Dejnera dla, kotryž njesłodźeše, je w Hennigsdorfje sewjernje Berlina k bijeńcy dóšło. Njespokojny 20lětny bě swój dejner do wotpadkow ćisnył a so pola hosćencarja hóršił. Tón jeho hrabny a won ćisny. Młodostny so ze swojim 45lětnym nanom nawróći, kiž hosćencarjej z pjasću do mjezwoča dyri. Syn rozmjeta nimo toho­ grat, talerje a ketchupowe bleše. Policija wšak nětko přećiwo wšitkim třom ranjenja ćěła dla přepytuje.

Horor za kóždeho młodeho nana: Po puću do porodneje kliniki je so na awtodróze njedaloko Olomouca je so jeho awto zapa­liło. Wón a žona kaž tež šěsćlětny syn móžachu so runje hišće wuchować. Wohnjowa wobora podusy płomjenja. A sanitetarjo starachu so wo žonu­, kotraž mě­je­še hižo hrona. Dowjezechu ju do chorownje, hdźež wona krótko na to strowe dźěćko porodźi.

Dallas (dpa/SN). Na žarowanskej swja­točnosći za pjeć morjenych policistow w Dallasu je prezident USA Barack Obama swojich krajanow namołwjał, rasowe mjezy přewinyć. Wobydlerjo dyrbjeli so „zadwělowanju spjećować a tworić amerisku swójbu, w kotrejž maja wšitcy prawo na jenake wobchadźenje a mjezsobny respekt“. Afroameriski wójnski weteran je minjeny tydźeń na demonstraciji pjeć policistow zatřělił. Jeho motiw bě hida na běłych. Do toho běchu policisća na zasadźenjach dweju čorneju zatřělili.

Gabriel so wobara

Berlin (dpa/SN). Zwjazkowy hospodarski minister Sigmar Gabriel (SPD) chce so nastupajo sudniski rozsud w padźe Edeka/Tengelmann wobarać. Předsyda SPD je dźensa swój dowol na kupje Amrum w Sewjernym morju přetorhnył a so do Berlina wróćił. Na nowinarskej konferency Gabriel kritiku Düsseldorfskeho wyšeho krajneho sudnistwa znowa wotpokaza, po kotrejž bě wón zajaty, jako z wurjadnym wukazom wikowanskemu předewzaću Edeka dowoli rjećaz kupnicow Kaiser‘s Tengelmann přewzać. Sudnistwo bě wukaz zběhnyło.

Ćěkancow bombardowali