Lodowe lawy Drježdźany –

Łužiske lodohokejowe liški 4:0 (1:0, 0:0, 3:0)

Nětko su Łužiske liški tam, hdźež nochcychu wjac stać, w zestupnym boju. Hra započa so na woběmaj bokomaj měrnje. W druhej mjeńšinje přesadźi so prěni pospyt Drježdźanjanow, tola Nikita Quapp kedźbowaše. Potom pósłachu Juliana Wäsera dla stajenja nohi na chłostansku ławku. Tola defensiwa Liškow ani jeničku šansu na wrota njedopušći. Drje běchu Drježdźanscy aktiwniše mustwo, ale woni sej najprjedy žane šansy nadźěłać njemóžachu. W šestej mjeńšinje přińdźeštaj sej Breitkreuz a Knackstedt trochu pře blisko a podaštaj so za dwě mjeńšinje na chłostansku ławku. Hakle nětko bu napjećišo před wrotami. Najprjedy wotfalšowa Tom Knobloch třělwu Mateja Mrazeka strašnje před klětku hosći a potom zwrěšći Roope Mäkitalo na Janicku Schwendeneru. A jenož krótko na to nawjedowachu Drježdźany přez Johana Porsbergera (9.). Tomáš Andres ćehnješe do nadběhoweje třećiny, wokoło wrotow a suny tačel na třělca wrotow, kiž wysoko zatřěli. Ze zastatkom 0:1 dźěše do prěnjeje přestawki.

Bohužel nasta w běhu hry přećiwo Selbskim wjelkam pjatk w lodowej arenje negatiwny podawk mjez přihladowarjemi. Zawinowar tutoho rozestajenja bu spěšnje zwěsćeny a z lodoweje areny wupokazany. Ze stron Běłowodźanow bu wón ze stadionowym zakazom pochłostany. K tomu bu přez škodowanu wosobu wozjewjenje delikta zapodaty. Dale dóńdźe po hrě zwonka lodoweje areny k rozestajenjam. Zawołana policija zakónči tute, na kotrejž běchu čornje zdrasćene a zdźěla zakuklene wosoby a fanojo Selbskich wjelkow wobdźělene. Fanojo hosći, kotřiž pobychu na puću k swojemu busej, buchu po informacijach policije wot něhdźe 15 wosobow nadpadnjeni. Łužiske liški zasudźeja tajke wašnje jednanja a distancuja so wot tajkich pozdatnych fanow. Namóc nima w a wokoło stadijow ničo pytać a skućićeljo so wotpowědnje pochłostaja. We wuhódnoćenju tutych podawkow su Łužiske liški a policija w stajnym kontakće. Při tutej składnosći chcedźa zamołwići zjednoćenstwa hišće raz na to skedźbnić, zo Łužiske liški tajke akcije njeakceptuja.

kopańca, wokrjesna liga, stafla I

1. Arnsdorfske KT 13 34 : 16 29

2. Bretnig-Hauswalde 13 41 : 22 26

3. TSV Połčnica 13 38 : 24 26

4. ST Bart 13 20 : 24 23

5. HZ Huska/Hodźij 13 33 : 23 22

6. TSV Wjazońca 13 31 : 23 21

7. Traktor Malešecy 13 23 : 16 21

8. TSV Wjernarjecy 13 35 : 35 17

9. ST Kubšicy 12 20 : 20 17

10. Zeleno-běli Bukecy 13 24 : 25 16

11. HZ Frankenthal 13 15 : 26 11

12. SV Haselbachtal 13 16 : 27 10

13. ST Wjelećin 12 20 : 37 8

14. Kumwałd/Schönbach 13 21 : 53 7

wokrjesna liga, stafla II

1. ST Hlinowc 13 56 : 7 39

2. Natw. Němske Pazlicy II 13 39 : 13 31

3. LSV Hory 13 45 : 28 28

4. ST Marijina hwězda 13 30 : 20 26

5. FSV Łuty 13 25 : 19 23

6. ST Lubuš 13 35 : 22 21

7. Módro-běli Minakał 13 33 : 29 19

8. Wóslink/Skask./Kul. II 13 22 : 32 17

9. ST Wulka Dubrawa 13 22 : 27 16

10. SJ Chrósćicy II 13 19 : 37 11

11. Wojerowski FC II 13 20 : 28 10

12. Rakečanske ST II 13 25 : 56 8

13. SJ Njebjelčicy 13 14 : 37 5

Dokelž je so posledni hrajny dźeń w starym lěće chorosće dla wotprajić dyrbjał, wjeselichu so hrajerjo Marijneje hwězdy čim bóle na prěnju hru w nowym lěće. A zo móžeše so ta w domjacej hali wotměć, bě wězo wosebje rjenje. Štwórtk wječor witachu Pančenjo, kiž stejachu na štwórtym městnje, prěnjeho a poslednjeho w tabulce.

ST Marijina hwězda –

Šumbachske WT 2:0 (25:14, 25:13)

Přećiwo cyłkej ze Šumbacha běchu klóšterscy hrajerjo hižo někotre razy dobyli. Tuž bě dobyće před domjacej kulisu jasny zaměr hrajerjow. Tola dołha hrajna a treningowa přestawka přez hodowny čas njewosta bjez sćěhow. Wustupowanje Pančanow bě wšo druhe hač wěste a sebjewědome. Mějachu drje konsekwentnje přez cyłu hru wjacore dypki předskoka a dobyće njebě w žanym času wohrožene. Ale falowaše prawy ćišć při saku kaž tež trěbna agilnosć a bojownosć w zadnym polu. Hrajerjo skutkowachu tróšku strachoćiwi a njekoncentrowani. A tola poradźi so mustwu jasne dobyće prěnjeje sadźby.