Widźał,słyšał, napisał (12.01.26)
Awtor dźensa
Pětr Šołta
Nó, to drje je swjaty Bosćan jako patron sportowcow čěskim junioram spočatk lěta na swětowym mišterstwje w lodohokeju zaso raz palcy tłóčił, lube čitarki a lubi čitarjo. Štwórte lěto za sobu smědźachu Češa z medalju wokoło šije domoj jěć. Lětsa ze slěbornej, kaž hižo 2023. Mjeztym běše to dwójce bronzowa. W lětušim finalu su chowancy trenarja Patrika Augusty šwedskim junioram 2:4 podleželi. Mustwo Tre Kronor bě turněr bjez jeničkeje poražki dominowało a je po 14 lětach skónčnje zaso pokal dobyćerja w rukomaj dźeržało. Na tutón wokomik młodźi čěscy hokejisća U20 hižo 25 lět čakaja – a budu dale sćerpni wostać dyrbjeć.
Zajimawe ideje fanow Energije
Přiwisnicy so tež serbskej tematice wěnuja
Hižo dołho słušeja při domjacych hrach FC Energije Choćebuz na tak mjenowanej „sewjernej sćěnje“ prezentowane hoberske wobrazy za přihladowarjow k wopytej stadiona. Ze swojimi akcijemi chcedźa přiwisnicy FCE Choćebuskich koparjow a publikum pohonjeć. Hdys a hdys wobsahuja wone tež kritiku. Tola tež zwjazanosć fanow Energije z regionom so wobrazliwje tematizuje. Kaž naposledk na 17. hrajnym dnju, jako bě MSV Duisburg z hosćom w LEAG Energie-stadionje. Serbske Nowiny su na sportowej stronje hižo skrótka wo tym rozprawjeli.
Sport (09.01.26)
Turněr wo pokal Domowiny
41. sokołski wolejbulowy turněr wo pokal Domowiny přewjedźe Serbski Sokoł z.t. zhromadnje ze ST 1922 Radwor a Mustwom 1296 jutře wot 9 hodź. w sportowni w Radworju. Hala budźe wot 8.30 hodź. wotewrjena. W skupinje A hraja Štrawbicy, Mustwo 1296, Bratrowstwo Róžant, SambuCa Allstars (zakitowar pokala) a Hrubjelškit, w skupinje B ST 1922 Radwor, Sorabija Lipsk, Radworske, Škit Budyšin a Handicap a w skupinje C Ataktikarjo, Umpalumpački, Serbska raketa, Sokoł Budyšin a Młode špunty.
Sokoljo hraja doma
Sokoł Budyšin nastupi póndźelu dwójce doma přećiwo hosćom ze Šumbacha a města. Prěnje wolejbulowe mustwo žonow sportoweho towarstwa Viktorije Worklecy hraje sobotu přećiwo rezerwje VV Žitawy 09.
10.01. 14:00 VV Žitawa II –
Viktoria Worklecy (ž)
12.01. 19:00 Sokoł Budyšin –
Schönbachski VV
12.01. 20:00 Sokoł Budyšin –
MSV Budyšin III
Piwowy cup w Kulowje
Jeničce dypk kónc tydźenja wuskočił
Łužiske lodohokejowe liški – Bietigheim Steelers 1:2 (0:0, 1:1, 0:0, 0:1) p.p.
Łužiske liški su minjeny pjatk prěnju partiju druheje němskeje lodohokejoweje ligi (DEL2) w lěće 2026 přećiwo mustwu Bietigheim Steelers 1:2 po podlěšenju přěhrali.
Liški sylnje započachu a hosći zahe pod ćišć stajachu. Dobre šansy mějachu mjez druhim Charlie Jahnke, Nils Elten a John Broda. Po něhdźe 15 mjeńšinach buchu Steelersy předewšěm přez Jacka Duganyja strašniši. Clarke Breitkreuz zwrěšći krótko do přestawki na Florianje Mnichu, prěnja třećina wosta tuž bjez wrotow.
Na spočatku druheje třećiny buchu wrota Steelersow po widejowym dopokazu woteznate. Na tamnej stronje trjechi John Broda we 28 min. po přihrawce Toma Knoblocha 1:0 za Běłu Wodu. Po tym wostaštej wobaj cyłkaj z hrajerjom wjac na lodźe bjez wuspěcha. Krótko do druheje přestawki Benedikt Jiranek z distancowej třělwu k 1:1 wuruna.
Tabulka (08.01.26)
Lodohokej, DEL 2
staw po 32 hrajnych dnjach
1. Krefeldske pinguiny 33 70
2. EC Kassel Huskies 32 64
3. Starbulls Rosenheim 32 62
4. EV Landshut 32 51
5. Ravensburg Towerstars 32 51
6. Lodowe piraty Crimmitschau 33 49
7. Bietigheim Steelers 32 48
8. Lodowe mjedwjedźe
Regensburg 32 48
9. Łužiske lodohokejowe liški 33 45
10. Düsseldorfer EG 32 45
11. Blue Devils Weiden 32 43
12. EC Bad Nauheim 31 39
13. EHC Freiburg 32 35
14. ESV Kaufbeuren 32 25
Z dobyćomajdo noweho lěta startowali
ST Viktoria Worklecy –
Coswig-Mišno
3:0 (25:13, 25:14, 25:14)
Hnydom prěnju sobotu noweho lěta steješe pola Worklečanskich młodych dźiwich domjacy hrajny dźeń w protyce. Na papjerje běchu woni jasny faworit, tola chorosće a zranjenjow dla zestawa mustwa dwaj dnjej do hry hišće jasna njebě. Bohudźak maja we Worklecach sylnu młodźinu. Hnydom pjeć hrajerjow z druheho mustwa měješe tuž falowacych a nazymnjenych hrajerjow z prěnjeje gardy narunać. Wonkowny nadběhowar Šćěpan Wjeńka zaskoči za Józefa Krawca na poziciji diagonalneho nadběhowarja. Dźěru na wonkownej poziciji płataše Jan Bobka, kotryž swój nadawk wosebje w přiwzaću suwerenje spjelni.
Serbskopazličenjo prěni króć dobyli
Dźeń do silwestra je za koparjow gmejny Worklecy a wokolnych wsow kruty termin. Woblubowany koparski turněr gmejnskeje skupiny CDU wotmě so mjeztym hižo 32. raz. Znowa bě so wosom wjesnych cyłkow přizjewiło. Po powitanju turněroweho nawody Andreja Handrika a něhdyšeho předsydy Viktorije Worklecy Alojsa Mikławška zahajištaj sudnikaj Matteo Gruber a Pascal Budar wubědźowanje. Kopańcu na dobrym koparskim niwowje sej znowa tež tójšto přihladowarjow we Worklečanskej ćěłozwučowarni wobhlada.
Juniorojo w Ralbicach wo pokale wojowali
Kaž kóžde lěto su Sokoljo z Ralbic tež lětsa zaso koparske cyłki wokolnych gmejnow na pohodowny halowy koparski turněr přeprosyli. Hižo rano napoł dźewjećich so prěni turněr zahaji.
Koparjo młodźiny F wojowachu po modusu „kóždy přećiwo kóždemu“ wo dypki, při čimž běchu duele jara napjate. Najsylniši běchu Chróšćenjo a hrajerjo z Wóslinka/Skaskowa. Mjez nimaj pak so horjanscy bulkoparjo snadnje z 1:0 přesadźichu a turněr dobychu. Na kóncu wuzwolichu organizatorojo wubědźowanja hišće najlěpšeho hrajerja kóždeho mustwa, tak zo nasta mały Allstar-team. Młodaj sudnikaj Emil Müller a Tim Čornak, kotrajž běštaj hakle njedawno swoje pruwowanje złožiłoj, swój nadawk tohorunja jara derje zmištrowaštaj. Po krótkej přestawce so na turněr młodźiny E přihotowaštaj, kiž připołdnju slědowaše.
Młodźina F:
1. SJ Chrósćicy 10:0 15
2. Wóslink/Skaskow 13:3 12
3. Sokoł Ralbicy/Hórki I 4:7 7
4. SJ Njebjelčicy 4:4 4
5. ST Marijina hwězda 3:6 3
6. Sokoł Ralbicy/Hórki II 1:15 1
Cyłkownje 438 běharkow a běharjow je so silwester dopołdnja na 58. ...
Sněhakowarske lěhwa zahajene
Janské Lázně. W Krkonošach, w kupjelach Janské Lázně, su šulerjo 8. lětnika Wyšeje šule Slepo wčera sezonu sněhakowarskich lěhwow serbskich kubłanišćow zahajili. Po nimi pojědu na sněhakowanske wukubłanje šulerjo Serbskeho gymnazija Budyšin, Serbskeje wyšeje šule Radwor a kónc januara Worklečanscy šulerjo zhromadnje z dalšej skupinu Serbskeho gymnazija. Towarstwo přećelow Serbow lětsa znowa wšitke štyri sněhakowarske lěhwa z tym podpěruje, zo wobstara jim potuńšene liftowe jězdźenki, kiž hewak jenož čěske kubłanišća dóstawaja.
Šulerki a šulerjo Wyšeje šule Slepo maja aktualnje w Janskich Láznjach na a pod Čornej horu nanajlěpše wuměnjenja. Aktualnje je tam při krasnym słónčnym wjedrje hač do 16 stopnjow pod nulu. Dźensa dopołdnja a popołdnju zwučowachu wobdźělnicy zhromadnje z wukubłarjemi sněhakowarskeje šule Šafář wotjězd na čarach za započatkarjow. Skupina Slepjanskeje wyšeje šule je lětsa ze 47 wobdźělnikami wosebje wulka.
Ralbičanscy šulerjo pojědu kónc januara do sněhakowarskeho lěhwa do Altenberga.
