To a tamne (15.08.16)
Chětro hejaty třilětny hólc je w Brandenburgu nad Habolu zasadźenje policije zawinił. Swědcy běchu wobkedźbowali, kak muž škrěčace dźěćo do awta sadźi a na to wotjědźe. Hnydom za dźěsćom pytajo policija mać wopyta. Ta móžeše połoženje rozkłasć: Nan bě třilětnemu w 20 hodź. kazał, z hrajkanišća domoj přińć. Hólc pak so z cyłeje šije wobaraše, tež jako jeho nan najebać to do awta sadźi.
Štóž sej w Španiskej z pomocu trjenja, lěhadła abo słónčnika městno na pobrjohu rezerwuje, dyrbi z tym ličić, zo jemu tele wěcy wozmu. Nimo toho hrozy pokuta hač do 720 eurow. Zamołwići nochcedźa dlěje ćerpjeć, zo sej turisća rano zahe najlěpše městna při morju rezerwuja, zo bychu hakle hodźiny pozdźišo na pobrjóh přišli. Wotpowědny wukaz płaći mjeztym w mnohich dowolnišćach kraja a pječa skutkuje, kaž nowiny pišu.
Mortwi při nadpadach
Bangkok (dpa/SN). Při seriji bombowych nadpadow w thailandskich turistiskich srjedźišćach su štyri wosoby žiwjenje přisadźili. Bomby rozbuchnychu mjez druhim we woblubowanym dowolnišću Patong na kupje Phuket. Po informacijach wonkowneho ministerstwa so třo němscy turisća zranichu. Cyłkownje je něhdźe dźesać bombow rozbuchnyło. Dotal njeje nichtó nadpady přiznał.
Rozrost trochu wosłabił
Wiesbaden (dpa/SN). Rozrost němskeho hospodarstwa je w druhim kwartalu lěta wosłabnył. Nutřkokrajny bruttoprodukt – suma wšitkich nadźěłanych hódnotow – je wo 0,4 procenty přiběrał. W prěnim kwartalu wučinješe rozrost hišće 0,7 procentow, kaž Zwjazkowy statistiski zarjad zdźěla. Pozitiwnje wuskutkował je so přiběracy eksport, negatiwnje porno tomu woteběrace inwesticije předewzaćow do nowych mašinow.
Wotewru mjezu mjez krajomaj
Historiske płachtaki z mnohich krajow su do Rostockskeho ...
Eskalaciji konflikta zadźěwać
Reforma so zdźěla z wustawu kusa
Sakska liči z rekordnym etatom
Drježdźany (dpa/SN). Sakski financny minister Georg Unland (CDU) wostanje najebać rekordny etat 2017/2018 kedźbliwy. „Njemóžemy so na to spušćeć, zo žórła statnych dochodow dale tak bohaće kužola, kaž to tuchwilu činja“, rjekny wón wčera při předstajenju naćiska za dwójny etat 2017/2018 w krajnym sejmje. W tym zwisku pokaza na brexit, na krizowe kónčiny po wšěm swěće, ale tež na pjenježnu politiku notowych bankow a na strachi na kapitalnych a imobilijowych wikach. Wšo to móhło negatiwne politiske a hospodarske wuskutki měć. Přiwšěm je Unland hladajo na aktualne połoženje dosć pozitiwny wobraz rysował. Stabilneho hospodarstwa dla ma Sakska bohate dawkowe dochody. Dyrbjeli-li so prognozy hač do lěta 2020 zwoprawdźić, móhli wo „złotym lětdźesatku“ rěčeć. Etat wopřijimuje klětu a 2018 wobaj razaj něhdźe 37 miliardow eurow. Za Załožbu za serbski lud zaplanuja 6,160 milionow eurow.
To a tamne (12.08.16)
Wjace hač 400 awtow je wopak zastajeny błyskač jako přespěšne fotografował. Technikar bě błyskač při zwjazkowej dróze B 82 njedaloko delnjosakskeho Langelsheima we wokrjesu Goslar po planje přehladał. Při tym pak zaměni nastajenja za wosobowe a nakładne awta: Nětko błyskač šoferow awtow, kotřiž běchu z dowolenymi 100 km/h po puću, hižo wot 60 km/h fotografowaše. Lkw-je, kotrež smědźa tam najspěšnišo 60 km/h jěć, pak nastroj hakle wot 100 km/h měrješe. Po hodźinomaj wšak zmylk pytnychu. Wšitke fota su mjeztym zničili.
Swětowy rekord w jězdźenju z awtoskooterom staj telewizijnaj reporteraj Manuela Benus a Jan Spekker w Hamburgu nastajiłoj. Cyłkownje 26 hodźin a 41 minutow wonaj we wuskimaj jězdźidłomaj wutraštaj, najebać bolosće w nohomaj a mučnotu. Nětko stejitaj jeju mjenje w Guinnessowej knize rekordow.
Maja wo wučerjach-zastojnikach rozmyslować
Budyšin (CS/SN). W srjedźišću stajneho blida CDU wčera wječor steješe aktualna situacija šulow w Budyskim wokrjesu. Přeprošeni běchu nawoda powołanskošulskeho centruma za hospodarstwo a techniku Uwe Richter, nawoda Melanchthonoweho gymnazija Karsten Vogt, Mathias Peter ze Sakskeje kubłanskeje agentury Budyšin kaž tež zapósłancaj krajneho sejma Marko Šiman a Lothar Bienst (wobaj CDU).
Akutny problem pobrachowacych wučerjow su tak přemosćili, zo su něhdźe 45 procentow přidružnikow zasadźili. Lothar Bienst měnješe, zo móžeš z tym žiwy być, to pak njesmě so z normalitu stać. Nazhonići wučerjo na naprawje dwěluja.
Přilubja dźěłowe městna
Des Moines (dpa/SN). Kandidatka demokratow za zastojnstwo prezidenta USA Hillary Clinton je wobšěrny inwesticiski paket připowědźiła, dyrbjała-li wona wólby dobyć. Na wólbnobojowym zarjadowanju w Des Moinesu w staće Iowa Clinton přilubi, pjenjezy za dróhi, mosty, tunle a lětanišća nałožować. Tak chce dźesać milionow nowych dźěłowych městnow, předewšěm za srjedźnu worštu wobydlerjow, wutworić.
Ludźo so policiji spjećowali
Berlin (dpa/SN). Při zasadźenju w Berlinskej štwórći Strowotna studnja je policija znowa spjećowanje wobydlerjow nazhoniła. Spočatnje bě 23lětny spytał tomu zadźěwać, zo zastojnicy pěšku před wobchodom kontroluja. Kaž policija zdźěli, je při tym k prěnim rozestajenjam dóšło. W tym času so něhdźe 30 wosobow před wobchodom zhromadźi. Wótře protestujo spytachu někotři zapřimnyć. Najebać to móžeše policija 23lětneho nachwilnje zajeć. Hižo spočatk tydźenja měješe wona w samsnej štwórći podobne problemy, jako bě so jej 70 wosobow do puća stupiło.
Manager VW přesłyšowany
