FC Energija Choćebuz –

SC Verl 1:0 (0:0)

FC Energija Choćebuz: Bethke – Rorig, Kusić, Slamar, Borgmann, Pelivan, Ciğerci (90.+2 Hasse), Möker (68. Hofmann), Copado (78. Tallig), Thiele (68. Engelhardt), Halbauer (46. Krauß).

wrota: 1:0 Krauß (59.)

Přećiwnik bě ze seriju dźesać njeporaženych hrow pospochi do Łužicy přijěł. A runje tak sylnje předstajichu so hosćo w Choćebuzu. Přećiwnik wustupi kompaktnje, wěsće a sebjewědomje w LEAG-stadionje. Tak mějachu hosćićeljo dosć dźěła, wrota derje zakitować. Přiwšěm dóńdźe k dwěmaj šansomaj. Jednu z nich wotwobara Elias Bethke a tu tamnu Timmy Thiele a Lucas­ Copado.

Po lětach w prěnjej a druhej zwjazkowej koparskej lize je za FC Energiju Choćebuz kalendrowe lěto 2024 najwuspěšniše w mjeztym 59lětnych towarstwowych stawiznach. Swój wjeršk měješe w prěnim połlěće z postupom do třećeje ligi. Wot awgusta potom postara so FC Energija jako klasowy nowačk w třećej lize wo postupne městno w tabulce.

Zawěsće móžachu so wuspěšne stawizny jenož ze zhromadnosću docpěć. Přiwšěm dawaše tójšto indiwidualistow, a tući so nětko po lětdźesatki trajacej tradiciji w prěnich tydźenjach noweho lěta wuznamjenichu. Kaž přeco běchu to fanojo, kotřiž swój hłós wonym hrajerjam dachu. Hrajerjam kotřiž su so ze swojimi wukonami wo wuspěchi mustwa postarali. Z 9 504 hłosami přesadźi so wrotar FC Energije Elias Bethke. Ofensiwnaj hrajerjej Timmy Thiele a Maksimilian Krauße dóstaštaj 6 233 resp. 2 942 hłosow.

W předchadźacych štyrjoch tydźenjach bjez hrow su so Worklečanscy wolejbulisća prěnjeho mustwa na 6. městno tabulki sakskeje klasy sunyli. To měješe so nětko na domjacym hrajnym dnju zaso skorigować.

Viktoria Worklecy –

ST Kupoj-Nowa Łuka 3:0

(25:23, 25:22, 28:26)

Prěni přećiwnik dnja, ST Kupoj-Nowa Łuka, bě w aktualnej sezonje dotal jenož dwě sadźbje dobył a steješe bjez dypkow na kóncu tabulki. Bě hra za Viktoriju potajkim ryzy formalna wěc? Skerje nic!

Domjacym pobrachowaše za prěnju hru ze zwjeselacych swójbnych přičin Sćěpan Wjeńka. Mustwo bu tuž z wjacorymi hrajerjemi młodźiny Viktorije napjelnjeny.

Tak bě hra spočatnje wočakowanjam wotpowědujo trochu kopolata, běhanske puće njeběchu hišće perfektnje wotrěčane. Kupoj-Nowa Łuka wosta přeco w hrě a hač do kónca sadźby z Worklečanami na samsnej runinje. Tola Viktorianojo wobchowachu čuwy a dobychu prěnju sadźbu snadnje 25:23.

Wot pjatka do njedźele přebywaše 23 mužow prěnjeho koparskeho mustwa z Radworja w treningowym lěhwje w čěskim měsće Lovosice.

Hnydom po přijězdźe do hotela wotmě so prěnja treningowa jednotka, w kotrejž trenowachu koparjo swoju wutrajnosć. Wězo hrajerjo w połdra hodźinje trajacym treningu tež bul widźachu. Po krótkej přestawce přewjedźechu w fitnesowej rumnosće zwučowanja za stabilizaciju ćěła. Přizamkowacu so wječer w hotelu běchu sej z tym zawěrno zasłužili.

Dźeń zakónčichu z rozmołwu mjez mustwom a trenarskim teamom. Sobotu zahajichu 8 hodź. z rańšim běhom nimale štyrjoch kilometrow. W dopołdnišej treningowej jednotce mužojo zaso wjele běhachu, tak zo jim zdźěla samo muskle zaprajichu. Po dlěšej přestawce dźěše z prěnjej z dweju testoweju hrow přećiwo čěskemu FK Duchkovej dale.

ST 1922 Radwor – FK Duchcov 4:5 (1:2)

Zestawa Radworčanow: Šěrak, Sende – Wjeńka, M. Dźisławk, M. Grubert, Paška, Adam, Schöne, Hetaš, Wróbl, Wenzel, C. Dźisławk, Dej, L. Pěčak, Elsner, Wawrik