruskim nadpadźe
Hišće raz kročili su mnozy wčera po puću historiskeje ...
Israel wuradźuje wo wjećbje
Sejm: Sudnistwo lěpje škitać
„Milton“ sej prěnje wopory žadał
Tampa (dpa/SN). W zwisku z hurrikanom „Milton“ rozprawjeja medije USA wo prěnich smjertnych woporach w zwjazkowym staće Florida. Tornado, kiž je tam hurrikana dla cychnował, je wjacorych ludźi morił. Wjedrarjo su cyłkownje 19 tornadow zličili.
„Milton“ bě wčera wječor jako hurrikan třećeje najsylnišeje kategorije Floridu docpěł. Byrnjež so orkan wosłabił, wón přeco hišće z wichorami spěšnosće 165 km/h zachadźa. Přichodne dny poćehnje „Milton“ dale do susodnych krajow.
W měsće St. Petersburg (Florida) su wodu wotstajili, po tym zo bě so centralny wodowód puknył. Ludźo dyrbja pitnu wodu wotwarić, měšćanski zarjad zdźěla. Wodowód chcedźa porjedźeć, ručež je wěstota dźěłaćerjow zaručena. W St. Petersburgu bydli něhdźe 260 000 ludźi.
Medije rozprawjeja wo powalenych štomach, wotłamanych milinowych sćežorach a zapławjenjach we wjacorych městach Floridy. Wjace hač 2,6 milionow domjacnosćow je bjez miliny.
Zelenskyj přijědźe do Berlina
Wjeršk w Ramsteinje wotprajeny – Ukrainski prezident pola Scholza
Berlin/Ramstein (dpa/SN). Najebać přestorčene wjerškowe zetkanje na dobro Ukrainy w Ramsteinje chce ukrainski prezident Wolodymyr Zelenskyj do Němskeje přińć. Po informacijach powěsćernje dpa chce so wón jutře w Berlinje ze zwjazkowym kanclerom Olafom Scholzom (SPD) a zwjazkowym prezidentom Frankom-Walterom Steinmeierom zetkać. Je to druhi wopyt Zelenskeho w Němskej w běhu pjeć tydźenjow.
Rozkaznistwo zepěranišća USA w Ramsteinje bě wčera wozjewiło, zo njebudźe so prezident USA Joe Biden hurrikana „Miltona“ w Floridźe dla na wjeršku wobdźělić. W Ramsteinje chcyše wón zhromadnje ze statnymi šefami 20 krajow wo dalšej pomocy Ukrainje w boju přećiwo ruskemu nadpadej wuradźować. W tym zwisku su tež wopyt Bidena pola Steinmeiera a Scholza wotprajili. Zwjazkowy kancler ma zrozumjenje za rozsud prezidenta USA. „By-li w našim kraju tajke njewjedro cychnowało, bych runje tak rozsudźił“.
Kontaktnej skupinje NATO přisłuša 50 krajow. Woni koordinuja wojersku pomoc za ukrainske wójsko.
