Němski kolesowar Florian Lipowitz je wulka překwapjenka lětušeje ...
Wotsunjeni po puću do Kabula
Berlin (dpa/SN). Druhi króć po tym, zo su talibanojo w awgusće 2021 w Afghanistanje móc přewzali, je Němska afghaniskich staćanow do jich domizny wotsunyła. Lětadło z 81 ludźimi je dźensa z Lipska wotlećało, rěčnica zwjazkoweho nutřkowneho ministerstwa zdźěla. Pasažěrow běchu z wjacorymi busami na lětanišćo dowjezli. Krótko po 7 hodź. prěni z nich do mašiny předewzaća Qatar-Airways zalězechu. Znajmjeńša jedyn z nich měješe noze sputanej. Po informacijach ministerstwa jedna so wo ludźi, kotřiž su w Němskej chłostajomne njeskutki skućili a kiž dyrbja kraj wopušćić.
Němska nima žadyn diplomatiski zwisk k talibanam w Kabulu. Katar skutkuje nastupajo wotsunjenje jako posrědnik.
Trump akty wozjewi
Washington (dpa/SN). Tak mjenowaneje afery Epstein dla pod ćišćom stejacy prezident USA Donald Trump chce po swójskich wuprajenjach někotre juristiske podłožki w padźe zemrěteho seksualneho złóstnika wozjewić. „Hladajo na hobersku kedźbnosć, kotruž zjawnosć Jeffreyjej Epsteinej wěnuje“ je wón generalnu statnu rěčnicu Pam Bondi prosył, „wšě relewantne wuprajenja“ přepytowanskeje komisije zjawnje spřistupnić.
Trump bě we wólbnym boju připowědźił, zo chce wšitke podłožki w padźe Epstein předpołožić. Dźe wo złóstnistwa znjewužiwanja a wumocowanja małolětnych holcow, kotrež bě Epstein organizował. Po rešeršach medijow słušeše tež Trump do kruha prominentnych, kotřiž běchu so na partyjach Epsteina wobdźělili. Epsteina běchu 2019 zajeli a krótko po tym wobwěsnjeneho w jastwowej celi namakali. Po oficialnych informacijach bě sej wón žiwjenje wzał.
Demo přećiwo kontrolam
Ministrojo na najwyšej horje
Grainau (dpa/SN). Zwjazkowy minister za nutřkowne naležnosće Alexander Dobrindt (CSU) je dźensa swojich kolegow w zastojnstwje na najwyšej horje Němskeje Zugspitze witał. Hłowny zaměr zetkanja je zhromadna deklaracija, z kotrejž žadaja sej ministrojo raznišu europsku migracisku politiku.
Mjez přeprošenymi su ministrojo z Francoskeje, Pólskeje, Awstriskeje, Danskeje a Čěskeje kaž tež komisar EU za nutřkowne naležnosće Magnus Brunner. Zwjazkowe knježerstwo chce azylowe prawo „přiwótřić a skrućić“, bě Dobrindt w rozmołwje z časopisom Focus rjekł. „Hišće w juliju zahajimy zhromadnu iniciatiwu z pjeć krajemi, zo bychmy napřećo Europskej komisiji jasne stejišćo zwuraznili.“ Wobsahowje dźe wo škit wonkownych mjezow EU a wo móžnosć, migrantow tež do krajow wotsunyć, ke kotrymž woni žadyn poćah nimaja.
Nowe pomjezne kontrole Němskeje su w susodnych krajach iritacije zbudźili. Přezjedni pak sej wšitcy su, zo měli so wonkowne mjezy EU lěpje škitać.
Słowakska blokadu skónčiła
Nowe sankcije EU přećiwo Ruskej po přizwolenju Bratisławy wobzamknjene
Brüssel (dpa/SN). Zastupnicy čłonskich statow EU su na swojim wurjadnym posedźenju dźensa dalše sankcije přećiwo Ruskej wobzamknyli. Přičina je wójna Moskwy přećiwo Ukrainje. Je to mjeztym 18. paket naprawow EU.
Słowakski ministerski prezident Robert Fico bě do toho njewočakowano připowědźił, zo swoju blokadu přećiwo nowym sankcijam EU přećiwo Ruskej skónči. Wón je zastupnikam Słowakskeje kazał, hižo dźensa nowemu, mjeztym 18. pakćikej sankcijow přećiwo Ruskej přihłosować, Fico w interneće zdźěli.
Za zajimy Słowakskeje jako čłona EU by „kontraproduktiwne“ było, postupowanje dale blokować. Pozadk Ficoweho dotalneho spjećowanja bě zwada wo wukaz EU, po kotrymž měł so import ruskeho zemskeho płuna wot lěta 2028 skónčić. Słowakska je w dalokej měrje wot ruskeho płuna wotwisna.
Při tym Słowakska poprawom scyła ničo přećiwo sankcijam njeměješe. Knježerstwo w Bratisławje pak chcyše ze wšej mocu wotwobarać, zo je kraj wot lěta 2028 bjez płuna, štož by mjez wobydlerjemi wulki njeměr zbudźiło.
Almsick so nad złotom wjeseli
Stuttgart (dpa/SN). Franziska van Almsick je sej wěsta, zo je němski płuwanski sport na dobrym puću. „Wjeselu so jara nad wuwićom. Złota medalja Floriana Wellbrocka na čarje dźesać kilometrow bě wulkotna. Takle móža so swětowe mišterstwa započeć“, rjekny 47lětna bywša swětoznata płuwarka w rozmołwje z powěsćernju dpa k nowej dokumentaciji „Being Franziska van Almsick“, kotruž pokazaja wot 4. septembra w mediatece ARD a 21. septembra w telewiziji.
W Singapurje bě sej Florian Wellbrock z Magdeburga předwčerawšim, srjedu, prěni dźeń swětowych mišterstwow titul WM w morju wubědźił. Wčera bě wón na čarje pjeć kilometrow wuspěšny.
Almsick ma pozitiwne wuwiće w płuwanskim sporće za wulkotne. „Běch loni přemóžena, jako je Lukas Märtens prěnju olympisku medalju za Němsku po 36 lětach w basenku zdobył. Njejsym so jenož wjeseliła, dokelž je wón čłowjesce w porjadku, ale tež, zo je wón prěnju złotu medalju za cyle němske mustwo při olympiskich hrach domoj přinjesł.“ Almsick je dźesać olympiskich medaljow dobyła a bydli dźensa w Heidelbergu.
Festiwal ze serbskim filmom zahajili
To a tamne (18.07.25)
Felix Baumgartner, awstriski ekstremny sportowc, je smjertnje znjezbožił, jako ze swojim płujadłowym parašutom lećeše. 56lětny zrazy z dotal njeznateje přičiny w italskim pobrjóžnym městačku Adrije, Porto Sant‘Elpidio, na zemju, kaž policija zdźěla. Awstričan bu 2012 po wšěm swěće znaty, jako ze stratosfery na zemju skoči a jako prěni čłowjek zwukowu murju přewiny.
Wolfgang Grupp, bywši šef koncerna Trigema, je spytał sej žiwjenje wzać a je tole mjeztym wozjewił: „Sym w 84. lěće swojeho žiwjenja a ćerpju na tak mjenowanej depresiji starych ludźi. Tohodla sym spytał swoje žiwjenje skónčić“, piše 83lětny w lisće swojim něhdyšim sobudźěłaćerjam. Wón bě so prašał, hač je scyła hišće trěbny. Grupp wobžaruje, štož je so stało, a radźi wšitkim potrjechenym, sej profesionalnu pomoc pytać.
Tójšto mortwych w Syriskej
Damaskus (dpa/SN). Po dny trajacych namócnosćach na juhu Syriskeje su jednotki syriskeho knježerstwa městačko Suwaida, w kotrymž bydla Druzojo, zaso wopušćili. Ličba smjertnych woporow je mjeztym na 360 rozrostła. Po wudyrjenju namocy mjez Druzami a sunitiskimi Beduinami je syriske knježerstwo wójsko pósłało. Israel praji, zo je za škit Druzow zamołwity. Tohodla je objekty w syriskej stolicy Damaskusu bombardował.
Poćahi do Londona pohłubša
London (dpa/SN). Němska a Wulka Britaniska pohłubšitej swoje poćahi z wobšěrnym zrěčenjom wo mjezsobnym přećelstwje. Zwjazkowy kancler Friedrich Merz (CDU) je so dźensa do Londona podał, zo by 27 stron wopřijacy dokument zhromadnje z britiskim premierministrom Keirom Starmerom podpisał. Zrěčenje tematizuje wosebje zhromadne dźěło we wonkownej a wěstotnej politice. Krajej chcetej sej w padźe nadpada pomhać.
UNO kritizuje Israel
