Serbowka z Dynamom w Braniborskej
Koparske mustwo žonow SG Dynamo Drježdźany, kiž bu hakle 2024 załožene a kotrež hraje tučasnje w krajnej klasy wuchod, je so w Brandenburgu nad Habolu na tak mjenowanym 11. „Allianz Girls - cupje“ wobdźěliło. Na mocyměrjenju ze sławnymi žónskimi koparskimi mustwami Němskeje je so tež Radworčanka Johana Wjeselic jako koparka SGD wobdźěliła.
Dalši wobdźělnicy běchu mustwa U20 Hertha BSC, HSG Warnemünde, Wocl Brandenburg, FC Hansa Rostock, 1.FC Magdeburg, Hannover 96, ST Zeleno-běli Brieselang, U20 Viktoria Berlin, FSV Babelsberg 74. Turněr wotmě so w koparskej hali „Woclowy palast“ w Brandenburgu nad Habolu. Mustwa nastupichu w dwěmaj skupinomaj, kóžda hra traješe stajnje 10 mjeńšinow.
Tróšku zboža tež trjebaš, ale bjez prócy njeńdźe
Wjac hač 600 hrow a 300 wrotow – to su ličby, kotrež samo mjez profijemi jenož legendy docpěja. Róžeńčan Pětr Domaška bě w podobnych sferach po puću, jenož někotre ligi niže. Nic za Mnichowskich Bayerow, ale za Ralbičanskich Sokołow. W aktualnej hrajnej dobje Pětr Domaška Ralbičanskim Sokołam we wokrjesnej wyšej lize hišće tróšku wupomha, hewak hraje wón za staru gardu we wólnočasnej lize. Feliks Cyž je so z Róžeńčanom rozmołwjał.
Su jedne najwažniše, najrjeńše, najspektakularniše abo tež najkuriozniše wrota, na kotrež so wosebje dopominaš?
Kóžde wrota su wažne, dyrbju cyle sprawnje prajić. Spektakularne wrota sym doma přećiwo koparjam z Ottendorfa-Okrille docpěł, jako sym tak mjenowany kop z padom dozady do wrotow třělił. Abo druhi raz w Ottendorfje, to sym bul ze zdalenosće 50 metrow wot srjedźneje linije do wrotow třělił. A raz sym w jednej hrě wosom wrotow třělił. To běchu wosebite wokomiki. Ale na kóžde wrota so wjac njedopomnju.
Energija znowa zbožo měła
FC Energija Choćebuz –
1. FC Schweinfurt 2:1 (2:1)
Zestawa FC Energije: Funk – Rorig (67. Straudi), Awortwie-Grant, Campulka, Borgmann, Pelivan, Ciğerci (85. Manu), Hannemann (79. Butler), Michelbrink (79. Guwara), Thiele (67. Boziaris), Engelhardt
Hra FC Energije Choćebuz přećiwo poslednjemu tabulki bě – hinak hač wočakowane – jenož zdźěla suwerena. Tak tež po 19 hratych mjeńšinach, jako škit hosćićela wysoki bul wotwobarać njezamó. Špatnje škitany Shurtanov centralnje stejo za Schweinfurt 1:0 přetwori. Tola traješe runje pjeć mjeńšinow, doniž znowa sylny Moritz Hannemann njewotmołwi, jako so w šěsnatce přesadźi, zo by po tym bul do dołheho róžka třělił. Slědowaše jenička faza w hrě, w kotrejž Energija dopokaza, zo chce so na čoło tabulki wróćić. Hłójčkowany bul do wrotow Axela Borgmanna spjelni krótko do přestawki přeća publikuma. Tola bjezmała by FC Energija hišće do přestawki znowa do zastatka přišła. Nyamekye Awortwie-Grant bě Endresa w šěsnatce foulował. Tola sudnik Ballweg rozsudźi so za wólny kop před šěsnatku (45.+3). Johannes Geiss zwrěšći na wrotarju Mariusu Funku.
Serbscy gymnaziasća w Kyrkonošach sněhakowali
Wot 12. januara do 16. januara pobychu šulerki a šulerjo Budyskeho Serbskeho gymnazija w Kyrkonošach w Čěskej. W Janskich Láznjach přewjedźechu na arealu „Černá hora“ sněhakowarske lěhwo. Wuměnjenja za wukubłanje běchu wuběrne. Dokelž je we 8. lětniku wjele šulerkow a šulerjow, wotměje so sněhakowarske lěhwo gymnaziastow lětsa w dwěmaj skupinomaj.
Póndźelu rano čakaše prěnja połojca 8. lětnika hižo njesćerpliwje na wotjězd busa do Janskich Láznjow. Po wobjedźe a rozdźělenju stwow podachu so šulerjo do wupožčowarnje, zo bychu sej trěbne wěcy za sněhakowanje wupožčili. Po wječeri so sněhakowarske lěhwo oficialnje zahaji. Nazajtra po snědani bě prěnja wukubłanska jednotka w skupinach.
Mjez wobdźělnikami běchu započatkarjo a postupnicy. Wšitcy dojědźechu sej z liftom na wjeršk hory. Započatkarjo zeznachu a zaběrachu so ze sněhakowarskim wuhotowanjom a postupnicy přewjedźechu hižo prěnje techniske zwučowanja. Po wobjedowej přestawce sćěhowaše metodiske wukubłanje.
Duel na wysokim niwowje
VfL Pirna-Copitz –
ST Viktoria Worklecy 3:2
(23:25, 28:26, 21:25, 25:11, 15:9)
Za Worklecy hrajachu: Elias Kummer, Benedikt Šołta, Jakub, Beno a Jurij Bobka, Józef Krawc, Jan Zarjeńk a Šćěpan Wjeńka (tohorunja trenar)
Tydźenja dojědźechu sej hrajerjo prěnjeho mustwa Viktorije Worklecy do Pirny na duel mjez načolnikomaj sakskeje klasy wuchod. Mustwo z Pirny bě jasny faworit, wšako je w cyłej sezonje hakle dwaj dypkaj wotedało. Runje tutej dypkaj pak wuwojowachu sej Worklečenjo w domjacej hrě, jako njewočakowano přećiwo sylnemu přećiwnikej dobychu. Z tym bě jich zaměr jasny: Pokazać, zo njejsu w prěnjej hrě jenož zbožo měli!
Ze sylnymi nadaćemi Jakub Bobka a Elias Kummer hnydom ćišć na domjacych wukonještaj. W kombinaciji ze sylnym blokom Bena Bobki tuž spěšny předskok 8:1 natwarichu. Tola Pirnačenjo dopokazachu swoju klasu a dypk po dypku nachwatachu, doniž při stawje 18:17 samo sadźbu njenawjedowachu. Młodźi dźiwi z Worklec pak widźachu šansu, sadźbu dobyć a wojowachu wo kóždy bul. Wosebje sylny nadběh zmóžni Worklečanam, sadźbu naposledk hišće 25:23 za sebje rozsudźić.
Ralbičenjo w Chrósćicach wuspěšni
Jubilejny 20. Mikławšowy wolejbulowy turněr w Chrósćicach je šěstka Sokoła Ralbicy před Žołto-módrymi z Kulowa a Mustwom 12/96 dobyła. Sydom cyłkow bě nastupiło.
W Radworju pjasćobul hrali
Wuslědki (27.01.26)
Kopańca, 3. liga
30.01. 14:00 Saarbrücken – Osnabrück
30.01. 14:00 Vikt. Köln – W. Mannheim
30.01. 14:00 Choćebuz – Hoffenheim II
30.01. 14:00 Hansa Rostock –
FC Ingolstadt 04
30.01. 14:00 Mnichow – Aleman. Aachen
30.01. 16:30 Schweinfurt – J. Regensburg
01.02. 13:30 SSV Ulm – MSV Duisburg
01.02. 16:30 SC Verl – VfB Stuttgart II
Za nowu sezonu zwučowali
Koparjo prěnjeho mustwa SJ Chrósćicy su zašły kónc tydźenja po zwučenym wašnju zymske treningowe lěhwo w Čěskej přewjedli.
Lětsa mějachu swój kwartěr we wsy Příchovice, něhdźe 30 kilometrow južnje Libereca. Pjatk wječor wočakowaše hrajerjow pod nawodom trenarjow Maksimiliana Krala-Zahrodnika a Feliksa Cyža prěnja treningowa jednotka. Za to běchu sej do bliskeho Harrachova dojěli, hdźež na wuběrnym kumštnym trawniku zwučowachu. Na dwuhodźinskim treningu mjez druhim wšelake systemy a taktiki přeńdźechu a je nałožować zwučowachu. Nimo toho spytachu wěste njedostatki zašłych hrow polěpšeć.
Jubileje – často wokomiki ćicheje hordosće
Jubileje su často wokomiki ćicheje hordosće, w priwatnym žiwjenju, w čestnohamtskim zastojnstwje abo w towarstwje. Aktualnje zetkatej so za mnje měznikaj. 60 lět FC Energija Choćebuz a 50 lět čłonstwo FC Energije. 22. januara budźe tomu 50 lět, zo sym sobustaw FC Energije Choćebuz. Běch a sym přeco hišće čłon čisło wosom, ličba, kotraž skutkuje dźensa njewoprawdźita, irealna, wšako mamy mjeztym wjac hač 6 000 sobustawow. Započało bě so za mnje wšo jako amaterski chronist. Wot 1977 mějach w Stadionje přećelstwa mikrofon w ruce. Smědźach 22 lět hłós a přewodnik kopańcy FC Energije być. Tež po 1999, jako běch hižo dawno jako swobodnje dźěłacy sportowy reporter po puću, zwisk njepřetorhnych. Pola nas w bydlenskim sydlišću w Žylowje bydleše 21 koparjow, kotřiž hrajachu w zwjazkowej koparskej lize. Wosebje sym sej zymske treningowe lěhwa w Turkowskej w pomjatku wobchował. Sydom króć běch pódla, zwjetša w małym reporterskim kole. Tajke jězby ludźi hromadu skowaja a wjele wo towarstwje a wosobach powědaja. Zo swjeći Energija Choćebuz nětko swoje 60. narodniny, je tuž wjace hač jubilej.
