Wuzwolenje noweho prezidenta Federalis­ti­skeje unije europskich narodnych mjeńšin FUEN je směrodajne. Zo bě wjetšina za zastupnika madźarskeje mjeńšiny w Rumunskej na kóncu přewšo snadna, je dopokaz, zo je FUEN pačena: Na jednym boku su ći, kotřiž maja jako mjeńšina poměrnje dobre wuměnjenja, kaž Danojo w Němskej abo Němcy w Danskej. Tež Serbow do tuteje skupiny liču. Na tamnym boku steja mjeńšiny južneje Europy, kotrymž njejsu častodosć najelementarniše prawa při­zwolene; haj, wone dyrbja so stajnje zaso nadpadam njepřećelskich nacionalistow wobarać, kaž Južni Serbja w Chorwatskej. Bywši prezident Hans Heinrich Hansen bě dotal na tele konflikty diplomatisce a ze swojej sewjeroněmskej wurunanosću reagował. Nadźijam so, zo nowy předsyda Loránt­ Vincze swój puć namaka. Při tym móhli jemu Serbja ze swojimi nazhonje­njemi pomhać. Marko Wjeńka

Jědojteho pawka dla su cyłe předawanišćo w delnjosakskim Harpstedće ewakuěrowali. Eksotiske zwěrjatko běchu w kisće z bananami našli. Přiwołani wohnjowi wobornicy móžachu njelubozneho hosća z pomocu fachowca za pawki a dźak skótnej lěkarce dosahnyć. Kaž zwěsćichu, jednaše so wo bananoweho pawka, chětro agresiwneho a jara jědojteho. Po dokładnym pytanju njejsu fachowcy dalšich „slepych pasažěrow“ našli.

Po Facebooku namakana mjasožerna rostlina a hroznje wupadaca ryba słušatej k dźesać skurilnym nowowotkryćam rostlinstwa a zwěriny. Institut za slědźenje družin New-Yorkskeje statneje uniwersity je dźensa lětnu lisćinu bicarnych specijow wozjewił. Mjez nimi su tež hižo wotemrěte. Kaž institut informuje, čaka hišće něhdźe dźesać milionow družin zwěrjatow a rostlin na wotkryće.

Kairo (dpa/SN). Egyptowske wójsko je rozbitki wčera zhubjeneho lětadła linije Egyptair namakało. Dźěle mašiny kaž tež někotre wosobinske wěcy pasažěrow su něhdźe 290 kilometrow před městom Alexandria lokalizowali, zdźěli rěčnik wójska na Facebooku. Za lětowymaj zapisowakomaj zaměrnje pytaja. Předewzaće Egyptair je namakanje rozbitkow mjeztym wobkrućiło.

Rozsud cofnyli

Brüssel (dpa/SN). Němska a tamne staty Europskeje unije njejsu hišće wo dalšim wužiwanju zaničowanskeho srědka njerodźe glyfozata w Europje rozsudźili. Dokelž njeby w Brüsselu k trěbnej wjetšinje mjez zastupjerjemi statow EU dóšło, njejsu scyła wo tym wothłosowali. Komisija pak je hišće wčera přechodne rjadowanje namjetowała. Hač do přichodneje wutory maja so nětko sobustawske kraje k tomu wuprajić.

Imunitu zběhnyli

Wot dźensnišeho maja producenća cigaretow w Němskej wostrózbjace wobrazy na cigaretowych tyzach wotćišćeć. W druhich krajach hižo zwučene wobrazy wo čornych płucach, wotemrětych nohach a zhnitych zubach maja wosebje młodych ludźi wot kurjenja wotdźeržeć. Po naprašowanju ARD pak jenož kóždy pjaty Němc do toho wěri, zo tajke warnowanja něšto wuskutkuja. Foto: dpa/Christophe Agostinis