Awtor dźensa André Strelow

Finalne koła, bój wo postup a zestup, pražena kołbaska a čerstwe napoje na kromje bliskich hrajnišćow za přihladowarjow přeco hišće móžne a dowolene njejsu. Poprawom wočakowach, zo móžu so kónc apryla, spočatk meje jako kopar kaž tež sudnik zaso na hrajnišćo wróćić. Znatych přičin dla to bohužel móžno njebě. Trochu mje tróštuje, zo móža znajmjeńša dźěći w skupinkach trenować. W Drježdźanskim sportowym kompleksu „Ostra“ su prawidłownje tři kumštne trawniki derje wobsadźene. Tam dźěći z połnej paru wokoło kehelkow šuskaja a za bulom honja. Wězo so prašach, hač je to wšo docyła dowolene. W zakonskich łopjenach je prawidłownje w krótkim času rozjasnjene, što směš a što nic. Jako přihladowar naprašowach so přitomnych staršich, ale tež trenarjow. Wotmołwy běchu rozdźělne. Najčasćišo zhonich, zo so starši na trenarja spušćeja. Trenarjo mi prajachu, zo sami často njewědźachu, što je dowolene a što nic. Přiwšěm je rjenje, zo docyła zaso dźěćace mustwa sportuja. Móžu pak sej derje předstajić, zo towarstwa sobustawow zhubjeja.

Sport (14.05.21)

pjatk, 14. meje 2021 spisane wot:

Wot soboty na njedźelu přestorčili

Třeći zwjazkowy koparski ligist Dynamo Drježdźany wuhraje swój duel wo postup do druheje ligi hakle njedźelu. Hra přećiwo Türkgücu Mnichow bu wěstotnych přičin dla přesunjena.

16.05.  14:00  Dynamo Drježdźany

  – Türkgücu Mnichow

22.05.  13:30  SV Wehen Wiesbaden

  – Dynamo Drježdźany

Firmowy běh ma nowy termin

Sportowy klub Wojerecy je druhi ­nakład Krabatoweho firmoweho běha wot 9. junija wo tři njedźele na 30. junij přesunył. Přičina je aktualna situacija. Přihoty pak dale běža, tak zamołwići SC Wojerecy. Při firmowym běhu dyrbi kóžde mustwo 20 kilometrow běžeć, pak z dwěmaj pak z štyrjomi kilome­trami na běharku abo běharja. Loni bě w Čornym Chołmcu 222 sportowčow a sportowcow startowało.

Kup sej trikot mišterkow

Přiwisnicy Drježdźanskeho SC maja wotnětka móžnosć sej mišterske trikoty kupić. Na internetowej platformje eBay přesadźuja originalne košle pjateje finalneje hry wo Němske wolejbulowe mišterstwo. Hač do 18. meje smědźa fanojo za indiwiduelne unikaty poskitk wotedać. Pjenjezy dóstanje dorost Drježdźanskeho SC.

W Rakecach čuchać

Narodne mustwa wołaja

srjeda, 12. meje 2021 spisane wot:

Po dobyću mišterstwa kónc apryla (SN wo tym rozprawjachu), njeplanuja wolejbulistki Drježdźanskeho sportoweho kluba (DSC) tučasnje žadyn wotpočink abo dowol, ale maja wažne nadawki w jednotliwych narodnych mustwach. Měrko Korjeńk je tule krótki přehlad zestajał:

Němska

Za narodne mustwo wolejbulistkow su z Drježdźanskeho kadra štyri hrajerki nominowane, nadběhowarce Jennifer Ja­ni­ska a Lena Stigrot, srjedźna blokowarka Camilla Weitzel a přihrawarka Sarah Straube. Za 19lětnu Straube je to prěnja nominacija za A-narodne mustwo. Pod nawodom trenarja Alexandera Waibla je so talentowana přihrawarka na partije přećiwo Francoskej spočatk meje při­ho­to­wała. Camilla Weitzel, Lena Stigrot a Jennifer Janiska přihotuja so na narodnu ligu, kotraž je wot 25. meje do 20. junija w italskim měsće Rimini planowana. Swětowy wolejbulowy zwjazk FIVB je ju prěni raz lěta 2018 za žony a paralelnje za muži zawjedł. W Riminiju nastupi 16 žonjacych teamow, a kóždy ma w předkole 15 hrow. Po tutym programje wubědźuja so najlěpše štyri mustwa wo dobyćerja.

Šwicarska

Změnjeny format

srjeda, 12. meje 2021 spisane wot:

Swětowy wolejbulowy zwjazk FIVB je ko­ronapandemije dla hrajny format za narodnu ligu w sezonje 2021 změnił. Turněrowej seriji žonow a muži – předkoło a finalne koło – budźetej jenož na jednym městnje w tak mjenowanym „event-bubble“. Turněraj žonow a muži přewjedu w italskim Rimini.

Předkoło žonow steji w sportowym kalendrje wot 25. meje do 2. junija, mužojo nastupja wot 28. meje do 23. junija. Za kóždy turněr je so 16 narodnych wubrankow přizjewiło. Wone wubědźuja so na pjatnaće hrajnych dnjach kóžda přećiwo kóždej. W finalnym kole pak smědźa lětsa štyri město šěsć cyłkow nastupić. Kónčne koło žonow budźe 24./25. junija, mužojo postaja swojeho dobyćerja potom 26./27. junija. Wšitcy fanojo sporta při wysokim saku dóstanu w času 32 dnjow 124 wolejbulowych partijow top-narodow z cyłeho swěta serwěrowanych. Telewizijny sćelak, kotryž ma hry wusyłać, dotal jasny njeje. Měrko Korjeńk

Narodna liga – prěnje hry žonow

25.05. 13:00 Němska – Ruska

26.05. 10:00 Nižozemska – Němska

27.05. 10:00 Němska – Belgiska

Dalši wažny krok k postupej

wutora, 11. meje 2021 spisane wot:

Dynamo Drježdźany – Viktoria Köln 2:0 (2:0)

Zestawa domjacych: Broll – Kwadwo, Knipping, Ehlers, Stark, Ch. Löwe, Will (59. Stefaniak), Diawusie (46. Kreuzer), Königsdörffer (28. Vlachodimos), Mörschel (72. J. Löwe), Hosiner (46. Stor)

Tež hrajna doba w třećej koparskej lize Němskeje so pomału nachila. Kaž kóžde lěto znowa zas steja wosebje mustwa w pincy tabulki, ale tež načolne w fokusu přiwisnikow. Za Dynamo Drježdźany, načol­nika třećeje ligi, steješe minjenu sobo­tu na 36. hrajnym dnju domjaca partija přećiwo Viktoriji Köln na planje. Prjedawši Drježdźanski trenar Olaf Janßen ju tučasnje trenuje a nawjeduje. Tři dypki přećiwo Kölnjanam běchu hosći­ćeljo kruće zaplanowali, dokelž je bój wo postup přeco hišće jara wuski. Nimo Dynama Drježdźany wojuja wo krok etažu wyše hišće Hansa Rostock, TSV 1860 Mnichow a FC Ingolstadt.

Playoff-hry w DEL 2 běža

wutora, 11. meje 2021 spisane wot:

Cyle spěšnje po dočasnym kóncu w 2. zwjazkowej lize lodohokeja (DEL 2) přewjedźechu hižo štwórćfinalne hry za postup do primarneje etaže lodo­hokeja. Łužiske liški z Běłeje Wody a Drjež­dźanske lawy maja hižo přestawku, wšako jeju sezona přewuspěšna njebě. Tež třeće mustwo ze Sakskeje, Lodowi piraća z Crimmitschauwa, je playoff-hry snadnje misnyło.

Wulki faworit na postup a zdobom lětuši mišter, mustwo Kassel Huskies, měješe w štwórćfinalu mało ćežow z Heilbronnskimi Sokołami. Tři hry přećiwo nim je cyle spěšnje dobył (6:4, 8:2, 9:6) a sej tak prěni tiket za połfinale zawěsćił. Tamne tři duele běchu snadniše. Cyłk Towerstars Ravensburg přesadźi so z 3:1 přećiwo Tölzskim lawam. Prěnju hru Towerstary hišće ze 3:6 přěhrachu, po tym běchu­ dwójce w podlěšenju wuspěšni (3:2 a 2:1). Wšo rozsudźaca hra bě tohorunja jara napjata a skónči so 5:4 na dobro Ravensburga.

Florian Baudisch bě so hakle spočatk sezony wot młodźiny A mužacemu mustwu Budissy Budyšin přidružił, byrnjež móhł hišće jednu hrajnu dobu w dorosće na polu stać. Dokelž pak za swoju starobu hižo jara suwerenje agěruje, jemu šeftrenar muži Tomaš Henčl dowoli, swoje zamóžnosće tež hižo tam pokazać.

W lěće 2008 započa Baudisch z aktiwnej kopańcu hnydom pola najwjetšeho towarstwa wokrjesneho města. Wobstajnje wukubłany w cyłej młodźinskej płoninje je wón derje bjez přetorhnjenja krok po kroku swoje kwality we wšelakorych koparskich wobłukach polěpšał. Te móže nětko tež w krajnej lize pokazać.

Dohromady ma Florian, zasadźeny hłownje w ofensiwnym, srjedźnym polu, hižo w pjeć koparskich zetkanjach 195 mjeńšin hrajneho časa, a to mjez druhim tež w derbyju přećiwo KST 1990 Nowosólcej-Hrodkej. Tam su so jemu samo prěnje wrota na mužacej etaži poradźili, a zawěsće to jeničke njewostanu.

Statistika zasadźenjow Floriana Baudischa za jednotliwe cyłki

Budissa Budyšin 7 hrow/1 wrota

Statistika jeho zasadźenjow w jednotliwych koparskich klasach

krajna liga 5 hrow/1 wrota

Zhromadny dźěłowy plan za přichodne lěto staj sej trenar dorostoweje serbskeje koparskeje wubranki starobneje klasy D Tadej Cyž z Njebjelčic a starosta Serbskeho Sokoła z.t. Milan Funka na zetkanju z Clemensom Škodu, referentom Domowiny za kulturu, w Budyskim Serbskim domje dorěčałoj. Tadej Cyž rjekny: „Situacija je pan­demije dla dale wobćežna, dokelž hodźi so tučasnje špatnje planować. Ličimy pak z wolóženjemi wot třećeho kwartala. Hdyž bychmy lětsa někotre zhromadne zwučowanja přewjesć móhli, a k tomu jednu wuměnu z Drježdźanskim gymnazijom w septembrje a wobdźělenje na halowym koparskim turněrje, snano tež w Drježdźanach w zymje, bych ja wosobinsce spokojom był.“

Milan Funka přilubi při přewjedźenju akcijow pomoc Serbskeho Sokoła a dźakowaše so Cyžej za angažement: „Dorost je naš přichod a wjeselu so, zo mamy swěrnych serbskich trenarjow dorosta kaž Tadeja, kotřiž so nětko hižo wo za­kłady za přichod serbskeho sporta staraja.“ Marcel Brauman

Trening zaso trochu wobmjezowany

wutora, 11. meje 2021 spisane wot:
Wobmjezowanja w zwisku z koronapandemiju nas dale přewodźeja. Kopańcu a trening nastupajo je situacija tučasnje zaso trochu wobmjezowana. Zwučować smědźa z dźěćimi a młodostnymi hač do staroby 14 lět w małych skupinach. Trenar-nazwučowar trjeba za to aktualny negatiwny koronatest. Młodźina D Jednoty Kamjenc zwučuje tučasnje dwójce/trójce wob tydźeń. Treningowe wobsahi su jara wotměnjawe. Tak zaběraja so prawidłownje z koordinaciju a z lochkoatletiku. Wšako je tež za ko­parjow wažne, ćěło runostajnje poćežować. Wosebje w času homeschoolinga, hdźež šulski sport pobrachuje, to dźěći z wjeselom činja. Foto: Tadej Cyž

Wuslědki (11.05.21)

wutora, 11. meje 2021 spisane wot:

Kopańca, tabulka třećeje ligi

1. Dynamo Drježdźany 36 56 : 29 69

2. Hansa Rostock 36 50 : 32 67

3. TSV 1860 Mnichow 36 66 : 30 65

4. FC Ingolstadt 04 36 48 : 38 65

5. 1. FC Saarbrücken 36 64 : 49 56

6. SV Wehen Wiesbaden 36 57 : 48 56

7. SC Verl 36 65 : 53 54

8. 1. FC Magdeburg 36 41 : 43 50

9. Viktoria Köln 36 48 : 55 49

10. Waldhof Mannheim 36 48 : 54 48

11. Türkgücü Mnichow 36 44 : 50 46

12. Halleski FC 36 46 : 58 46

13. FSV Zwickau 36 42 : 44 45

14. MSV Duisburg 36 50 : 60 43

15. 1. FC Kaiserslautern 36 43 : 48 41

16. SV Meppen 36 35 : 58 38

17. KFC Uerdingen 05 36 36 : 49 37

18. Bayern Mnichow II 36 45 : 55 36

19. VfB Lübeck 36 39 : 54 34

20. HZ Unterhaching 36 39 : 55 31

zbywacy program načolnych mustwow – 37. hrajny dźeń

15.05. 14:00  Dynamo Drježdźany –

Viktoria Köln

15.05. 14:00  HZ Unterhaching –

FC Hansa Rostock

15.05. 14:00  MSV Duisburg –

FC Ingolstadt

16.05. 14:00  TSV 1860 Mnichow –

FC Bayern Mnichow II

zbywacy program načolnych mustwow – 38. hrajny dźeń

22.05. 13:30  SV Wehen Wiesbaden –

Dynamo Drježdźany

22.05. 13:30  FC Hansa Rostock –

VfB Lübeck

22.05. 13:30 FC Ingolstadt –

TSV 1860 Mnichow

David Matik

nawěšk

nowostki LND