Nowosće z Běłeje Wody

wutora, 25. julija 2023 spisane wot:
Kader Łužiskich lodohokejowych liškow so dale pjelni. Přichodny nowopřichad je kanadiski nadběhowar Samuel Dove-McFalls. 26lětny třělc přińdźe ze sewjeroameriskeje ECHL wot Fort Wayne Komets. Dotal hraješe 1,88 metry wulki nadběhowar we wšelakich ameriskich dorostowych ligach kaž tež pola uniwersitneho mustwa New Bruns­wick. 2022 absolwowaše wón swoje prěnje hry w AHL, druhej sewjeroameriskej lize po NHL. Tu hraješe najprjedy pola Grand Rapid Griffins hromadźe z Jona­thanom Martinom, kiž hraješe před třomi lětami tohorunja w Běłej Wodźe, a sezonu pozdźišo pola Bakersfield Condors. Za wobaj teamaj absolwowaše wón cyłkownje 27 hrow. Pola Fort Wayne kometow měješe wón dohromady 45 zasadźenjow, w kotrychž nazběra 38 scorowych dypkow (16 wrotow/22 přihrawkow). Hižo 2011-2012 hraješe w U16 lodowych mjedwjedźow Juniors Berlin. Tu steješe zhromadnje z Vincentom Hesslerom, Charliejom Jahnke a tež Ryanom Warttigom na lodźe. Přiwšěm wostanje Běła Woda za Kanadźana prěnja profistacija zwonka Sewjerneje Ameriki. Aktualnje běži za Samuela Dove-McFalls próstwa wo němske staćanstwo.

Bičwolejbul tež na trawniku hrali

wutora, 25. julija 2023 spisane wot:
Po zazběhowym turněrje před dwěmaj tydźenjomaj we Worklecach a přestawce zašły tydźeń, je bičwolejbulowa tura Radija Satkule w Njebjelčicach wčera swój druhi turněr přewjedła. 19 mustwow je přijěło. Za to je tamniša młodźina dwě hrajnišći spřihotowała, a to wosrjedź wsy na swjedźenišću. Wohnjowa wobora staraše so wo swěcu. W běhu štyrjoch hodźin je so po wjace hač 40 hrach mustwo „Bul přez sak“ přesadźiło. Přichodna stacija bičwolejbuloweje tury je přichodnu póndźelu w lěsnej kupjeli w Kulowje. Foto: Konstantin Hrjehor

Prěnjej lize startujetej

wutora, 25. julija 2023 spisane wot:

Koparjo w regionalnej lize sewjerowuchod a we wyšej lize juh změja swoje zazběhowe hry hižo přichodny kónc tydźenja. FC Energija Choćebuz dyrbi pola Viktorije Berlin nastupić a Budissa Budyšin pola ST 09 Arnstadt. Domjacu lěpšinu změja Biskopičenjo, woni hraja pjatk wječor w Biskopicach přećiwo cyłkej SC Freital.

Regionalna liga muži

28.07. 19:00 Hertha BSC II –

  BSG Chemija Lipsk

28.07. 19:00 Lok Lipsk –

  VSG Altglienicke

28.07. 19:00 Čerwjeno-běli Erfurt –

  F.C. Hansa Rostock II

29.07. 13:00 BFC Dynamo –

  FSV Zwickau

29.07. 13:00 Greifswaldski KK –

  FC Eilenburg

29.07. 14:05 Kamjeničanski FC –

  FC Carl Zeiss Jena

30.07. 13:00 Viktoria Berlin –

  FC Energija Choćebuz

30.07. 13:00 FSV Luckenwalde –

  Berlinski AK

30.07. 13:00 SV Babelsberg –

  ZFC Meuselwitz

Wyša liga mužojo

28.07. 19:00 Biskopičanske KT –

  SC Freital

29.07. 14:00 ST Arnstadt –

  Budissa Budyšin

29.07. 14:00 Motor Marienberg –

  VFC Plauen

29.07. 14:00 1. FC Magdeburg II –

  Ludwigsfeldski KK

29.07. 14:00 FC Jednota Rudolstadt –

  VfB Kśišow

30.07. 14:00 SG Union Sandersdorf –

  Germania Halberstadt

30.07. 14:00 VfB Auerbach –

  FC Grimma

30.07. 14:00 VfL Halle –

  FC Jednota Wernigerode

Klaus Heiduschke

Wubranka Jamaiki sobufaworita mjerzała

póndźela, 24. julija 2023 spisane wot:

Kónc tydźenja wotmě so při koparskim swětowym mišterstwje žonow cyłkownje dźesać hrow. K startej skupiny G wčera rano je Šwedska z 2:1 přećiwo Južnej Africe dobyła. W prěnim přechodźe mějachu so faworizowane Šwedowki najprjedy ćežko a přińdźechu lědma k wotzamknjenjam. Najebać jasnje mjenje hrajnych podźělow mějachu přećiwnicy z Južneje Afriki lěpše šansy. Hakle pjeć mjeńšinow do połčasa přińdźe Šwedska přez Elinu Rubenson a Amandu Ilestedt k dobrym šansam, přiwšěm wostaštej wobě mustwje k połčasej bjez wrotow.

Druhi přechod startowaše z wrotami za Južnu Afriku. Třělwu Thembi Kgatlana móžeše wrotarka Zećira Mušović jenož dosrjedźa wotskočić dać. Tam je Hildah Magaia bul z krótkeje distancy do prózdnych wrotow stłóčiła (48.). Žane dwaceći mjeńšinow pozdźišo slědowaše wurunanje za třećeho swětoweje rjadneje lisćiny. Wot Fridoliny Rolfö wotskoči bul k 1:1 do saka (65.). W kónčnej fazy móžachu Šwedowki partiju tola hišće na so storhnyć a Amanda Ilestedt postara so krótko do kónca wo dobyćerske wrota (90.).

Nowa sezona móže so započeć

póndźela, 24. julija 2023 spisane wot:

FC Energija Choćebuz –

Hertha BSC Berlin II 4:1 (2:1)

Zestawa domjacych: Bethke – Hasse, Campulka, Slamar, Borgmann, Putze (62. Juckel), Hofmann, Oesterhelweg (46. Milde), Euschen, Thiele (46. Heike), Halbauer (46. Ndualu)

Slěd wrotow: 1:0 Hofmann (2.), 2:0 Euschen (17.), 2:1 Ben-Hatira (28./jědnatka), 3:1, 4:1 Heike (55., 57.)

Tež poslednju z wosom testowych hrow je FC Energija Choćebuz jako dobyćer zakónčiła, po tym zo bu tež rezerwa Herthy z něhdyšim trenarjom Energije Stefanom Schmidtom ze 4:1 přewinjena. Čestne wrota Berlinjanow rezultowaše z jara dwělomneje jědnatki, po tym zo bě Axel Borgmann bul pječa z ruku hrał. Pokutny kop sadźi něhdyši hrajer zwjazkoweje koparskeje ligi Ben-Hatira do wrotow. FCE hraješe zwjetša dominantnje. Hdys a hdys pak wotewrichu so we wobaranju tola dźěry, kotrymž ma so w přichodnych dypkowych hrach zadźěwać.

Přiwšěm zda so Choćebuz přihotowany, zo by znowa słowo nastupajo dobyće stafle sobu rěčał. Njedźelu startuje FCE z wonkownej hru pola Viktorije Berlin, sobotu na to gastěruje lońši třeći Erfurt w Choćebuskim „Stadionje přećelstwa“.

Georg Zielonkowski

Zazběhowe hry FC Energije

30.07.  13:00  Viktoria Berlin –

Ronald Cyž, třělc rozsudneje jědnatki, na dobyćerskim wobrazu pobrachuje. Šesty serbski supercup, turněr štyrjoch serbskich koparskich cyłkow, wčera w Njebjelčicach je mjenujcy mustwo Sportoweho towarstwa Marijina hwězda po třělenju jědnatkow dobyło. W finalu přesadźichu so Pančičenjo po bjezwrotowej hrě ze 6:5 přećiwo zakitowarjej titula Sokoła z Ralbic. Hru wo třeće městno dobychu Radworčenjo přećiwo Njebjelčanam ze 4:1. Šesty serbski supercup bě přez 300 přihladowarjow wopytało. Wjace wo tym w jutřišim wudaću. Foto: Jörg Stephan

Koparski prózdninski camp

póndźela, 24. julija 2023 spisane wot:

Dźěći z wulkim wjeselom při Baltiskim morju

46 dorostowych koparjow z Budyskeho wokrjesa, mjez nimi někotři z Drježdźanskich towarstwow a tež serbskich sportowych jednotkow, běchu srjedź julija w 11. EWAG prózdninskim koparskim campje Zapadołužiskeho koparskeho zwjazka w Ribnitz-Damgartenje. Kwartěr poćahny so zaso w młodowni „Rejowarnja“, kotraž leži idylisce centralnje we wsy. Dźakowano Regiobus tzwr móžeše kompletne mustwo cyły tydźeń na městnje mobilne być, zo by treningowe městna a wulětnišća docpěło. Wob tydźeń dožiwichu tři holcy a 43 hólcow z 21 towarstwow jara wotměnjawu měšeńcu sporta, kultury, wólneho časa a zhladowanja do profijoweje kopańcy. Započało bě so wšo k překwapjenju wšitkich po puću na pobrjóh ze stadionowym wodźenjom pola wobdźělnika champions league 1. FC Union Berlin. Po rańšim sporće a wšědnych treningowych jednotkach zwosta wězo tež chwile, zo bychu w baltiskomórskimaj kupjelomaj Dierhagen a Wustrow na třoch popołdnjach k trěbnemu wochłódnjenju ke kupanju šli.

Widźał, słyšał, napisał (24.07.23)

póndźela, 24. julija 2023 spisane wot:

Awtor dźensa

Jurij Bjeńš

Na jednej stronje superstaraj kaž Ada Hegerberg a Caroline Graham Hansen, na tamnym boku jědnaće hosćićelkow z planom. Nowoseelandske koparki su při domjacym swětowym mišterstwje stawizny pisali. Hosćićelki dobychu za­zběhowu hru přećiwo Norwegskej z 1:0 a swjećachu z tym při swojim pjatym wobdźělenju swětoweho mišterstwa prěni wuspěch.

Bywša nadběhowarka zwjazkoweje ligi Hannah Wilkinson da z 42 137 přihladowarkami a přihladowarjemi pjelnjeny Eden park w Aucklandźe štwórtk wječor (čas Auckland) ze swojimi wrotami ržeć. Wuspěch „Football Ferns“, kaž so hosćićelki mjenuja, přećiwo swětowemu mištrej z lěta 1995 a dwójnemu europskemu mištrej bě wulce zasłuženy. Nowoseelandska pokaza přez cyłu distancu jima­cy bojowniski wukon a wědźeše w druhim wotrězku tež hrajersce přeswědčić.

Sport (21.07.23)

pjatk, 21. julija 2023 spisane wot:

Dalše zasadźenje za Krječmarjec

Serbska koparska sudnica Lea Krječmarjec změje jutře dalše zasadźenje w Rakecach, wot 15 hodź. sudźi wona testowu hru zastupjerja krajneje klasy prěnjeho mustwa Rakečanskeho sportoweho towarstwa. 13 hodź. přihotujetej so Kulowčenjo doma přećiwo Wojerowčanam na nowu hrajnu dobu.

22.07.  13:00  Módro-běli Kulow –

  Wojerowski FC

22.07.  15:00  Rakečanske ST –

  SZ Weißig

28.07.  19:00  SJ Njebjelčicy –

  TSV Wachau II

29.07.  14:00  Sokoł Ralbicy/Hórki –

  Wojerowski FC

30.07.  13:00  ST Radwor –

  Wojerowski FC II

Přewjedu zaso serbski Supercup

Za serbski Supercup, turněr štyrjoch serbskich koparskich cyłkow, njedźelu w Njebjelčicach je wšitko spřihotowane. Hosćićel mjeztym 6. turněra je SJ Njebjelčicy. Wobdźělić smědźa so lětsa koparske cyłki z Radworja, Njebjelčic, Pančic-Kukowa a Ralbic. Mustwo SJ Chrósćicy wusadźi, dokelž bě loni štwórte městno wobsadźiło. Połfinalnej partiji wulosować chcedźa zamołwići w 14 hodź., a turněr započnje so 14.30 hodź.

Satkula-bičtura dźe zaso dale

Serbska debata

nowostki LND