Berlin (dpa/K/SN). Dźiwajo na to, zo so paduši spochi husćišo do bydlenjow łamaja, chcył zwjazkowy nutřkowny minister Thomas de Maizière (CDU) wjace pomocnych policistow zasadźić. Tući móhli jako stražnicy we wosebje potrjechenych štwórćach patruljować, minister rjekny. Po někotrych tydźenjach wukubłanja móhli tajke mocy swoju słužbu nastupić, njemějo wšak telko kompetency kaž policajscy­ zastojnicy. Zeleni plany ministra runje tak wotpokazuja kaž dźěłarnistwo policistow GdP. Zeleni rěča wo „etiketowym jebanstwje“. Rěčnik GdP na to skedźbnja, zo njemóžeš bój přećiwo paducham pomocnym mocam přewostajeć. „Trěbni su prawi policisća.“

Brüssel (dpa/SN). Statni a knježerstwowi šefojo čłonskich statow NATO su ukrainskeho prezidenta Petra Porošenka na swoje wjerškowe zetkanje do Waršawy přeprosyli. Z Porošenkom planowane zeńdźenje je jasne znamjo, zo so NATO za stabilitu a wěstotu Ukrainy zasadźuje, rjekny generalny sekretar Jens Stoltenberg wčera w Brüsselu. Wot Ruskeje zawinowane połoženje na wuchodźe kraja zamołwitych NATO dale starosća, Stoltenberg rjekny.

Ruska ma přeprošenje Porošenka za prowokaciju. Kraj čuje so wot přibliženja něhdyšeje sowjetskeje republiki k zapadej wohroženy. Tole su w Krjemlu stajnje zaso zwuraznili. Ukraina je wospjet připowědźiła, zo chcyła so swojeho dotal­neho neutralneho statusa wzdać a zapadnej zakitowanskej aliancy přistupić. Wjeršk NATO wotměje so 8. a 9. julija.

Koparska hra němskeho mustwa přećiwo pólskej wubrance na europskich mišterstwach dźensa wječor w Francoskej ma něšto symboliske. Wona wotměje so na předwječoru 25. róčnicy podpisanja zrěčenja wo dobrym němsko-pólskim susod­stwje. Pólski statny prezident Andrzej Duda je runje dźensa w Berlinje na wopyće, hdźež jeho zwjazkowy prezident Joachim Gauck z wojerskej ceremoniju powita. Wopyt je přewodźany wot wšelakich napjatosćow, kotrež su politiki noweho pólskeho knježerstwa dla mjez Waršawu a Berlinom nastali. Přiwšěm je sej Gauck hakle tele dny žadał, njehladajo na mjezsobne problemy njepozabyć, što je so hižo wšitko docpěło. Při dźensnišej hrě sej přeju, zo by němske mustwo to samsne zmištrowało kaž na swětowych mišterstwach 2006, jako z wrotami přećiwo Pólskej w 91. mjeńšinje po wšěm kraju hobersku koparsku euforiju zbudźi. Marko Wjeńka

Wěcywustojnje wo aktualnym problemje diskutowali

Biskopicy (JK/SN). Komuny a stat su w minjenych měsacach z přijimanjom, zeměstnjenjom a zastaranjom ćěkancow wulke wužadanje zmištrowali. Dźakowano mjezynarodnym politiskim dojednanjam je so ličba ćěkancow čujomnje znižiła. To da wšitkim zamołwitym wo­dychnyć. Zwostanje pak dosć dźěła a wužadanjow, potrěbnym dale skutkownje pomhać. Jedne z bytostnych prašenjow je, kak hodźeli so přičiny ćěkanja wobmjezować abo wotstronić.

Wo tym a wo dalšich móžnosćach pomocy rěčeć bě zaměr diskusijneho popołdnja zawčerawšim w Biskopičanskej radnicy. Přeprosyła bě na nje zapósłanča CDU w zwjazkowym sejmje Marja Michałkowa. Jako fachowca měješe statneho sekretara w zwjazkowym minister­stwje za zhromadne dźěło a wuwiće Hans-Joachima Fuchtela poboku. Tón zamó wěcywustojnje a na přikłady so złožujo wo pomocnych naprawach Němskeje w krajach Azije a Afriki rozprawjeć.