W naležnosći dale njepřišli
Podstupim (SN/at). Jutře ma nawodnica Delnjoserbskeho gymnazija Choćebuz (DSG) přisłušnemu šulskemu zarjadej koncept za swoje kubłanišćo zapodać. Šulska konferenca je předležacy dokument wotpokazała, dokelž nima tam woprawdźite nadawki kubłanišća za dosć zapřijate. Tež akciska Serbska syć je so na swojim wurjadnym posedźenju 16. junija přećiwo konceptej wuprajiła. Situacija je přiwótřena, tak zo su čłonojo braniborskeje Rady za naležnosće Serbow minjenu wutoru wo tematice ze zastupjerjemi frakcijow SPD, Lěwicy, CDU a Zelenych w krajnym sejmje diskutowali. Ani přeprošeny kultusowy minister Günter Baaske (SPD), ani přisłušna wotrjadnica ministerstwa njejstaj so za swoju njepřitomnosć zamołwiłoj. Byrnjež wobdźělnicy wuradźowanja temu wobšěrnje rozjimali, njejsu w naležnosći dale přišli. Dalewjedźenje projekta Witaj hač k abiturje w Braniborskej je bjez koncepta wohrožene. Zapósłanči Lěwicy a Zelenych pak běštej jón wutoru jasnje zakitowałoj.
Koncept koncepta dla?
Štwórć lětstotka samostatnej
Słowjenska a Chorwatska bilancujetej njewotwisnosć
Zagreb/Ljubljana (dpa/K/SN). Tele dny je štwórć lětstotka tomu, zo stej so z rozpadowaceje Juhosłowjanskeje Słowjenska a Chorwatska zesamostatniłoj. We woběmaj krajomaj nětko bilancuja, što je historiska kročel wunjesła.
„Njewotwisnosć je so w kóždym nastupanju wudaniła. Směmy na wšo docpěte hordźi być“, hódnoći něhdyša premierka Chorwatskeje Jadranka Kosor. Wótc njewotwisnosće Słowjenskeje a jeje prěni prezident Milan Kučan zwuraznja: „Wěc je so w kóždym padźe zadaniła.“ Za njeho je najwažniše, zo „móžemy wot toho časa swój wosud sami postajeć“.
To a tamne (23.06.16)
Kanadiski wuměłc Douglas Coupland pyta za swój nowy projekt podobnika nižozemskeho molerja Vincenta van Gogha. „Mnozy ludźo někoho znaja, kiž wupada kaž wón“, praji Coupland. Dźesatki potencielnych dwójnikow su swoje foto wčera na internetnu stronu projekta „I am Vincent“ pósłali. Nětko ma so wo najpodobnišim dwójniku wothłosować. Dobyćerja chce Coupland jako 2x3 metry wysoku bronzowu postawu zwěčnić.
Město Mnichow sej žada, zo maja so kralowskim pythonam 46lětneje wobsedźerki jenož hišće mortwe myše picować. Město powołuje so při tym na zwěrinoškitny zakoń, po kotrymž maja so njetrjebawše čwěle myšow wobeńć. Z pomocu nawody zběrneje stacije za reptilije w Mnichowje Markusa Baura prócuje so wobsedźerka nětko swoje zwěrjata překubłać – dotal pak bjez wuspěcha.
Tesla chce SolarCity přewzać
Palo Alto (dpa/SN). Zhotowjer elektroawtow Tesla je za přewzaće předewzaća SolarCity poskitk we wobjimje 2,5 miliardow eurow předpołožił. Tesla chce sumu w formje akcijow zapłaćić. Z přewzaćom móhli připrawy SolarCity přeńć do energijoweje sparty firmy Tesla, kotraž chce so nimo awtoweje industrije tež na energijowe wiki koncentrować.
Cameron chcył premier wostać
London (dpa/SN). 24 hodźin do Brexit-referenduma je britiski premierminister David Cameron chětro njewěsty, kak wothłosowanje wuńdźe. „Nichtó njewě, što so stanje“, rjekny Cameron nowinje Financial Times. Zdobom wón potwjerdźi, zo chcył na kóždy pad zastojnstwo premiera dale wukonjeć. W žanym padźe tež njewobžaruje, zo bě k referendumej namołwjał. Po naprašowanjach je wuslědk jutřišeho wothłosowanja 45 milionow wólbokmanych wotewrjeny. Wšitko pokazuje na dwubój mjez přećiwnikami a tymi, kotřiž chcyli dale w EU wostać.
Hłowna zhromadźizna
Janske jěchanje je kruty wobstatk janskeho swjedźenja, znajmjeńša ...
Gauck na wopory ZSSR dopominał
Nowemu nawalej ćěkancow zadźěwać
Chcedźa delnjoserbšćinu bóle spěchować
Podstupim (dpa/SN/BŠe). Braniborske krajne knježerstwo chce delnjoserbsku rěč bóle spěchować. Ministerka za wědomosć, slědźenje a kulturu Martina Münch (SPD) bě wčera plan předpołožiła, z kotrymž chce delnjoserbšćinu na juhu kraja zesylnić. K tomu słušeja informacije za rěčnu wučbu w šulach a pěstowarnjach kaž tež wuwiće online-poskitkow w delnjoserbšćinje a wukubłanje wučerjow, kotřiž móhli ju podawać.
„Delnjoserbšćina je po wuprajenju UNESCO jedna z najwohrožeńšich rěčow Europy“, podšmórny Münch. Z krajnym mytom chcedźa wosebity angažement za rěč narodneje mjeńšiny přichodnje wuznamjenić. Dale je w planje předwidźane sobudźěłaćerjam zarjadnistwow zmóžnić dalekubłanja k naležnosćam mjeńšiny. Zdobom chcedźa jich wo prawniskich předpisach informować a wabić, zo bychu delnjoserbšćinu w zarjadach nałožowali. Cyłkownje 50 zdźěla hižo zwoprawdźenych naprawow je w planje zakótwjenych. Kulturne ministerstwo tuž loni w juliju wobzamknjeny plan, rěč mjeńšiny spěchować, chutnje bjerje. Hižo w juliju so krajny sejm z tym zaběra.
Na změnu so přihotować
W Braniborskej a Sakskej wo wosebitym fondsu za Łužicu wuradźowali
Podstupim (dpa/K/SN/BŠe). Opozicionelni Zeleni w Braniborskim krajnym sejmje skonkretizowachu swoje žadanje za Łužiskim fondsom, kotryž ma so za potrjecheny region po móžnym kóncu wudobywanja brunicy załožić. Čerwjeno-čerwjene krajne knježerstwo měło Zwjazk naležnje wo to prosyć, zo wutwori cyłoněmski brunicowy program, do kotrehož dyrbjało so kóžde lěto znajmjeńša 250 milionow eurow zwjesć za wuwjedźenje a zawěsćenje strukturneje změny. Z tutych srědkow móhł Łužiski fonds čerpać, rěka we wozjewjenju, kotrež su Zeleni dźensa předpołožili.
Spomnjena suma wotpowěduje ně- hdźe štwórćinje bruttoweje hódnoty, wo kotruž region přińdźe, hdyž brunicu spušći, rjekny šef frakcije Zelenych Axel Vogel. Podźěl Łužicy na spomnjenym programje by lětnje něhdźe 70 do 80 milionow eurow wučinjał. Po jeho wědźenju ma Zwjazk wob lěto na wšěch 230 milionow eurow dochodow jeničce z wikowanja z emisijemi z łužiskich milinarnjow. Za Łužiski fonds je so tež hižo CDU wuprajiła.
