Awtor dźensa Jurij Bjeńš

Pjatk wječor pobychmy po dołhim času zaso raz w Běłej Wodźe, zo bychmy sej Łužiske lodohokejowe liški wobhladali. Lodohokejowa sezona je wšak so před třomi tydźenjemi zaso zahajiła a tuž tłóčachmy druhemu zwjazkowemu ligistej z Łužicy w lodowym stadionje palcy, zo domjacu hru přećiwo Bad Nauheimej dobudźe. Tola hosćo z Hessenskeje běchu na kóncu zbožowniše mustwo a duel z 1:0 za sebje rozsudźichu. Byrnjež jenož jedne wrota padnyli, běše duel na lodźe chětro horcy, emocionalny a hač do poslednjeje sekundy napjaty. Tójšto sylnych čekow při bandźe, mnoho šansow na woběmaj stronomaj a tři mjeńše rozestajenja mjez hrajerjemi běchu přičina, zo so tež w fanowym bloku Łužiskich liš­kow chětro warješe. Tón wšak je tak a tak jedyn z najwótřišich cyłeje ligi. A to bě pjatk wječor zaso raz pytnyć. Tež 10 hóstnych fanow, kiž stejachu pódla nas, přeco zaso swoje šmóratko ze zaka wućahnychu a łužiski fanowy blok filmowachu. Móžu kóždemu doporučić, sej tež raz do Běłeje Wody dojěć a tónle sportowy event live dožiwić. Domjace hry su tam stajnje pjatk abo njedźelu wječor.

Wulki derby we wyšej lize

We wyšej lize su hosćo z Biskopic njedźelu w Budyšinje jasny faworit. Hišće njeporažene mustwo trenarja Franka ­Ričela nastupi pola cyłka Budissy Budyšin, kotryž bědźi so hižo wot spočatka sezony ze zranjenymi hrajerjemi. Přećelskej hrě so jutře njedźelu tež přewjedźetej. W Radworju nastupi připołdnju młodźina B z Kakasd a popołdnju mužojo.

1.10. 14:00 Jednota Kamjenc –

  Drježdźany 06 Laubegast

1.10. 15:00 Rakečanske ST –

  FSV 1990 Nowosólc-Hrodk

1.10. 15:00 SC 1911 Großröhrsdorf –

  Sokoł Ralbicy/Hórki

1.10. 15:00 HZ Wóslink/Skaskow/

  Kulow II – SJ Njebjelčicy

1.10. 15:00 ST 1896 Wulka Dubrawa –

  SJ Chrósćicy II

1.10. 15:00 HZ Mały Wosyk/Pančicy II

  – HZ Wulka Dubrawa II/

  Radwor II

2.10. 11:00 ST Jednota Kamjenc II –

  HZ Ralbicy II/Njebjelčicy II

2.10. 13:00 ST Radwor B – Kakasd B

2.10. 13:00 Budissa Budyšin –

  Biskopičanske KT 08

2.10. 14:00 ST Marijina hwězda –

  ST Lubuš

2.10. 15:00 ST Radwor – Kakasd

Běh wo pokal zbóžneho Alojsa

Póndźelu změja w Radworju zaso ­wjacore běhi wo pokale zbóžneho kapłana Alojsa. Hišće su přizjewjenja za ­čary 500 m, 1 000 m, 1 500 m, 2 000 m, 4 000 m a 6000 m pod móžne. Započatk budźe 3. oktobra wot ­9 hodź. na Radworskim sportnišću.

Hra legendow jako absolutny wjeršk lodohokejoweje party k 90. jubilejej lodohokeja w Běłej Wodźe slubješe wjele a to tež dodźerža. W nimale dospołnje wupředatej liščej jamje traješe jeničce hižo předstajenje protagonistow, kotřiž běchu něhdy raz přećiwnicy na lodźe, poł hodźiny. Jako prěnjeho hrajerja wuwoła reaktiwěrowany stadionowy rěčnik Andreas Friebel Wolfganga Plotku na lód. Něhdy w Běłej Wodźe njerady widźany hrajer a pozdźiši sudnik postara so přeco zaso wo momenty za husacu kožu. Dokelž je ,,młody spunt‘‘ nětko hižo 81 lět stary, bě wón chětro agilny a dósta runje telko zasadźenskeho časa, kaž druzy. Chapeau! Na dobre, cyle stare časy dopominaštaj k tomu Reinhard Fengler a Friedhelm „zick-zack“ Bögelsack. Młodu Dynamo-Berlin-generaciju reprezentowachu na přikład André Rankel, Sven Felski abo Jens Baxmann. Baxmann njeběše jenički z łužiskeho lěhwa, kotryž bě hosći z Berlina podpěrał. Tež wrotowy trenar Sakari Lindfors a Petteri Väkiparta nadběhowaštaj za Dynamo z Berlina. Mustwo liškow měješe 21 akterow w swojich rjadach.

W Ralbicach maja Sokoljo tučasnje pola młodźiny E telko hrajerjow, zo wutworichu do noweje hrajneje doby hnydom tři mustwa. Tuž bě trjeba, sej nowe trikoty kupić. Tute dari mustwu E2 Friedrich Brumme z Worklec, kotryž ma we Wojerecach dawkowy běrow. Jeho syn Emil w Ralbicach za bulom honi. Nic trikoty, ale nowe małe wrota dóstachu mali bulkoparjo. Je dari młodym sportowcam firma K.IM.S.GmbH ­ze Sernjan, kotraž zhotowja basenki a poole za kupanje. Sokoljo z Ralbic chcedźa so na tutym městnje pola darićelow podźakować. Foto: Jurij Bjeńš