Budyšin (CS/SN). Zapósłanča CDU w zwjazkowym sejmje Marja Michałkowa bě wčera hósć Budyskeje sekcije hospodarskeje rady CDU, zo by wo swojim dźěle w sejmje rozprawjała a na prašenja wobdźělnikow wotmołwiła. Hospodarska rada CDU ma so za posrědkowarja mjez politiku a hospodarstwom. Marja Michałkowa mjez druhim powědaše, zo bě hakle njedawno ze zwjazkowym strowotniskim ministrom w USA. Tam je so wo digitalizowanju w strowotnistwje kraja wobhoniła. Dokelž kładźe wulku­ wažnosć na dialog z wobydlerjemi, wěnuje zapósłanča połojcu swojeho dźěłoweho časa dźěłu we wólbnym wokrjesu, połojcu časa je w Berlinje.

Byrnjež so hospodarstwo w Němskej tuchwilu derje wuwiwało a bjezdźěłnosć mała była, je Marja Michałkowa za to, z dobrotami za ludźi zlutniwje wobchadźeć. Wšako maja so tele dobroty tež w špatnych časach dale financować.

Obama ma poražku demokratki Clinton přeco hišće za móžnu

Youngstown/New York (dpa/K/SN). Kandidat republikanow na přichodne prezidentstwo USA Donald Trump we wólbnym boju prawdźepodobnje žanych přećelow njeznaje. Předstajejo w Youngs­townje swój program wěstoty njeje wón jeno swój wotpokazliwy kurs napřećo připućowarjam zakitował, ale je samo před Němskej warnował. Po přeswědčenju Trumpa je zwjazkowa republika nastupajo wobchadźenje z ćěkancami přisamom špatny přikład. Po tym zo běchu so migranća z masami do Němskeje dóstali, je kriminalita w kraju runjewon šusknyła. A demokratiska riwalka Trumpa, Hillary Clinton, rěči za podobnu po­litiku připućowanja kaž němska kanclerka Angela Merkel. „Clinton chce so stać z ameriskej Angelu Merkel“, Trump wuwoła, złowěšćo dodawajo, „wam je znate, kajka katastrofa masiwne připućowanje za Němsku je.“ Katastrofa dźě je, zo je „kriminalita­ na niwow postupiła, kajkiž nichtó­ njeby za móžny měł“.

Kandidat za zastojnstwo prezidenta USA Donald Trump je we wuskosćach. Wolerjo so přiběrajcy wotwobroćeja. Tež w swójskich rjadach republikanow ma wón dźeń a mjenje přiwisnikow. Je so tuž rozsudźił retoriku přiwótřić a mjez ludźimi strach šěrić, w nuzy tež ze łžemi. Podobnje či­njachu to tež ći aktiwisća, kotřiž běchu we Wulkej Britaniskej za to wabili Europsku uniju wopušćić – a to wuspěšnje. Nětko­ je sej Trump Němsku wuhladał. Tam su ćěkancy pječa gigantisku kriminalitu zawinowali, štož wšak tak wěrno njeje. Němska ze swojimi „katastrofalnymi poměrami“ je Trumpej runjewon negatiwny přikład politiki ćěkancam napřećo. Wobydlerjo USA, kotřiž so za druhe kraje zwonka Ameriki zwjetša scyła njezajimuja, su jeho łžam wustajeni. Směmy wćipni być, kajke bajki sej Donald Trump to hišće wumysli. Strašne su wone w kóždym padźe. Marko Wjeńka

Berlin (dpa/SN). Bjezdźěłnosć w Němskej po posudku zwjazkoweho knježerstwa wulkeje ličby ćěkancow dla přichodne lěta zaso přiběra. Wo tym rozprawja nowina Bild, powołujo so na ličby zwjazko­weho financneho ministerstwa. Tak drje ličba bjezdźěłnych hižo klětu wo 110 000 na potom 2,86 milionow rozrosće. Hač do lěta 2020 wočakuja 3,1 milion. Zdobom pak tež ličba dźěławych w kraju přiběra.