Pokład nazhonjenjow zbližić

pjatk, 29. meje 2015 spisane wot:

Wažnišo je nětko rólu SED a jeje nawodnistwa přepytować, hač so – kaž časćišo w zašłosći – jeno ze stasi a jeje informelnymi informantami zaběrać. Trěbna je kultura wopomnjeća, kaž je sej tole­ před lětami nětčiši zwjazkowy prezident­ Joachim Gauck na Budyskim forumje žadał.

Budyšin (ML/SN). Zwjazkowy społnomócnjeny za podłožki bywšeje stasi w NDR Roland Jahn wuzběhny tole wčera popołdnju na 26. Budyskim forumje. Pokład nazhonjenjow politiskich jatych a wojowarjow wo wobydlerske prawa w NDR ma so wosebje młodźinje zbližić a zwužitkować, zo by wona na signale stracha před ewentuelnej diktaturu sensibilizowana była. Na Budyskim forumje skedźbnichu rěčnicy a diskutanća na wažnosć, zo so stawizny NDR wobšěrnišo abo docyła w šulskej wučbje wobjednawaja. Młodźina dyrbi wažnosć demokratije a wuznam swobody a jeju zakitowanje spóznać, rjekny dr. Anna Kamin­sky, jednaćelka zwjazkoweje załožby za přeslědźenje diktatury SED. Trěbne su tež dialogi mjez skućićelemi a přesćěhanymi, bjez nich njeje wodawanje móžne, kaž na podijowej diskusiji wuzběhnychu.

Znajmjeńša wosom mortwych, tójšto zranjenych a wulku wěcnu škodu je sej bombowy nadpad na hotel Babylon w irakskej stolicy Bagdadźe žadał. Minjenu nóc běchu­ na parkowanišću před hotelom wjacore bomby rozbuchnyli. Policija tuka na wojowarjo­w teroristiskeje milicy Islamski stat, kotraž je mjeztym wulki dźěl Iraka­ zdobyła. W hotelu bydla předewšěm wukrajnicy. Foto: dpa/Hadi Mizban

Britiski premier w Němskej

pjatk, 29. meje 2015 spisane wot:
Berlin (dpa/SN/K). Na swojej wuprawje po krajach EU załoži britiski premier David Cameron dźensa do Berlina. Kanclerce Angel Merkel (CDU) rozłoži wón reformy za Europsku uniju, kotrež přewjesć sej London žada, zo móhła Wulka Britaniska z čłonom EU wostać. Wo tym chce Cameron, zesylnjeny z wólbnym dobyćom konserwatiwneje strony, najpozdźišo 2017 wothłosować dać. Zo njeby k wustupej Wulkeje Britaniskeje z EU dóšło, pomina sej Cameron daloko sahace změny. Tak měli so migrantam socialne wukony wobmjezować. Dale zasadźa so wón za wjetšu suwerenitu jednotliwych statow w zhromadźenstwje. Merkel tajke korektury dotal wotpokazuje.

Rom (dpa/SN). Italska mórska wuchowanska słužba je zhromadnje z wukrajnymi wójnskimi łódźemi w šěsć wšelakich akcijach cyłkownje 741 ćěkancow před pobrjohom Sicilskeje wuchowała. Woni běchu so z Libyskeje z gumijowymi čołmami a jednej łódźu na puć podali, kaž powěsćernja Ansa rozprawja. Na wuchowanskej akciji wobdźělena bě tež němska fregata „Hessen“. Kaž Zwjazkowa wobora zdźěla, móžeše łódź cyłkownje 166 wosobow z mórskeje nuzy wuchować. Wojacy zničichu nimo toho dwaj gumijowej čołmaj, kotrejž běštej bjez ludźi na morju­. Marina wobhla­dowaše čołmaj­ jako wohroženje druhich łódźow na morju.

Steinmeier na Ukrainje

pjatk, 29. meje 2015 spisane wot:
Kijew (dpa/SN/K). Němski wonkowny minister Frank-Walter Steinmeier (SPD) je dźensa a jutře na wopyće Ukrainy. Jeho naležnosć je, pohonić zwoprawdźenje Minšćanskich měrowych dojednanjow. Přiměr, wobzamknjeny za wuchod kraja, bywa spochi łamany. Boje mjez ukrainskimi jednotkami a proruskimi mocami žadaja sej přeco zaso mortwych. Organizacija Amnesty International winuje wobě stronje, zo třělatej. Dźensa rěči Steinmeier z ukrainskim prezidentom Petrom Porošenkom a premierom Arsenijom Jacenjukom­, jutře­ poda so do industrijneje metropole Dnjepropjetrowska. Politikar SPD rjekny, zo čakaja na Ukrainu rozsudne dny za politiske a financielne zestabilizowanje. Němska chce so při tym solidarna wopokazać.

Zürich (dpa/SN). Prezident swětoweho koparskeho zwjazka FIFA Joseph Blatter je z wulkej napjatosću wočakowany kongres zwjazka zahajił. Šwicar namołwješe 209 čłonow hladajo na najnowše korupciske skandale k aktiwnemu sobudźěłu a k zhromadnosći. Wjeršk budu wólby prezidenta FIFA. Na nich nastupi Blatter přećiwo swojemu kontrahentej, princej Ali bin al-Husseinej, jako jasny faworit. Wězo­ wočakuja přewšo snadny wólbny rozsud. Wšako je so minjene dny dale a wjace krajnych koparskich zwjazkow wot Blattera wotwobroćiło.

To a tamne (29.05.15)

pjatk, 29. meje 2015 spisane wot:

Wobchad awtodróhi haćiło je wojerske lětadło wčera mjez Berlinom a Mnichowom. Po A 9 transportowachu mašinu typa Eurofighter do hornjobayerskeho Manchinga, hdźež chcedźa ju zwuporjedźeć. Dokelž bě nastroj šěrši hač jědnaće metrow, njemóžachu jón awta přesća­hnyć. Wodźer wosebiteho nakładneho wozydła, kotrež njepohibowaše so spěšnišo hač 60 km/h, tuž wospjet na šěršich městnach zastawaše, zo móhli za nim jěduce awta nimo jěć. Lětadło bě so při manewru wobškodźiło.

Z mlokom palace so awto hašał je wodźer nakładneho awta pola Kulmbacha. Kaž policija zdźěli, bě so wobruč horceho borzdźidła dla zapaliła. Šofer spěšnje reagowaše a da něšto mloka z wulkeho tanka wuběžeć, zo by z nim woheń hašał. Jako­ policija dojědźe, bě wón płomjenja hižo podusył a tak móžnym wjetšim škodam­ zadźěwał.

Łužica (29.05.15)

pjatk, 29. meje 2015 spisane wot:

Stawk rozšěrjeny

Podstupim (dpa/SN/ch). Stawk kubłarkow a socialnych dźěłaćerjow w dźěćacych přebywanišćach Braniborskeje su dźensa hišće raz rozšěrili. Po wozjewjenju dźěłarnistwa ver.di wostachu dalše zarjadnišća na wuchodźe kraja zawrjene. Wčera stawkowachu po informaciji dźěłarnistwa sta komunalnych zarjadnišćow w jědnaće wokrjesach. Wot wutory bu njewobmjezowany stawk krok po kroku rozšěrjeny. Po dohromady nimale třoch tydźenjach pak pokazowaše dźěłarnistwo runje tak kaž zjednoćenstwo ko­munalnych dźěłodawarskich zwjazkow zwólniwosć k rozmołwam. Přiwšěm njeje hišće jasne, hdy a hdźe so tarifowi partnerojo přichodny tydźeń zetkaja.

Pytaja pomocnikow

Sławny ruski dirigent Wladimir Fedosejew je dźensa wopomnišćo za wopory ameriskeje atomoweje bomby w Hiroshimje wopytał­ a tam kwětki połožił. Nowinarjam wón rjekny, zo ma wulki respekt před zapadojapanskim městom, kotrež běchu woby­dlerjo po wójnje zaso natwarili. Tajka tragedija njesměła so nihdy wospjetować. Foto: dpa/Kyodo

Dale na naćisku próstwy dźěłali

štwórtk, 28. meje 2015 spisane wot:

Njebjelčicy (AW/SN). Iniciatiwna skupina Serbski sejmik zaběraše so na swojim wčerawšim posedźenju w Njebjelčicach z předpołoženymi naćiskami za próstwu wo zakonjedawsku proceduru wutworjenja ramikowych wuměnjenjow za demokratisce legitimowane ludowe zastupnistwo serbskeho ludu. Po diskusiji dojednachu so wobdźělnicy na krótki a jadriwy naćisk přitomneho jurista. Naćisk ma so hač do přichodneho zeńdźenja dnja 10. junija juristisce wudospołnić a wobzamknyć. Potom chcedźa iniciatiwnicy próstwu w serbskich towarstwach a gmejnskich radach Hornjeje a Delnjeje Łužicy předstajić a wot jich zastupjerjow sobu podpisać dać. Dokument, dalše posudki a žórła wo prawje samopostajowanja serbskeho ludu kaž tež koncept za tutón parlament pó­sćelu w septembrje prezidentomaj Sakskeho a Braniborskeho kraj­neho sejma dr. Matthiasej Rößlerej (CDU) a Britće Stark (SPD).

nowostki LND