Rekordnje mało bjezdźěłnych

štwórtk, 14. septembera 2017 spisane wot:

Praha (ČŽ/K/SN). Kwota bjezdźěłnosće je w Čěskej w awgusće porno julijej wo dalšu dźesaćinu procenta spadnyła a wučinja tuchwilu runje snadne štyri procenty, kaž Čěski dźěłowy zarjad wozjewja. Dźěło pyta po jeho wudawanju 296 826 ludźi, štož je porno samsnemu časej lěta 1998 najniši staw. „Samo za čas prózdnin ličba dźěłopytacych woteběra“, rjekny direktorka centralneje dźěłoweje instancy Kateřina­ Sadílková. To swědči po jeje hódnoćenju wo dobrym stawje čěskeho hospodarstwa, ale tež wo spomóžnym skutkowanju dźěłowych zarjadow.

Najmjenje bjezdźěłnych stej w awgusće wupokazowałoj wokrjes Rychnov nad Kněžnou a Praha-wuchod z 1,3 a 1,5 procentami. Praha ma 2,9 procentow, Plzeňski wobwod 2,6 a Ju­hočěski wobwod 2,8 procentow bjez­dźěłnych. Najwjetša je bjezdźěłnosć dale w Ústískim­ a Morawsko-šleskim wobwodźe. We woběmaj kónčinomaj je to tuchwilu 6,1 procent.­

Po datach statistiskeho zarjada Eurostat měješe Čěska w juliju mjez wšěmi krajemi Europskeje unije najmjenje bjezdźěłnych.

Horcy wólbny bój

srjeda, 13. septembera 2017 spisane wot:
Praha (ČŽ/K/SN). Spočatk tydźenja zahajichu jednotliwe strony w Čěskej republice horcy wotrězk wólbneho boja za oktoberske wólby sejma. Zwučene formy su nawěški w nowinach kaž tež prezentacija na plakatach a w socialnych syćach. Někotre strony wužiwaja wobchadne srědki – wagony, caravany, historiske ćahi a łódźe. Wězo wotměwaja so tež towaršnostne a kulturne zarjadowanja. ANO wjedźe poslednju etapu wólbneho boja pod hesłom „Nětkle abo nihdy“, štož po šefje Andreju­ Babišu rěka, zo su wólby sejma poslednja móžnosć, korupcisku hydru wotbyć. ČSSD, kotraž ma wólbny program „Dobry kraj za žiwjenje“, rozdźěla róže a poskića tu a tam kofej. Jeje šef Lubomír Zaorálek je tunjemu dźěłu bój připowědźił z parolu „Hdyž kraj bohatnje, dyrbja tež ludźo zbohatnić“. KSČM wustupuje ze sloganom­ „Smy waš hłós“. Kampanja komunistow je tradicionelnje­ skromniša porno tamnym stronam. ODS wabi na Módrej žołmje a billboardach „Ze sylnym programom za sylnu Čěsku“. TOP 09 lubi wolerjam z hesłom „Njepopušćimy“, a KDU-ČSL chce ze stanami, skakanskimi hro­- dami a lětakami ludźi za sebje zdobyć.

Imunitu Babiša a Faltýneka zběhnyli

pjatk, 08. septembera 2017 spisane wot:

Praha (ČŽ/K/SN). Předsyda Hibanja njespokojnych wobydlerjow (ANO) Andrej Babiš a jeho prěni naměstnik Jaroslav Faltýnek dóstanjetaj policiju na šiju. Delnja komora parlamenta je zawčerawšim wobzamknyła imunitu wobeju zapósłancow zběhnyć a jeju pochłostać. Po sydom hodźin trajacej diskusiji wupraji so přemóžaca wjetšina ze 134 přitomnych zapósłancow za to. Zapósłancy frakcije ANO njeběchu so nimo Babiša a Faltýneka na wothłosowanju wobdźělili. Wobaj staj namjet, jeju wudać justicnej procedurje, podpěrałoj, rjekny nowinarjam městopředsyda sejma Radek Vondráček.

Něhdyšemu financnemu ministrej Babišej wumjetuja, zo je dopušćił jebanstwo w rozměrje 50 milionow krónow za natwar farmy „Čapí hnízdo“(Baćonjace hnězdo) za jeho firmu Agrofert. Faltýneka winuja wobdźělenja na tym. Babiš tukanja raznje wotpokazuje.

Wostawaja konsekwentni

pjatk, 08. septembera 2017 spisane wot:

Pólska ma ćěkancow nastupajo wěstotu ludźi a kraja za wohroženu

Waršawa. Rozsud Europskeho sudnistwa, zo je wobzamknjenje wjetšiny čłonskich statow Europskeje unije – 120 000 ćěkancow z Grjekskeje a Italskeje proporcionalnje rozdźělić – prawniske, Pólska njepřipóznawa. Słowakska a Madźarska běštej skóržbu přećiwo rozdźělowanju migrantow zapodałoj; ale zwrěšćiłoj. Wobzamknjenje EU ze septembra 2015 předwidźi, zo měła Pólska 6 182 ćěkancow přiwzać. Bywše knježerstwo je tomu hišće přihłosowało. Tola w oktobru 2015 nowowuzwolene knježerstwo to njeakceptuje. Hač do dźensnišeho njeje ani jeničkeho z nich w kraju witało. „Nochcemy přilubjenje bywšeho knježerstwa přewzać a wobzamknjenje wotpokazujemy“, ministerska prezidentka Beata Szydło zas a zaso potwjerdźa. Žadanja mjezsobneje solidarity nochce Pólska podpěrać. Tež minister za nutřkowne naležnosće Mariusz Błaszczak ma politiku Europskeje unije za wopačnu a skedźbnja na wohroženu wěstotu ludźi a kraja. Mjeztym je so ličba ćěkancow w Grjekskej a Italskej pomjeńšiła.

Wikowarjo z drogami zajeći

štwórtk, 07. septembera 2017 spisane wot:

Praha (dpa/SN). Cłownikam z Čěskeje, Pólskeje a Słowakskeje je so poradźiło, mjezynarodnu agěrowacu cwólbu wikowarjow z drogu crystal zajeć. 41 pohladnych bě drogi zhotowjało a z nimi wi­kowało, zdźěli nawoda čěskeje policije powěsćerni ČTK. A ličba skućićelow móhła samo hišće wjetša być.

Něhdźe 650 zastojnikow z mjenowanych krajow bě na racijach wobdźělenych. Namakali su woni přeličene poł miliona eurow we wšelakorych měnach. Cwólba je kompletne ilegalne drogowe wiki w Čěskej a Słowakskej z crystalom zastarowała. Ćežišćo bě zapadna Čěska­ na mjezy k Němskej.

Piwo za bamža

srjeda, 06. septembera 2017 spisane wot:

České Budějovice (ČŽ/K/SN). Piwarnja Budvar je nawariła wosebite piwo, z kotrymž napjelni 122 blešow za bamža Franciskusa. Po tym zo je specialny ležak 90 dnjow zrawił, chce delegacija z Českich Budějovic z dieceznym biskopom Vlastimilom Kročilom na čole wurjadny prezent swjatemu wótcej wosobinsce na dohodownej­ generalnej awdiency za čěskich putnikow přepodać. Tole wozjewja powěsćernja ČTK. „Za nas je to prestižna naležnosć“, rěčnik Budvara Petr Samec zwurazni. „Je to prěni raz, zo Vatikanej piwo dodamy. Limitěrowana edi­cija blešow njebudźe na předań.“ Kak hinak su wosebite piwo porno zwučenym recepturam warili, piwarnja wězo njepřeradźa.

Swětoznaty Budvar je loni 1,61 milionow hektolitrow piwa předał, najwjace za čas swojeho wobstaća. Wunjesło je jemu­ to rekordnu sumu 2,54 miliardow krónow (něhdźe 97 milionow eurow). Do 77 krajow swěta su 975 000 hektolitrow dodawali. Statej słušaca piwarnja nałoži lětsa 750 milionow krónow a hač do lěta 2020 dwě miliardźe krónow za wutwar a modernizowanje předewzaća.

Reparacije biliona dolarow móžne

wutora, 05. septembera 2017 spisane wot:

Waršawa (dpa/SN). Wonkowny minister Pólskeje Witold Waszczykowski žada sej kaž dalši čłonojo knježerstwa wot Němskeje reparacije škodow Druheje swětoweje wójny dla. „Měli so ke chutnej rozmołwje z Němcami zeńć a zhromadnje wo tym rozmyslować, kak hodźi so problem rozrisać“, rjekny Waszczykowski wčera sćelakej RFM FM.

Nutřkowny minister Pólskeje Mariusz Błaszczak bě sej hižo minjeny kónc tydźenja wotškódnjenje biliona dolarow žadał, štož wotpowěduje něhdźe 840 miliardam eurow. „Snano je to hišće wjace, njemějachmy hižo dlěje hač 70 lět žane dokładne wobličenje“, Waszczykowski potwjerdźi.

Wo žadanju reparacijow hižo někotre měsacy w susodnym kraju diskutuja. Hač drje k tomu woprawdźe dóńdźe, pólski wonkowny minister wčera njerjekny. Wědomostna słužba pólskeho parlamenta pruwuje pak tuchwilu prawniske móžnosće.

Wólby so bliža

wutora, 05. septembera 2017 spisane wot:
Praha (ČŽ/K/SN). 31 stronow, politiskich hibanjow wólbnych zjednoćenstwow a zeskupjenjow nastupi ze swojimi kandidatami nazymu k wólbam sejma. Wone wotměja so 21. a 22. oktobra, dobry měsac po wólbach zwjazkoweho sejma w Němskej. Na wólbnych lisćinach nańdźe so tak historisce najwjetša ličba požadarjow. Před štyrjomi lětami bě so „jeničce“ 23 stron, hibanjow a zjednoćenstwow na wólbach wobdźěliło. Wuhlady na to, dóstać so do delnjeje komory parlamenta, ma wšak najmjenje z nastupowacych zhromadźenstwow. Z wěstosću zaćahnu Čěska strona socialneje demokratije (ČSSD), Alianca njespokojnych wobydlerjow (ANO), Komunistiska strona Čech a Morawy (KSČM), Demo­ratiska strona wobydlerjow (ODS), TOP 09, Křesćansko-demokratiska unija-Čěska ludowa strona (KDU-ČSL) a młoda Strona direktneje demokratije (SPD) Piraća, Zeleni a Starosća drje znowa wonka wostanu. A poměrnje wěste je, zo ČSSD tónkróć njedobudźe, ale budźe za ANO stać. Prezident Miloš Zeman by witał knježerstwo ANO-ČSSD, ale štó budźe chcyć z Andrejom Babišom koalěrować?

Nadpada dla šokowani

pjatk, 01. septembera 2017 spisane wot:

Njeskutk nowe diskusije wo ćěkancach w Pólskej wuwabił

Waršawa. Brutalny nadpad na pólski porik za čas dowola w italskim měsće Rimini ludźi šokuje. Stał je so njeskutk w nocy na minjenu sobotu, jako chcyštaj 26lětnaj swój posledni dowolowy dźeń w nocy na přibrjohu wuklinčeć dać. Při wuchodźowanju podłu Adrije jeju štyrjo młodźi mužojo w špatnej jendźelšćinje narěčachu. Po słowach porika wupadachu kaž Afričenjo. Pozdatni ćěkancy započachu Polaka bjez přičiny bić a kopać, a činjachu to tak dołho, doniž njeje do womory padnył. Młodu žonu woni wjacore razy za sobu wumocowachu a ćisnychu ju do wody.­ Na to ćeknychu. Hakle narano turist zranjeneju nańdźe a zawoła poli­ciju. W italskej chorowni so wo njeju nětko staraja. Žona ćerpi pod šokom, muža dyrbjachu lěkarjo operować. Kaž wón rjekny, běchu so złóstnicy zadźer­želi kaž bestije.

Rěčki a hrjebje wusaknjene

pjatk, 01. septembera 2017 spisane wot:

ZEMJA ZEŽIWJERKA mjenuje so programatisce najwjetša ratarska wustajeńca Čěskeje republiki. Jeje mjeztym 44. lětnik je so wot 24. do 29. awgusta w Českich Budějovicach wotměł a woprawdźity magnet był. Za njecyły tydźeń wopyta tamniši agrosalon 109 278 ludźi, naj­wjace to po lěće 2005 a porno lońšemu 90 000 zajimcow wjace. 550 wustajerjow prezentowaše na přehladce nowosće ze swěta kombajnow, traktorow a druhich modernych agrarnych nastrojow. Wobšěrnje pokazowachu so postupy w cyrobiznowym přemysle. Tež zahrodnistwo a hońtwjerstwo běštej wažnej wobstatkaj wustajenišća. Jeho jednaćel Václav Polan zwurazni, zo bu nowy koncept „dožiwjene ratarstwo“ wot wopytowarjow derje přiwzaty. Na zahajenju agrosalona wobdźělichu so prezident Miloš Zeman,­ jeho předchadnik Václav Klaus a minister za ratarstwo Marian Jurečka.

nawěšk

nowostki LND