Bagdad (dpa/SN). Při sebjemordarskim atentaće w sydlišću Balad, něhdźe 50 kilometrow wot irakskeje stolicy Bagdada zdalenym, je wčera wječor znajmjeńša 30 ludźi žiwjenje přisadźiło. Něhdźe 80 so zrani, kaž zdźěli policija agenturje dpa. Atentatnicy běchu šiitiske wołtarnišćo w Baladźe nadpadnyli a so sami rozbuchnyli. Teroristiska milica Islamski stat je so mjeztym k tomu wuznała.

Ličbu morjenych při atentaće w nakupowanskej štwórći Bagdada minjenu njedźelu dyrbjachu na nimale 300 skorigować. To rozprawjeja irakske medije, powołujo so na strowotniske ministerstwo. Nadpad bě jedyn z najhóršich po wotsadźenju Saddama Husseina lěta 2003.

Šěsć kilometrow dołhu čaru juchi je ratar w Belgiskej zawostajił. Smjerdźata maćizna z wotewrjeneho juchoweho tanka pryskaše na fasady, awta, zahrodki a samo na rowy kěrchowa w Glabbeeku wuchodnje Brüssela. Wohnjowa wobora měješe hodźiny dołho činić, fasady a dró­hi zaso wurjedźić. Zličbowanku dóstanje wězo ratar.

Policajski pos je w Hornjej Pfalcy muža wučušlił, za kotrymž policija hižo dlěje pytaše. 25lětny bě zastojnikam napadnym, dokelž bjez wěstotneho pasa jědźeše. Jako chcychu jeho zadźeržeć, stupi tón na płun. Honjeńca skónči so na polu, po tym zo bě muž kontrolu nad awtom zhubił. Na to ćěkaše pěši dale, tež přez rěku, a schowa so w lěsu. Tam wšak jeho policajski pos namaka. Přičina ćěkanja bě spěšnje jasna: Přećiwo mužej předleže­štej hnydom dwaj wukazaj zajeća.

Budyšin (SN). We wobłuku zwěsćowanjow Drježdźanskeho generalneho statneho rěčnistwa a operatiwneho wotwobaranskeho centruma (OAZ) k zapalerstwu bywšeho Budyskeho hotela „Husarenhof“ 21. februara su wčera wjacori zastojnicy by­dleni dweju Budyšanow přepytali. To zdźělištej generalne statne rěčnistwo a OAZ sakskeje policije. Mužej staj podhladnaj, zo běštaj so ilegalnje do twarjenja zadobyłoj, kotrež bě předwidźane jako přebywarnja za požadarjow azyla, a chcyštaj dom zapalić. Wonaj staj 27 a 33 lět a policiji znataj, nic pak w zwisku z politisce motiwowanymi njeskutkami. Tež při přepytanju bydlenjow njejsu zastojnicy ničo našli, štož móhło na prawicarske zmyslenje pokazować. Zawěsćene medije dyrbja pak nětko najprjedy raz wuhódnoćić.

Woheń w Husarenhofje wuwabi tehdy negatiwny wothłós po cyłej Němskej, wosebje zadźerženja přihladowarjow dla. Škoda na twarjenju wučinja poł miliona eurow. Krajnoradny zarjad nochce je hižo za zaměstnjenje ćěkancow wužiwać.

Erfurt (dpa/SN). Durinski frakciski a krajny šef AfD Björn Höcke je swojej stronje hladajo na zwadu wo nawodnistwo radźił, w zjawnosći k tomu mjelčeć. „Namjetuju zasadny a powšitkownje płaćiwy nowinski moratorij“, rjekny Höcke wčera w Erfurće. AfD w Badensko-Württembergskej trjeba po najnowšich napjatosćach wjace chwile, problemy zrjadować. Při tym njesměła so wot medijow ćěrić dać. Po pačenju frakcije AfD w Badensko-württembergskim krajnym sejmje je mjez zwjazkowymaj předsydomaj Jörgom Meuthenom a Frauke Petry razny bój wo móc wudyrił.

Zromadnje po puću k ISS

Bajkonur (dpa/SN). W modernizowanej rakeće typa Sojuz su Američanka, Japanjan a Rus k mjezynarodnej swětnišćowej staciji ISS wotlećeli. Raketa startowaše dźensa w kazachskim Bajkonurje, zdźěli ruski swětnišćowy zarjad. Do wotlěta su ameriska astronawtka Kathleen Rubins, Japanjan Takuya Onishi a Anatolij Iwa­nišin z Ruskeje hišće raz do kamerow kiwali. Lět k staciji 400 kilometrow nad zemju traje tónraz dwaj dnjej.

Putin Obamu namołwjał