Do 37. mjezynarodneho swjedźenja serbskeje poezije

Wot 25. do 29. junija wotměje so lětuši 37. swjedźeń serbskeje poezije. Z organizatorom literarneho festiwala Benediktom Dyrlichom je so Alfons Wićaz rozmołwjał.

Wot wšeho spočatka tónle swjedźeń organizujeće. Njeje to přez telko lět za Was wulki marathon?

B. Dyrlich: Cyle njeje mi hišće dych wušoł, byrnjež dźensniši čas woprawdźe ćežko było literarne naročne zarjadowanja přewažnje w serbskej rěči organizować. Mje pak motiwuje, zo je tójšto partnerow w kruhach spisowaćelow a w Serbach, kotřiž swjedźeń sobu podpěruja.

Kak na to dźiwaće, zo njestanje so kóždolětny swjedźeń z rutinu?

B. Dyrlich: Smy so w tychle 37 lětach prócowali, stajnje něšto nowe na nohi stajić. Najlěpše přećiwo stagnaciji je, spytaš-li něšto nowe wotkryć, dalšich partnerow namakać a nowych awtorow do Łužicy wabić.

Čehodla steji za lětuši festiwal basnik a duchowny Józef Nowak w srjedźišću spominanja, što jeho wuznamjenja?

Drježdźany/Budyšin (SN/at). Nowiny ze Sak­skeje su při lětušej akciji Zwjazka žurnalistow Němskeje (DJV) „Fotografojo maja mjeno“ dosć derje wotrěznyli. „Najlěpše po cyłym Zwjazku běchu Serbske Nowiny“, podšmórny předsyda facho­weho wuběrka fotowi žurnalisća Jürgen Männel wčera na posedźenju předsydstwa DJV Sakskeje w Drježdźanach.

DJV je 26. měrca 116 wudaćow dźe­nikow w Němskej analyzował. Serbske Nowiny běchu tón dźeń jako wosomstronske wušli. Po 94 procentach bě pola wozjewjenych wobrazow mjeno fotografa po­date, jeno při jednym nic. Redakciji SN je to připóznaće za swědomite dźěło. Wšako maja čitarjo narok na to, zhonić awtora fota, kaž sej to zakoń wo awtorskich prawach žada.

Na 2. městnje slědowaše Welt Kompakt (87%), na třećim junge Welt (85%). W nimale pjećinje přepytowanych wudaćow bě jenož po sydom do 25 procentach wobrazow mjeno fotografa podate. Po słowach předsydy DJV Michaela Konkena je hišće dosć potenciala, zo by prawje wjele redakcijow dźěło fotografow připóznało a tak zakonjej wotpowědowało.

Drježdźanska grafikarka Barbara Walter rady z mustrami, kotrež poprawom jutrowne jejka porjeńšeja, kreatiwnje wobchadźa a je modernje prezentuje. Na ličaku je powjetša a potom na kwadratiske sty­roporowe platy přenjese. Platy wuměłča na to z fijałkojtej, oranžowej abo hinašej barbu zabarbja a ćišći je porno sebi­ na drobnu ručnje čěranu papjeru (Büttenpapier). Tak nastawaja njewšědne wobrazy, kotrež swědča wo potencialu serbskeho ludoweho wuměłstwa zwonka folklorneho róžka. A na sćěnu pójšeć je tež móžeš. Posledni raz je swoje twórby prezentowała na akciji wotewrjeneho atel­jeja „Kunstlandstrich“, wotměwacej so 7. junija we Wojerecach. Hižo 8. króć bě tamniša kulturna fabrika zarjadowanje organizowała, na kotrymž je so 38 ateljejow, dźěłarnjow a galerijow wobdźěliło.

Přichodny tydźeń budźe premjera Budyskeho lětnjeho dźiwadła

Budyšin (SN/CoR). Premjera drje budźe hakle jutře za tydźeń, hižo nětko pak je ze 17 000 wjace hač połojca zastupnych lisćikow za lětuše Budyske lětnje dźiwa­dło NSLDź předata. „Klasikar ‚My Fair Lady‘­ ludźi wabi“, zwěsći intendant Němsko-Serbskeho ludoweho dźiwadła Lutz Hillmann na wčerawšej nowinarskej konferency. Zdobom zwjesela jeho wjace podpěraćelow. Wšako spěchuje nimo Budyskeje wokrjesneje lutowarnje a priwatneje piwarnje „Eibauer“ po lětach tež zaso zawod „Radeberger Pilsner“ kulturny podawk, kotryž je hladajo na wulkosć jónkrótny w regionje. Dohromady 34 předstajenjow planuje Budyske NSLDź hač do 2. awgusta na dworje Hrodu, hdźež skići trawersa něhdźe tysac při­hladowarjam městno.