Awtor dźensa

Stefan Šmit

Mustwa prěnjeje do štwórteje koparskeje ligi maja hižo lětnju přestawku. Nětko je chwile so skónčnje po strapacach dołheje sezony wočerstwić. Neugersdorfski FC haji mjeztym wašnje, zo poda so prěnje mustwo po poslednjej hrě zhromadnje do dowola. Cil je lětsa znowa kupa Mallorca. Zaměr jězby je, w tej zestawje hišće raz na sezonu zhladować a mustwowu zhromadnosć hajić. Tónkróć so tež z někotrymi hrajerjemi rozžohnuja. Nimo mjeztym sławneho Jana­ Nezmara wopušćitej Max Höhne a wjelelětny kapitan mustwa Jiří Šisler FC Hornju Łužicu. Posledni mjenowany pak móhł snano tež w přichodnej hrajnej dobje we Łužicy za bulom honić. Po mojich informacijach mjenujcy ma Budissa Budyšin wulki zajim na jeho kmanosćach. Jednanja mjez towarstwom a 31lětnym srjedźopólnym hrajerjom běža.

Wokrjesna wyša koparska liga

Wachau – Ralbicy/Hórki 1:3 (1:0)

Chrósćicy – Łuty9:0 (4:0)

1. Chrósćicy 31 78  : 30 72

2. Hory 30 76  : 36 59

3. Ralbicy/Hórki 30 70  : 33 55

4. Großröhrsdorf 30 78  : 55 55

5. Rakecy 30 66  : 46 54

6. Hnašecy 30 68  : 41 49

7. Póst Budyšin 31 74  : 66 46

8. Ćisk 30 66  : 56 44

9. Kumwałd 30 78  : 67 43

10. Połčnica 30 55  : 56 40

11. Ramnow  30 58  : 74 40

12. Bukecy 30 59  : 77 38

13. Kinspork 30 61  : 64 32

Tydźenja je Denny Kral po dołhim času zaso raz za Serbsku koparsku wubranku kopački šnórował. Regionalny ligist Budissa Budyšin, za nju rodźeny Njebjelčan hewak hraje, je sezonu hižo zakónčił. Za Hanspetera Benada běštej to přičinje so raz za Serbske Nowiny z Dennyjom Kralom rozmołwjeć.

Kak spokojom sće z hrajnej dobu 2015/2016?

D. Kral: Běše to sezona z wyšinami a nižinami. Wona njebě runjewon najlěpša, dokelž njejsmy w rozsudnych hrach přećiwo runohódnym cyłkam dypkować móhli. Přiwšěm běchmy sylny team.

Kotra hra bě za Was najlěpša, potajkim tajki prawy wjeršk?

D. Kral: Atmosfera w Babelsbergu pod swětłomjetakami z wjele přihladowarjemi so mi přeco zaso wosebje lubi. Tale partija słuša k mojim highlightam.

A kotra hra bě za was najhórša w minjenej sezonje?

D. Kral: Z poražku přećiwo Luckenwalde so přeco hišće zaběram, dokelž smy w 90. min. lucky punch kasěrowali. Poprawom bychmy přećiwo tomule runohódnemu mustwu dypkować dyrbjeli. Sym so jara mjerzał.

Móžemy Was w nowej hrajnej dobje zaso w trikoće Budissy wuhladać?

Mišterstwa lochkoatletiki

W Kamjenskim stadionje budu zajutřišim, njedźelu, wot 10 hodź. regionalne lochkoatletiske mišterstwa we wjaceboju za starobne klasy U 16, U 14 a U 12. Mišterstwa zakónča so wokoło 16 hodź. z běhami na srjedźne distancy.

Sportowy swjedźeń

Rakečanska sportowa jednotka přewjedźe wot 10. do 12. junija sportowy swjedźeń. W poskitku změja pjatk, sobotu a njedźelu wšelake zarjadowanja a turněry. Njedźelu, 12. junija, nastupi w Rakecach mjez druhim młodźina B Dynama Drježdźany přećiwo młodźinje A domjacych. Zakop hry je w 14 hodź.

Budissa pyta koparjow

Koparske towarstwo Budissa Budyšin zarjaduje 2. a 9. junija za lětnikaj 2002 a 2003 probowy trening. Štóž sej mysli, zo ma wón talent, a štóž chcył so rady w krajnych ligach a klasach wukubłać dać, njech swoje zamóžnosće na tutymaj dnjomaj pokaza. Wobaj razaj budźe trening wot 17 do 18.30 hodź. na kumštnym trawniku Młynkec łuki na Humboldtowej 10 w Budyšinje. Přizjewjenja su móžne pola koordinatora za dorost Andreasa Vogela pod 03591/27228812 abo 0172/7760141 abo pola trenarja Marija­ Spätha pod 0173/5628771.

Volleyballowy turněr