Awdiencu pola bamža dóstała je amtěrowaca Miss Germany, wučerka katolskeje nabožiny Lena Bröder. 26lětnej spjelni so tak „són žiwjenja“, rjekny wona powěsćerni dpa. Bamž Franciskus chce ju 15. junija we Vatikanje witać. Budźe to prěni króć scyła, zo bamž Miss Germany na awdiencu přijmje. Bröder, kotraž bě sej titul w februaru zdobyła, wuwučuje w Münsteru domjacnosć a katolsku nabožinu.­ Hakle na zjězdźe katolikow w Lipsku je wona za swoju wěru wabiła.

Za wodźidłom awta dźěćo ćěšiła je žona w Španiskej, na čož ju policisća zajachu Zastojnicy běchu 25lětnu zadźerželi, po tym zo bě na křižowanišću wopak wotbočiła. Hakle po tym wuhladachu dźěćo na klinje žony. Nimo toho zwěsćichu, zo njebě jězbna dowolnosć žony hižo płaćiwa. Wostanje tuž najprjedy raz w jastwje, zo bychu ju sudnikej předstajili.

Ministerka Stange na swojej turje po kulturnym rumje we Łazu pozastała

Łaz/Korzym (AK/SN/MiR). Stajna wustajeńca wo stawiznach Łaza je dokładnje předźěłana a nowowuhotowana. Wo tym móžeše so sakska statna ministerka za wědomosć a wuměłstwo dr. Eva-Maria Stange (SPD) wčera we Łazowskim Domje Zejlerja a Smolerja přeswědčić. „Dźak wosebje za wobsahowe dźěło. Před tym mam wulki respekt“, rjekny wona čłonam tamnišeho spěchowanskeho towarstwa, kotřiž ju po wustajenišću wodźachu. Dr. Stange přebywaše wčera we Łazu we wobłuku swojeje tury po kulturnym rumje Hornja Łužica-Delnja Šleska. Předsyda towarstwa Reinhardt Schneider rozprawješe, zo dóstawa towarstwo lětne zakładne spěchowanje sydom eurow na čłona ze stron Domowiny. Hornje rumnosće domu gmejna towarstwu bjezpłatnje přewostaja. „Wot lońšeho nimamy wjace žanu běrowowu pomocnicu“, rjekny Schneider, „spěchowanski program ,wobydlerske dźěło‘ dźěłoweje agentury hižo njewobsteji.“ Budyski krajny rada Michael Harig (CDU) pak praji, zo wobsteja tři nowe programy, na kotrychž je wokrjes wobdźěleny.

Damaskus (dpa/SN). Při nalětach wojerskich mašinow na sewjerozapadźe Syriskeje je minjenu nóc znajmjeńša 23 ludźi žiwjenje přisadźiło. Mjez woporami w prowincnej stoli Idlib je znajmjeńša sydom dźěći, rozprawja wobkedźbowarnja za čłowjeske prawa. Město steji přewažnje pod kontrolu ekstremistiskich islamistow. Wobkedźbowarjo z toho wuchadźeja, zo jednaše so wo ruske lětadła.

Zaso mjenje bjezdźěłnych

Nürnberg (dpa/SN). Ličba bjezdźěłnych w Němskej je w meji wo 80 000 na cyłkownje 2,664 milionow woteběrała. To je najniši staw minjenych 25 lět, kaž Zwjazkowa agentura za dźěło w Nürnbergu zdźěli. Přirunujo z lońšim lětom je nětko 98 000 mjenje bjezdźěłnych. Kwota bjezdźěłnosće zniži so wo 0,3 procenty na 6,0 procentow. Ličba njewobsadźenych dźěłowych městnow rozrosće na 655 000. Stawki w Francoskej