Njewšědny to wukónc druheho hrajneho dnja wučerskeje volleyballoweje ligi Budyskeho wokrjesa w Lubiju. Kombinowany cyłk 5. SŠ-eks/Melanchthonowy gymnazij Budyšin přesadźi so w načolnej partiji přećiwo kolegam Serbskeho gymnazija Budyšin dwójce z 25:23, ale w druhej sadźbje z dwělomnym rozsudom sudnika.
Sokoł Ralbicy/Hórki II
– FSV Šćeńca 1956 6:1 (1:1)
Zestawa Sokoła: Cyž – Bogusz, Měškank (60. Krawc), Zynda, Matka, Rawš (46. Kurjat), Młynk, Čornak, Jakubaš, Bejmak, Kobalc
Přećiwo poslednjemu tabulki chcychu Sokoljo wězo dobyć a tak wotstawk powjetšić. Zestawa mustwa běše so znowa změniła. Z Młynkom, Rawšom, Bejmakom a nazhonitym Jakubašom mějachu pak Ralbičenjo dosć dobrych ofensiwnych hrajerjow. Z napřećiwnym wětřikom měješe hosćićel najprjedy swoju lubu nuzu a dyrbješe samo přećiwniske wrota přijimować. W hrajnym natwarje so bul zhubi a nastatu dźěru w škiće hosćo zymnokrejnje wužichu (12.). Wotmołwa pak njeda dołho na so čakać. Młynk posłuži z krasnej přihrawku Bejmaka, kotryž přeběža a nisko k 1:1 přetwori (17.). Dalše wrota wón zapasy, jako chcyše na Jakubaša wothrać, tola to běše wopačny rozsud. Z dobreje pozicije dyrbješe njesebičnje sam wotzamknyć (39.). Jakubaš drje docpě krótko do połčasa rjane wrota z pjatu, tola pobóčna sudniča spózna nimohru.
SV Hnašecy/Dobruša
– Sokoł Ralbicy/Hórki 1:1 (1:0)
Zestawa hosći: Gloxyn – Matka, S. Bjeńš, B. Bjeńš, Korjeńk, Šewc, Wałda (46. Lulak), Šołta, Bejmak, Domaška, G. Kurjat (71. M. Kurjat)
ST Módró-běli Njeswačidło
– Sokoł Ralbicy/Hórki II 0:1 (0:1)
Zestawa hosći: Cyž – M. Matka, Bjeńš, Bogusz, Kobalc, Zynda, Krawc, Čornak, Šrajer, Šwejda, J. Matka
ST Hnašecy/Dobruša II
– ST 1922 Radwor 1:4 (0:1)
Zestawa hosći: Bauer – Henke, Buša, B. Sćapan, Šram (84. P. Sćapan), von Karwin, Nuk, Zähr, Wjenka (69. Schulze), Abdullah Omran, Winar
Kaž hižo tydźenja falowaše pola hosći Wróbl we wrotach. Šěrak, zastupjer Wróbla, běše sej zašły tydźeń ruku złamał, a tuž přewza Bauer funkciju wrotarja. Hišće do hrě namołwješe trenar Pětr Bejmak swojich chowancow, zo bychu wosebje z niskimi třělwami a spěšnymi nadběhami wotzamknjenje pytali. To pak so hosćom spočatnje njezešlachći. Domjacy stejachu jara wysoko, zdźěla zakitowachu jenož něšto metrow wot srjedźneje linije zdaleni. Jako Radworčenjo to pytnychu, wusměrichu hru hłownje na dołhe a diagonalne bule přez křidła. Tak wuhrachu sej tež spěšnje wjacore strašne nadběhi. Dwójce Winar a jónu Nuk sadźichu bul snadnje na łatu. Přiwšěm pak běchu nadběhi Radworskich hrajerjow cyłkownje přesłabe. W 41. min nasta potom skónčnje jónu dobry nadběh, kotryž bu hač do kónca wuhraty. Buša pósła z dołhim bulom Winarja, tutón přinjese bul z hłowu na wrota, a nadobo w klětce domjacych zaklinka.
SJ Chrósćicy
– ST Kinspork/Łužnica 3:1 (0:1)
Zestawa domajcych: Králíček – Bětnar, Cyž, Šiman, Dórnik, Dehn (76. Pöpel), Schulze, Młynk (61. Kunze), Domaška, Šmit (43. Věchet), Šafář
Přećiwo hłuboko stejacym hosćom z Kinsporka/Łužnicy měješe cyłk Sportoweje jednotki Chrósćicy swoju lubu nuzu, sej tři dypki doma zdźeržeć. Derje organizowani hosćo při nadběhach domjacych jenož mało dowolichu. Wina na tym pak běše hustohdy njekoncentrowanosć při přihrawkach a w dwubojach kaž tež mało hibanja bjez bula. Tak so hižo někotre razy w srjedźnym polu bul zhubi. Přiwšěm pak mějachu prěnju stoprocentowsku šansu. Po wótrym kopje Schulza smykny Šafář wotplacnjeny bul wrotarja něšto metrow wyše saka. Hosćo sčinichu to ze swójskim nadběhom lěpje. Zamjet, Chróšćenjo dachu hrajerja jednorje běžeć, wón wotpołoži hrajny nastroj sobuhrajerjej, kotryž zymnokrejnje Králíčeka přewiny (45.). Nawjedowanje hosći běše konsekwenca lochkomyslnosće domjacych.
„Hišće jónu, hišće raz widźeć jeju wóčkow kras´ a škleńčku wupić na strowje, kaž ...“, tele słowa Muskeho chóra Delany drje wjetšina z was čitarjow derje znaje a zwěrju sej twjerdźić, zo je spěw po słowach Jurja Šěna zdawna hymna spěwarjow. Spěwarjow-sportowcow drje je w tutym cyłku tež někotrych, najskerje nic w tak bohatej ličbje. A tola sej někotryžkuli z nich, z dynamowcow, praji tak „Hišće jónu, hišće raz“, a potom wupijemy sej škleńčku na postup do druheje koparskeje ligi Němskeje. Po sobotnej hrě so cyle wěsće mnozy prašachu, čehodla nic hižo dźensa. Fantastiski publikum, rjane wjedro a přećiwnik bjez starosćow, z trenarjom, pochadźacym z Drježdźan – postup perfektny? Ně, nažel tomu teoretisce tak njebě, hačrunjež je wšo dwělowanje ryzy teorija. Pjatnaće dypkow předskoka a super wrotowy poměr, što měło so tu hišće stać? Tola swjedźenja njebě, a tuž hišće raz wšě mocy koncentrować na hru w Magdeburgu. Abo chcedźa dynamowcy hakle tydźeń pozdźišo ze swojim přiwiskom postup swjećić?