Wolejbulisća nalěćo witali
Wólnočasne wolejbulowe mustwo Žołto-módri Kulow je wčera wječor w Ralbicach wolejbulowy turněr Mustwa 1296 z mjenom „Witamy nalěćo“ dobyło. Konrad Kokel, Florian Kochta, Raphael Hentschel, Max Scholze a Sandro Krahl (wotlěwa, wšitcy Kulow) dóstachu wot turněroweho nawody Jana Hrjehorja (naprawo) wopismo a nalětnje kwětki jako myto. Na wobrazu pobrachujetaj Manuel Šołta a Richard Bulang. Kulowčenjo dobychu z jeničkim małym dypkom předskoka přećiwo wučerjam Serbskeho gymnazija Budyšin. Třeće městno wobsadźichu Radworčenjo.
Foto: Tomaš Šołta
Prěnju domjacu hru druheje połserije přěhrali
ST 1922 Radwor –
Wojerowski FC II 0:2 (0:1)
Zestawa domjacych: Pěčak – B. Grubert, M. Grubert, Schäfer, Mička (55. Elsner), Adam (73. Reineke), Wencel, Paška, Wjenka (73. Wjesela), Glücklich (55. Buša), Hetaš (55. Dźisławk)
W prěnjej domjacej hrě druheje połojcy sezony witachu Radworčenjo druhe mustwo Wojerowskeho FC. Něhdźe 40 přihladowarjow bě puć na Radworske sportnišćo namakało.
Konječenjo serbski derby přećiwo načolnikej dobyli
ST Viktoria Worklecy –
DJK Konjecy 5:10
Za Worklecy hrajachu: Roman Straube, Stefan Mět, Milan Lukaš, Robert Lejnart, Tobias Lehmann, Stefan Anders
Za Konjecy hrajachu: Matijas Kokla, Alojs Ćóška, Rafał Šěrak, Julian Hrjehor, Frank Woko, Jurij Šwejda
Na třinatym hrajnym dnju w 1. wokrjesnej lize wotmě so we Worklecach serbski blidotenisowy derby mjez prěnimaj mustwomaj ST Viktorije Worklecy a DJK Konjecami. Wobě mustwje dyrbještej z narunanskimi hrajerjemi nastupić. Worklečanam wupomhaštaj Tobias Lehmann a Stefan Anders, zastupujo Mikławškec bratrow Křesćana a Michała. W rjadach Konječanow hraješe Jurij Šwejda za Andreja Čórlicha.
Po witanju bu hra z partijemi dwójkow zahajena. Prěni duel doby hosćićelski duwo Straube/Mět 3:0 po sadźbach přećiwo dwójce Šěrak/Hrjehor. Po tym pak so Konječanskej porikaj Kokla/Čóška přećiwo duwu Lukaš/Lejnart 3:0 a Woko/Šwejda přećiwo dwójce Lehmann/Anders 3:1 přesadźištej. Serbski blidotenisowy derby wosta tuž z 1:2 po třoch partijach wuski, dokelž so w tutej fazy žanomu teamej rozsudna kročel njeporadźi.
Kónctydźenske wuslědki (09.03.26)
Minjeny kónc tydźenja steješe hłownje w znamjenju wolejbula a kopańcy. Po wjacorych wupadnjenych a přesunjenych koparskich hrach su sobotu a njedźelu nimale wšudźe zaso kopańcu pod hołym njebjom hrali.
We wyšej lize su Biskopičenjo wonkownu hru přećiwo Germaniji Halberstadt 3:2 dobyli. Dobyćerske wrota za mustwo trenarja Franka Ričela docpě Johan Weiß (90.+1). Budissa Budyšin podleža doma hosćom z Glauchauwa 1:2.
W sakskej klasy nawróćichu so Němskopazličenjo z dobyćom 2:0 z Radebeula. Wot 39. min. dyrbjachu hosćo z dźesać koparjemi dale hrać, dokelž bě Franz Cech čerwjenu kartku dóstał.
Derby we wokrjesnej wyšej lize Kulow – Rakecy skónči so 3:0. Ralbičanscy Sokoljo su sobotu w Połčnicy 0:1 přěhrali. Chróšćenjo podležachu wčera w Hórkach hosćom z Horow 0:2.
Přichodne hry:
10.03. 19:30 Viktoria Worklecy –
SZ Ullersdorf
20.03. 19:30 TTV Hózk/Kulow II –
Viktoria Worklecy
20.03. 19:00 DJK Konjecy –
TTC Wojerecy III
17.04. 19:00 DJK Konjecy –
TTV 97 Kamjenc
Widźał, słyšał, napisał (09.03.26)
Awtor dźensa
Clemens Šmit
Olympiski duch – je wón was tónraz zhrěł? W Mailandźe a Cortinje d’Ampezzo wojuja tuchwilu sportowcy a sportowče ze zbrašenjom abo z handicapom wo medalje w zymskich disciplinach. Na paralympiskich hrach dopokazuja, kajke ekstremne wukony zamóže čłowjek docpěć. Tola mjeztym rěči a piše so wottam hižo wo nalětnich olympiskich hrach. A wobrazy pokazuja, zo słónčko tež w sewjernej Italskej hižo zymu rozžohnuje. Němski atlet Marco Maier je wčera z krótkim trikowom a w krótkich cholowach na sněhakach startował. Skerje skurilny napohlad, a wón njebě jenički. Naposledk je sej Maier bronzowu medalju wudobył. Gratulaciju! Při zahajenju wšak paralympiske hry cyle tak słónčne njeběchu. Němscy zastupjerjo a zastupjerki běchu wotewrjensku galu bojkotowali, dokelž ruscy atleća a atletki prěni raz zaso pod swójskej chorhoju startowachu.
Sport (06.03.26)
Koparski derby w Kulowje
Winowatostna koparska hra w Połčnicy na kumštnym trawniku mjez koparskim mustwom TSV Połčnicy II a prěnim koparskim mustwom sportoweho towarstwa Marijineje hwězdy twori jutře připołdnju zazběh koparskich hrow. Tež Ralbičenjo hraja we wokrjesnej wyšej lize w měsće poprjancow. Přiwisnicy, kiž chcedźa sej hru prěnjeho koparskeho mustwa SJ Chrósćicy přećiwo hosćom z Horow wobhladać, dyrbja sej do Hórkow dojěć. Tam přewjedźe so tež partija rezerwy SJC.
07.03. 12:45 TSV Połčnica II –
ST Marijina hwězda
07.03. 14:00 FC Energija Choćebuz –
Hansa Rostock
07.03. 15:00 TSV Połčnica –
Sokoł Ralbicy/Hórki
07.03. 15:00 Módro-běli Kulow –
Rakečanske ST
08.03. 12:30 SJ Chrósćicy II –
Zeleno-běli Sepicy
08.03. 15:00 SJ Chrósćicy – LSV Hory
08.03. 15:00 ST Radwor –
Wojerowski FC II
Wolejbul kónc tydźenja
Choćebuženjo dale bjez poražki
FC Energija Choćebuz – SC Verl 0:0
FC Energija Choćebuz: Funk – Cvjetinović, Manu, Awortwie-Grant, Straudi, Pelivan (65. Tolga Ciğerci, Borgmann, Lucoqui (65. Michelbrink), Tolcay Ciğerci, Hannemann (77. Moustfa), Engelhardt
Duel načolnika tabulki přećiwo štwórtemu třećeje ligi njeměješe žanoho dobyćerja, dokelž steještej wobě mustwje jara stabilnje w defensiwje. Wostudła pak partija njebě, dokelž pokazaštej Choćebuz a Verl w srjedźnym polu přeco zaso dobre akcije.
Po přestawce měještaj Erik Engelhardt, kotryž hraješe nałamaneho nosa dla z masku, a Tolcay Ciğerci wulkej šansy, kotrejž pak k wuspěchej njewjedźeštej. W přidatnym hrajnym času pak sadźichu hosćo z Verla wšitko na jednu kartku, zo bychu po třoch wonkownych poražkach skónčnje tři ličaki sobu domoj wzali. Tola přeco zaso zamóchu koparjo FC Energije wjelelubjace pospyty SC Verl wotwobarać. Po remisu drje je FC Energija swoju poziciju na čole tabulki zhubiła, tola Choćebuženjo su dale w načolnej skupinje třećeje ligi zaměstnjeni.
VfB Stuttgart II –
FC Energija Choćebuz 1:2 (0:0)
Faworita jasnje porazyli
Posledni test derje zmištrowali
SJ Chrósćicy II –
Módro-běli Kulow II/Wóslink-Skaskow 4:0 (3:0)
Za domjacych hrajachu: M. Mark – Lehmann, Materna, K. Mark, Budar, Sćapan, M. Zahrodnik, Kř. Zahrodnik, J. Donat, B. Donat, Bjeńš, T. Donat, Klemenc, M. Donat, F. Zahrodnik, Špitank, Kola, Brühl
Za hosći hrajachu: Leonhardt – Kral, Jorsch, Paß, Fiebig, Semjank, Richter, Szczepanski, Pjaca, Modsching, Schäfer, Dittrich
Njedźelu je druhe koparske mustwo SJ Chrósćicy swój druhi test do zahajenja druheje połserije přewjedło. Na hrajnišću w Hórkach nastupichu Chróšćenjo přećiwo druhemu mustwu z Kulowa, kotrež twori z towarstwom Wóslink-Skaskow hrajne zjednoćenstwo. Jako wokrjesny ligist chcychu hosćićeljo přećiwo mustwu wokrjesneje klasy swoje zamóžnosće na trawniku dopokazać.
