Žane wuradźowanja wo wizach
Strasbourg (dpa/SN). Europski parlament so dale spjećuje wo tym wuradźować, wizumowu winowatosć za turkowskich staćanow wotstronić. Rozsud zamołwiteho wuběrka parlamenta płaći, dołhož njeje Turkowska wšitke 72 wuměnjenjow bjezwizumowosće spjelniła, zdźěli rěčnik Europskeho parlamenta dźensa w Strasbourgu. K tomu słuša tež změna wot EU raznje kritizowanych turkowskich antiterorowych zakonjow. Změny pak turkowski prezident Recep Tayyip Erdoğan dotal raznje wotpokazuje.
Wšitke daty wozjewjene
Washington (dpa/SN). Pjeć tydźenjow po prěnich rozprawach wo tak mjenowanych „Panamaskich papjerach“ je Mjezynarodny konsorcij inwestigatiwnych žurnalistow (ICIJ) zakładne daty wšitkich w dokumentach jewjacych so wosobow a firmow wozjewił. Daty z informacijemi něhdźe 200 000 předewzaćow, fondsow a załožbow su nětko na internetnej stronje ICIJ přistupne.
„Chětro spodźiwne“
Přichodny biskop Drježdźansko-Mišnjanskeje diecezy Heinrich ...
Naležnosć konsekwentnje dale wjesć
Njebjelčicy (AW/SN). Serbja maja swoje naležnosće sami rjadować. Tule w rozmołwach z politikarjemi často zwuraznjenu sadu Iniciatiwna skupina za demokratisce legitimowane ludowe zastupnistwo serbskeho ludu – Serbski sejm chutnje bjerje. Njebudźe tuž přichodnje wjace na pokiwy politikarjow a nawodow wšelakich gremijow dźiwać, ale swój puć dale kročić. Tole je wuslědk wčerawšeho wuradźowanja iniciatiwneje skupiny w Njebjelčicach.
W přihotach na planowanu klawsuru 11. junija w Njebjelčicach nastajichu sej iniciatiwnicy konkretny plan, kak chcyli dale postupować, zo bychu swój zaměr docpěli. Mjez druhim maja předwidźane přewjesć dźěłarničku z młodźinu, w blišim času chcyli dozhotowić nowu internetnu stronu iniciatiwy, podpismowu akciju k podpěrje peticije wo zakonske zawjedźenje Serbskeho sejma powjedu dale, za nazymu přihotuja podijowu diskusiju a skónčnje chcyli přewjesć prawólby parlamenta. Tón ma zlegitimować zjawne wólby demokratisce legitimowaneho ludoweho zastupnistwa Serbow.
Historikarka wuznamjenjena
Myto Viadriny 2016 wčera w Frankfurće nad Wódru spožčili
Frankfurt n. W. (dpa/K/SN). Pólska historikarka a politologowka Hanna Wolff-Powęska bu wčera z Mytom Viadriny 2016 Europskeje uniwersity Frankfurt nad Wódru wuznamjenjena. Spěchowanski kruh uniwersity hódnoći z mytom jeje njesprócniwe zasadźowanje za pólsko-němske wujednanje.
Styki wudźeržować
Myto Viadriny, Europskeje uniwersity w Frankfurće nad Wódru, pólskej stawiznarce je wažny signal. Prof. Dr. Anna Wolff-Powęska njeje so ze swojim dźěłom jenož wobstajnje za lěpše pólsko-němske poćahi zasadźała. Wona je zdobom razna přećiwnica wuwiwaceho so nacionalizma w Pólskej a druhich krajach. Stajnje je na to skedźbnjała, zo hodźa so problemy Europy jeničce we wzajomnej zhromadnosći rozrisać. Runje wo to wšak pólske knježerstwo dźeń a mjenje rodźi.
Nam Serbam měło tele wuwiće pohon być, dale dobre styki k druhim krajam a předewšěm k tamnišim mjeńšinam wudźeržować, hač w mjeńšinowym sekretariaće w Berlinje a nic naposledk w Federalistiskej uniji europskich narodnych mjeńšin. Ta změje přichodny tydźeń runje w pólskim Wrócławju swój kongres. Dobra składnosć to tež za nas, so dale wo wzajomnosć europskich mjeńšin prócować. Marko Wjeńka
Dobre wuhlady
Pytaja za naslědnikom
Wjace wojakow
Naiwna Europa
Zürich (B/SN). Islam ma wot swojeho załoženja před 1 300 lětami zaměr, křesćanow ze Srjedźneho wuchoda wuhnać. Tele měnjenje zastupuje syrisko-ortodoksny biskop za Šwicarsku a Awstrisku Dionysos Isa Gürbüz w dźeniku Tages Anzeiger, wuchadźacym w Zürichu. Po jeho słowach bě so genocid na křesćanach hižo w 7. lětstotku skradźu započał. Tež w přichodnych lětach budźe na Srjedźnym wuchodźe knježić „duch terora“. Nimo toho je naiwne do toho wěrić, zo so muslimscy ćěkancy Europje přiměrja a zo su z křesćanami w měrje hromadźe žiwi. Ja do toho wěrju, zo ličba tu zasydlacych so muslimow dale přiběra a zo budu křesćenjo potom tež tu přesćěhani. „Štož so dźensa na Bliskim wuchodźe stawa, stanje so tež tu w Europje.“ Gürbüz nochce k hidźe namołwjeć, 1 300 lět přesćěhanja pak jeho wuča, zo njesměš muslimam wěrić.
Chorownja před insolwencu
To a tamne (10.05.16)
Ćěłowe awto zaso namakali su po nimale 24hodźinskim pytanju w Mnichowje. Pěšcy wuhladachu pólski ćěłowy wóz, w kotrymž ležeše zemrěta žona, njedaloko rěki Isar. Šofer je po zdaću woprawdźe zabył, hdźe bě awto wotstajił. 24lětny měješe ćěło z Italskeje do Pólskeje wjezć. Njedźelu bě so za přestawku w Mnichowje rozsudźił. Parkowanišćo pak pozdźišo wjace njenańdźe. Město toho pytaše w dospołnje wopačnej kónčinje wokoło hłowneho dwórnišća. Bjezradny prošeše wón na to policiju wo pomoc. Pokiwow na alkohol žanych njebě.
Do hłubiny padaca kruwa je w Pfalcy třěchu bydlenskeho domu wobškodźiła. Kaž policija zdźěli, bě skoćo njedźelu we Waldfischbachu z tři metry wysokeje skały padnyło, před kotrejž domske steji. Tam wottorhny dešćikowu rołu, při čimž so kaž dźiw jeno snadnje zrani. Kak bě kruwa na skału přišła, njeje jasne.
